តាកែវ៖ លោក កង អាណាន់ អភិបាលក្រុងដូនកែវ បាននាំយកអំណោយមនុស្សធម៌របស់រដ្ឋបាលក្រុង រួមជាមួយនិងអំណោយរបស់ព្រះសង្ឃចំនួន ៦វត្ត យកមកចែកជូនដល់គ្រួសារដែលរងគ្រោះដោយសារអគ្គិភ័យឆាបឆេះ នៅភូមិចក សង្កាត់រកាក្នុង ក្រុងដូនកែវ ខេត្តតាកែវ នារសៀលថ្ងៃទី ១២ ខែកុម្ភៈ ឆ្នាំ២០២០ ។
ថ្លែងក្នុងឳកាសជួបសំណេះសំណាលជាមួយនិងគ្រួសារ រងគ្រោះដោយសារអគ្គិភ័យឆេះផ្ទះរបស់ពួកគាត់នោះដែរ លោកអភិបាលក្រុង បានសំដែងនៅទឹកចិត្តស្រណោះស្រណោកយ៉ាងខ្លាំង ពីព្រោះលោកបានយល់ពីអារម្មណ៏មួយនេះច្បាស់ ដោយសារតែលោកធ្លាប់ជួបផ្ទល់នៅបញ្ហាអគ្គិភ័យឆេះផ្ទះនេះដែរ ចំពោះអារម្មណ៍អ្នករងគ្រោះដោយសារតែភ្លើងឆេះផ្ទះ គឺបាត់បង់នូវក្តីសង្ឃឹមជាច្រើន ដែលខំសន្សំនូវទ្រព្យសម្បត្តិមកទុកដាក់នៅក្នុងផ្ទះ តែត្រូវបានបំផ្លាញចោលតែមួយប៉ព្រិចភ្នែកតែប៉ុណ្ណោះ ដោយសារតែអគ្គិភ័យនេះតែម្តង ។ ដូច្នេះដើម្បីជៀសវៀងការកើតមានឡើង នូវគ្រោះដ៏អាក្រក់នេះ សូមបងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់ទៅលើ ទៀន ធូប ជាពិសេសការប្រើប្រាស់ ឬតបណ្តាញអគ្គិសនី ត្រូវមានលក្ខណៈបច្ចេកទេសច្បាស់លាស់ មិនត្រូវឆ្វេសប្រហែសឡើយ មួយវិញទៀត មិនត្រូវដោតដុយឆ្នាំសាកថ្ម ឬទូរស័ព្ទទុកចោលនោះទេ ព្រោះឧបករណ៍ទាំងនោះសុទ្ធសឹងតែជាហេតុ ដែលបណ្តាលឲ្យកើតមាននូវហានិភ័យខ្ពស់ ដោយសារតែដោតឌុយចូលទុកយូរក្តៅខ្លាំង ធ្វើឲ្យឆ្លងចរន្ត ផ្ទុះសេខ្សែភ្លើង បង្កើតជាអគ្គិភ័យ ម្លេះហើយបងប្អូនប្រជាពលរដ្ឋត្រូវតែពិនិត្យមើលឲ្យបានហ្មត់ចត់ មុននឹងចេញទៅណាមកណាក្រៅផ្ទះសម្បែងត្រូវបិតបារ៉ែតភ្លើងជាមុន ។
សូមបញ្ជាក់ផងដែរថា អំណោយដែលយកមកចែកជូនគ្រួសារ ដែលរងគ្រោះដោយសារអគ្គិភ័យឆេះផ្ទះចំនួន ៣គ្រួសារនោះ រួមមាន អង្ករ ៥០គីឡូក្រាម មី ទឹកត្រី ទឹកស៊ីអ៊ីវ ម៉ុង ភួយ ខ្នើយ កន្ទេល សម្ភារផ្ទះបាយមួយចំនួន និងថវិកាក្នុងមួយគ្រួសារទទួលបាល ៤៥ម៉ឺនរៀល ៕ដោយ៖ តាកែវ
