តាកែវ៖លោក ម៉ឹង វុធី អភិបាលរងខេត្តតាកែវបានលើកឡើងពីគោលបំណង នៃការរៀបចំគម្រោង ដើម្បីអភិវឌ្ឍន៍តំបន់ទេសចរណ៍ធម្មជាតិ បឹងព្រែកល្ពៅមួយនេះឲ្យក្លាយជាតំបន់ដែលមានសក្ដានុពល ខាងផ្នែកទេសចរណ៍ធម្មជាតិជីវចម្រុះ ក្នុងការទាក់ទាញភ្ញៀវទេសចរជាតិ និងអន្តរជាតិ ចូលមកទស្សនាកម្សាន្តផងដែរ។
ថ្លែងនៅក្នុងឳកាសអញ្ជើញ ទស្សនកិច្ច តំបន់ការពារទេសភាពបឹងព្រែកល្ពៅ និងសម្ពោធដាក់ឲ្យប្រើប្រាស់ស្នាក់ការរងថ្មី នៅតំបន់បឹងព្រែកល្ពៅ ដែលស្ថិតនៅក្នុងស្រុក២ គឺស្រុកបូរីជល់សារ និងស្រុកកោះអណ្ដែត នាព្រឹកថ្ងៃពុធ ទី១២ ខែកុម្ភៈ ឆ្នាំ២០២០ នេះ លោក ម៉ឹង វុធី អភិបាលរងខេត្តតាកែវ បានមានប្រសាសន៍បន្តថា បច្ចុប្បន្នអាជ្ញាធខេត្តកំពុងតែយកចិត្តទុកដាក់ លើការអភិវឌ្ឍន៍តំបន់ទេសភាពធម្មជាតិមួយនេះ ដោយរៀបចំឲ្យមន្ត្រីអភិរក្សធ្វើការល្បាត និងថែរក្សានូវប្រភេទសត្វស្លាបទាំងអស់នេះ អោយនៅគង់វង្ស ហើយត្រូវការពារមិនឲ្យមានការប្រមាញ់លើសត្វទាំងអស់នេះទេ បើមានជនណាលួចចាប់សត្វ នៅក្នុងតំបន់អភិរក្សានិងត្រូវដាក់ទោសតាមច្បាប់ជាក់ជាពុំខាន។
លោក ម៉ឹង វុធី អភិបាលរងខេត្តតាកែវបានមានប្រសាសន៍ បន្ថែមទៀតថា ដើម្បីធ្វើអោយតំបន់ទេសភាពធម្មជាតិបឹងព្រែកល្ពៅ យើងទទួលបានភ្ញៀវទេសចរច្រើន ក្នុងនាមយើងជាអាជា្ញធរមូលដ្ឋានត្រូវតែរួមសហការគ្នាធ្វើ ការផ្សព្វផ្សាយនិងលើកស្ទួយតំបន់ធនធានធម្មជាតិមួយនេះ ឲ្យមានភាពល្អប្រសើរឡើងពោលគឺធ្វើយ៉ាងណាអោយតំបន់អភិរក្សបឹងព្រែកល្ពៅនេះ ក្លាយទៅជាតំបន់អេកូឡូស៊ីទេសចរណ៍ ដែលមានសក្ដានុពលមួយផ្នែកធនធានធម្មជាតិជីវចម្រុះដើម្បីឲ្យភ្ញៀវជាតិ និងអន្ដរជាតិគាត់ បានដឹងហើយមកធ្វើការទស្សនាកម្សាន្ដនូវប្រភេទសត្វស្លាបជាច្រើនប្រភេទដែលមាន នៅទីនេះជាពិសេសប្រភេទសត្វគ្រៀល ដែលជាប្រភេទសត្វកម្រនៅក្នុងប្រទេសរបស់កម្ពុជាយើងផងដែរ៕ ដោយ៖តាកែវ
