ភ្នំពេញ៖ ស្ថានទូតចិនប្រចាំកម្ពុជា បានចេញប្រកាសព័ត៌មានថា នាថ្ងៃទី១២ ខែកុម្ភៈ លោក ស្រី ណូរី ឧត្តមប្រឹក្សាផ្ទាល់ព្រះមហាក្សត្រ និងជានាយកព្រះរាជខុទ្ទកាល័យព្រះមហាក្សត្រ បានធ្វើការប្រគល់សម្ភារៈការពារជំងឺវីរុស ដែលជាព្រះរាជអំណោយដ៏ថ្លៃថ្លារបស់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរដែលទ្រង់សព្វព្រះរាជហឫទ័យប្រោសព្រះរាជទានដល់ភាគីចិន ដោយតាមរយៈលោក Wang Wentian ឯកអគ្គរដ្ឋទូតចិនប្រចាំកម្ពុជា។
លោក ស្រី ណូរីមានប្រសាសន៍ថា សម្តេចព្រះមហាក្សត្រីទ្រង់បានយកព្រះទ័យទុកដាក់លើវឌ្ឍនភាពនៃស្ថានភាពជម្ងឺវីរុសមួយនេះ ហើយទ្រង់បានសព្វព្រះរាជហឫទ័យចាត់តាំងរូបខ្ញុំ ដើម្បីធ្វើការប្រគល់ម៉ាសការពារជំងឺវីរុសដែលជាព្រះរាជអំណោយដ៏ថ្លៃថ្លារបស់ព្រះអង្គជូនដល់ភាគីចិន។ ក្រៅពីនេះ ព្រះអង្គបានស្តេចយាងរៀបចំពិធីតាមបែបសាសនាក្នុងព្រះបរមរាជវាំង ដើម្បីបួងសួងសុំសេចក្តីសុខដល់ប្រទេសចិនផងដែរ ហើយព្រះអង្គបានប្រោសព្រះរាជទានព្រះសព្ទសាធុការពរជ័យជម្នះលើការប្រយុទ្ធប្រឆាំងនឹងជម្ងឺវីរុសមួយនេះដោយជោគជ័យ និងឆាប់រហ័សជូនដល់រដ្ឋាភិបាល និងប្រជាជនចិន។ លោកក៏បានប្រគល់ព្រះរាជទ្រព្យ និងសម្ភារៈដ៏ថ្លៃថ្លារបស់សម្តេចរាជបុត្រី ព្រះអនុជ នរោត្តម អរុណរស្មី, និងរបស់ឯកឧត្តម និងសមាជិកគ្រួសាររបស់លោកផ្ទាល់ និងព្រមទាំងមន្ត្រីក្នុងព្រះបរមរាជវាំងដោយតាមរយៈលោកWang Wentianផងដែរ។
លោក ឯកអគ្គរដ្ឋទូតចិន មានប្រសាសន៍ថា ក្រោយពីមានការផ្ទុះឡើងនៃជម្ងឺប្រភេទនេះក្នុងប្រទេសចិន ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរព្រះអង្គទ្រង់សព្វព្រះរាជហឫទ័យស្ថិតជាមួយប្រជាជនចិន និងស្តេចយាងឆ្លងរាល់ទុក្ខលំបាកជាមួយនឹងយើងទាំងអស់គ្នា នេះបានបង្ហាញពីមនោសញ្ចេតនាដ៏សែនជ្រាលជ្រៅឥតឧបមារបស់សែរាជវង្សានុវង្សកម្ពុជា ជូនចំពោះប្រជាជនចិន យើងខ្ញុំទាំងអស់គ្នាសូមថ្លែងអំណរព្រះគុណយ៉ាងជ្រាលជ្រៅ និងព្រមទាំងបញ្ជូនសម្ភារៈ និងថវិកាទាំងនេះទៅកាន់ប្រទេសចិនក្នុងពេលឆាប់ៗនេះ៕ដោយ៖កូឡាប
