ខេត្តមណ្ឌលគិរី៖ ប្រជាពលរដ្ឋរស់នៅ ភូមិមានលាភ សង្កាត់សុខដុម ក្រុងសែនមនោរម្យចំនួន ១០គ្រួសារ បានទទូចសុំឲ្យអាជ្ញាធរក្រុងសែនមនោរម្យ ជួយអន្តរាគមន៍លើករណីបុគ្គលម្នាក់ បានធ្វើរបងបិទផ្លូវចាស់ ដែលពួកគាត់ប្រើប្រាស់ប្រចាំថ្ងៃជាយូរលង់ណាស់មកហើយនោះ។
តំណាងប្រជាពលរដ្ឋទាំង១០គ្រួសារ បានលើកឡើងថា ពួកគាត់បានប្រើប្រាស់ផ្លូវមួយខ្សែនេះ តាំងពីឆ្នាំ១៩៨០មកម្លេះ។ ប៉ុន្តែ ក្រោយមកម្ចាស់ដី ដែលរស់នៅលើចំណីផ្លូវខាងលើនេះ បានយកផ្លូវនេះធ្វើជាកម្មសិទ្ធិតែម្តង។
ត្រង់ចំណុចនេះ ប្រជាពលរដ្ឋសង្ស័យថា បុគ្គល ដែលយកផ្លូវសាធារណៈខាងលើនេះ ធ្វើជាកម្មសិទ្ធិ ទំនងជាអាចត្រូវរ៉ូវគ្នាជាមួយអតីតអភិបាលខេត្តមណ្ឌលគិរីអាណត្តិមុនៗ។
ទាក់ទិនករណីនេះ ចៅសង្កាត់សុខដុម បានឱ្យដឹងថា ទីតាំងដីត្រង់ចំណុចខាងលើនេះ គឺម្ចាស់ដី គេមានលិខិតកាន់កាប់ពីអាជ្ញាធរសង្កាត់ជំនាន់មុនៗ។ ហើយថា រូបគាត់ទើបតែមកកាន់តំណែងជាចៅសង្កាត់ ក្នុងអាណត្តិក្រោយនេះទេ ហើយរូបគាត់មិនមានសិទ្ធិដោះស្រាយបញ្ហាធ្វើរបងបិទផ្លូវខាងលើនេះទេ។
ចំណែក លោកឃន់ អូន អភិបាលរងក្រុងសែនមនោរម្យ បញ្ជាក់ថា ទីតាំងដីចំណុចមានទំនាស់ខាងលើនេះ គឺជាផ្លូវចាស់ពិតមែន។
លោកបន្តថា ប្រសិនប្រជាពលរដ្ឋទាំង១០គ្រួសារ ធ្វើការតវ៉ា ឬប្តឹងទាស់ រដ្ឋបាលក្រុង និងធ្វើការដោះស្រាយជូនគាត់ពួកគាត់៕
ដោយ៖ដែនសីមា