ភ្នំពេញ៖លោករដ្ឋមន្រ្តី វេង សាខុន និងលោក សុខ ពុទ្ធីវុធ សហប្រធានក្រុម “ឈ” បានរៀបចំកិច្ចក្រុមការងារផ្នែកស្រូវ-អង្ករ (ក្រុម “ឈ”)ក្នុងស្មារតីនៃកិច្ចសហការខ្ពស់ និងការផ្សាភ្ជាប់នូវទំនាក់ទំនងឱ្យកាន់តែជិតស្និទ្ធរវាងក្រសួង-ស្ថាប័ន និងដៃគូឯកជនពាក់ព័ន្ធក្នុងវិស័យកសិកម្ម នៅទីស្តីការក្រសួងកសិកម្ម រុក្ខាប្រមាញ់ និងនេសាទ ។
ក្រសួងកសិកម្ម រុក្ខាប្រមាញ់ និងនេសាទ បានរៀបចំកិច្ចប្រជុំនេះ ជារៀងរាល់ឆ្នាំដើម្បីតាមដាន ពិភាក្សា ផ្លាស់ប្តូរយោបល់ ស្វែងរកចំណុចខ្លាំង ចំណុចខ្សោយ បញ្ហាប្រឈម និងប្រមូលយកធាតុចូលសំខាន់ៗពីគ្រប់តួអង្គពាក់ព័ន្ធ រួចដាក់ចេញជាយន្តការដោះស្រាយនូវរាល់បញ្ហាដែលជាឧបសគ្គក្នុងដំណើរការអភិវឌ្ឍវិស័យស្រូវ-អង្ករកម្ពុជា ទាំងក្នុងពេលបច្ចុប្បន្ន ដ៏ដូចជាពេលអនាគត ឱ្យបានទាន់ពេលវេលា សមស្រប មានប្រសិទ្ធភាព សម្លាភាព និងសមធម៌ ឈានឆ្ពោះទៅបង្កើនផលិតភាពផលិតកម្មស្រូវ-អង្ករ ប្រកបដោយគុណភាព ការប្រកួតប្រជែង និងកែច្នៃ ដើម្បីឈានទៅសម្រេចគោលនយោបាយ នៃការនាំចេញមាសសរបស់រាជរដ្ឋាភិបាលឱ្យបាន ១លានតោននាពេលអនាគត។
ជាលទ្ធផល សំនួរ សំណូមពរ និងបញ្ហាមួយចំនួនពាក់ព័ន្ធនឹងការផលិត ផលិតភាព និងចែកចាយនៃពូជស្រូវគ្រិះ ការចរាចរណ៍ ប្រើប្រាស់ និងគ្រប់គ្រងថ្នាំកសិកម្ម ការអនុវត្តផលិតកម្មកសិកម្មតាមកិច្ចសន្យា នីតិវិធី លក្ខខណ្ឌតម្រូវ និងសារសំខាន់នៃអនាម័យនិងភូតគាមអនាម័យ ចំពោះវិស័យកសិកម្មទាំងមូល វិសាលភាពនៃមន្ទីរពិសោធន៍ពូជស្រូវត្រូវបានឆ្លើយ និងដោះស្រាយដោយលោកសហប្រធាន និងស្ថាប័នជំនាញក្នុងស្មារតីទទួលខុសត្រូវខ្ពស់។ ដោយឡែកសំណូមពរ និងបញ្ហាចម្បងៗមួយចំនួនទៀត ដូចជាគោលនយោបាយរបស់រាជរដ្ឋាភិបាលដែលហួសពីសមត្ថកិច្ច ឬសិទ្ធិអំណាចរបស់ក្រសួងកសិកម្ម រុក្ខាប្រមាញ់ និងនេសាទ ក៏ដូចជាក្រុមការងារផ្នែកស្រូវ-អង្ករ (ក្រុម “ឈ”) ក្រុមការងារនឹងរៀបចំរបាយការណ៍លម្អិត រួមទាំងសំណូមពរ ដាក់ជូនរាជរដ្ឋាភិបាលដើម្បីជ្រាប ពិនិត្យ និងសម្រេចដ៏ខ្ពង់ខ្ពស់។
សូមអនុញ្ញាតជម្រាបជូនអំពីវឌ្ឍនភាព និងសមិទ្ធផលសំខាន់ៗ ដែលសម្រេចបានក្នុងវិស័យស្រូវ-អង្ករសម្រាប់ឆ្នាំ២០១៩ រួមមាន៖ ទី១. ការនាំចេញអង្ករជាផ្លូវការមានចំនួនជាង ៦២០.១០៦តោន ទៅកាន់ទីផ្សារចំនួន ៦១ប្រទេស។ ទី២. ចំពោះប្រតិបត្តិការនាំចេញអង្ករទៅកាន់ទីផ្សារប្រទេសចិន មកទល់ពេលនេះមានការចូលរួមពីផ្នែកឯកជនចំនួន ២៦សហគ្រាសនាំចេញ ហើយថ្មីៗនេះសហគ្រាសចំនួន ១៨ទៀតត្រូវបានទទួលការអនុញ្ញាត នំាអង្ករចេញទៅកាន់ប្រទេសចិនផងដែរ សរុប ៤៤សហគ្រាស។ ទី៣. ក្រសួងបានបញ្ចេញប្រភេទពូជស្រូវថ្មីមួយទៀតឈ្មោះថា សែនក្រអូប០១ ដែលបានជ្រើសរើសតាមបច្ចេកទេស ពីក្រុមប្រភេទពូជស្រូវសែនក្រអូប ហើយកំពុងមានទីផ្សារ និងទី៤. បានបង្កើត ៧៤សហគមន៍កសិកម្មបន្ថែមទៀត ធ្វើឱ្យចំនួនសហគមន៍កសិកម្មសរុបនៅទូទាំងប្រទេសកើនឡើងដល់ ១.១៩០សហគមន៍៕ ដោយ៖កូឡាប
