បាងកក៖ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានអញ្ជើញជាអធិបតី និងថ្លែងសុន្ទរកថាគន្លឹះ នៅក្នុងសិក្ខាសាលាស្ដីពី “បញ្ហាប្រឈមនៃកំណើនសេដ្ឋកិច្ច និងពាណិជ្ជកម្មរវាងកម្ពុជា-ថៃ ក្នុងទស្សវត្សឆ្នាំ២០២០” ដែលរៀបចំដោយក្រុមប្រឹក្សាធុរកិច្ចថៃ-កម្ពុជា (Thailand-Cambodia Business Council) នៅទីក្រុងបាងកក ប្រទេសថៃ ដោយសិក្ខាសាលានេះមានការចូលរួមពីធុរជនថៃចំនួនប្រមាណ ៤០០ នាក់មកពីក្រុមហ៊ុនធំៗរបស់ថៃជាច្រើនក្រុមហ៊ុននៅរសៀលថ្ងៃទី១១ ខែកុម្ភៈ ឆ្នាំ២០២០។
ថ្លែងក្នុងសុន្ទរកថាគន្លឹះនាពេលនោះ លោកមរដ្ឋមន្ត្រី បានជម្រាបជូនអំពីវឌ្ឍនភាពនៃការអភិវឌ្ឍសេដ្ឋកិច្ច-សង្គមនៅកម្ពុជា ជាពិសេសកំណើនសេដ្ឋកិច្ចដ៏រឹងមាំក្នុងរង្វង់ ៧,១% ក្នុងរយៈពេលពីរទស្សវត្សចុងក្រោយ ការកើនឡើងនៃចំណូលជាមធ្យមរបស់ប្រជាជនកម្ពុជា ក៏ដូចជាកំណើនដ៏ឆាប់រហ័សនៃការវិនិយោគដោយផ្ទាល់ពីបរទេស ក្នុងនោះរួមមានការវិនិយោគដោយក្រុមហ៊ុនថៃផងដែរ។
លោករដ្ឋមន្ត្រី បានគូសបញ្ជាក់ថា ដើម្បីពង្រីកកំណើន និងទាក់ទាញការវិនិយោគបន្ថែមទៀត រាជរដ្ឋាភិបាលកម្ពុជា បានដាក់ចេញនូវគោលនយោបាយ និងយុទ្ធសាស្ត្រជាច្រើន រួមមានយុទ្ធសាស្ត្រចតុកោណដំណាក់កាលទី៤ ដែលសង្កត់ធ្ងន់លើការធ្វើឲ្យប្រសើរឡើងនូវបរិយាកាសធុរកិច្ច វិនិយោគ និងអភិវឌ្ឍន៍ ក៏ដូចជាពង្រឹងសមត្ថភាពរបស់កម្ពុជាក្នុងការជំរុញសមាហរណកម្មទៅក្នុងសេដ្ឋកិច្ចតំបន់ និងពិភពលោក ជាពិសេសគាំទ្រដល់ទីផ្សារដែលមានស្រាប់ ហើយក្នុងពេលតែមួយបង្កើតទីផ្សារថ្មី ពង្រឹងមូលដ្ឋាននាំចេញតាមរយៈការរៀបចំកិច្ចព្រមព្រៀងពាណិជ្ជកម្មសេរី សម្រាប់ជាប្រភពនៃកំណើនដោយចីរភាព ដោយកាត់បន្ថយការពឹងផ្អែកលើការផ្ដល់នូវភាពអនុគ្រោះពន្ធគយជាឯកតោភាគី។ ជាមួយនោះផងដែរ តាមរយៈគោលនយោបាយអភិវឌ្ឍន៍ឧស្សាហកម្ម ២០១៥-២០២៥ រាជរដ្ឋាភិបាលក៏មានគោលដៅជាស្រេចក្នុងការប្រែក្លាយឧស្សាហកម្មកម្ពុជាពីការពឹកផ្អែកលើពលកម្មគ្មានជំនាញ មកជាឧស្សាហកម្មដែលមានជំនាញខ្ពស់នៅឆ្នាំ២០២៥។ ចំពោះក្រសួងពាណិជ្ជកម្មផ្ទាល់ ក៏មានយុទ្ធសាស្ត្រសមាហរណកម្មពាណិជ្ជកម្មកម្ពុជា ២០១៩-២០២៣ ដែលសង្កត់ធ្ងន់លើការពង្រឹងភាពប្រកួតប្រជែងរបស់កម្ពុជា និងទាញយកប្រយោជន៍ពីប្រភពនៃកំណើនថ្មីរួមទាំងបដិវត្តឧស្សាហកម្មទី៤ ជាដើម។
ទាក់ទងនឹងការវិនិយោគ លោករដ្ឋមន្ត្រី បានលើកទឹកចិត្ត និងអំពាវនាវឲ្យធុរជនថៃពិនិត្យ និងមកធ្វើវិនិយោគឲ្យបានរឹតតែច្រើនឡើងនៅប្រទេសកម្ពុជា។ លោករដ្ឋមន្ត្រី បានជម្រាបជូនអំពីគោលនយោបាយលើកទឹកចិត្តជាច្រើនរបស់កម្ពុជា រួមទាំងវិធានការថ្មីៗដែលរាជរដ្ឋាភិបាលបានដាក់ចេញ ដើម្បីសម្រួលបន្ថែមទៀតនូវបរិយាកាសធុរកិច្ច និងវិនិយោគ កាត់បន្ថយចំណាយប្រតិបត្តិការមួយចំនួន និងកសាងរចនាសម្ព័ន្ធចាំបាច់សម្រាប់ធុរកិច្ច រួមមានថាមពល ហិរញ្ញវត្ថុ លិខិតបទដ្ឋានគតិយុត្ត ។ល។ សម្រាប់គោលដៅវិនិយោគនៅកម្ពុជា វិស័យមានសក្ដានុពលរួមមានកសិ-ឧស្សាហកម្ម កែច្នៃ កម្មន្ដសាល ទេសចរណ៍ បដិសណ្ឋារកិច្ច និងវិស័យមួយចំនួនទៀត ដែលក្រុមហ៊ុនថៃមានបទពិសោធន៍ និងជំនាញខ្ពស់។
លោករដ្ឋមន្ត្រីក៏បានលើកទឹកចិត្តឲ្យក្រុមហ៊ុនថៃ តាមរយៈក្រុមប្រឹក្សាធុរកិច្ចថៃ-កម្ពុជា ចូលរួមឲ្យបានពេញលេញនៅក្នុងវេទិការដ្ឋាភិបាល និងវិស័យឯកជន ក្រោមអធីបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ នាយករដ្ឋមន្ត្រី ដែលត្រៀមនឹងប្រារព្ធធ្វើនៅថ្ងៃទី០១ ខែមេសា ឆ្នាំ២០២០ ខាងមុខនេះ ដើម្បីលើកជាកង្វល់ និងបញ្ហាប្រឈមនានា។
ក្រៅពីថ្លែងសុន្ទរកថាគន្លឹះនៅក្នុងសិក្ខាសាលានាពេលនោះ លោករដ្ឋមន្ត្រី ក៏បានទទួលជួបសម្តែងការគួរសម និងពិភាក្សាការងារជាមួយក្រុមហ៊ុនធំៗ របស់ថៃមួយចំនួនទៀតផងដែរ ដើម្បីផ្សព្វផ្សាយបន្ថែមពីកាលានុវត្តភាព បរិយាកាសធុរកិច្ច និងស្វែងយល់អំពីកិច្ចសហប្រតិបត្តិការលើវិស័យផ្សេងៗ។ សូមបញ្ជាក់ថាក្នុងឆ្នាំ២០១៩ ទំហំពាណិជ្ជកម្មទ្វេភាគីរវាងកម្ពុជា និងថៃ មានទំហំ ៩ ប៊ីលានដុល្លារអាមេរិក៕ដោយ៖កូឡាប
