ភ្នំពេញ៖ នៅ ថ្ងៃទី១៤ កុម្ភ:ស្អែកនេះ ជាថ្ងៃទិវានៃក្តីស្រឡាញ់ យុវវ័យទាំងអស់កុំឱ្យយល់ច្រឡំទិវានេះថា ជាការផ្តល់ក្តីស្រឡាញ់សម្រាប់គូសង្សារ ។ សុំឱ្យមានស្នេហាស្មោះត្រង់ប្តីមួយប្រពន្ធមួយ សុំប្រើប្រាស់ស្រោមអនាម័យឱ្យបានមួយរយភាគរយ នៅពេលមានដៃគូក្រៅ និងប្រញាប់ទៅធ្វើតេស្តឈាមរកមេរោគអេដស៍ ប្រសិនបើសង្ស័យថាមានផ្ទុកមេរោគអេដស៍ ។
ថ្ងៃស្អែក ជាថ្ងៃទី១៤ កុម្ភ: ដែលជាថ្ងៃទិវានៃក្តីស្រឡាញ់ លោក ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានផ្តល់សារណែនាំដល់យុវវ័យទាំងអស់កុំឱ្យយល់ច្រឡំទិវានេះថា ជាការផ្តល់ក្តីស្រឡាញ់សម្រាប់គូសង្សារហើយនាំគ្នាទៅប្រព្រឹត្តអំពើមិនគប្បីខុសនឹងប្រពៃណីជាតិ នាំឲ្យប៉ះពាល់ដល់កិត្តិយសគ្រួសារនិងខូចអនាគតខ្លួន។
លោកបានថ្លែងថា យុវជនត្រូវចេះស្រឡាញ់គ្រួសារ ស្រឡាញ់ប្រទេសជាតិ និងជាពិសេសត្រូវចេះស្រឡាញ់ខ្លួនឯង ដោយធ្វើយ៉ាងណាឱ្យមានសុខភាពល្អ ដើម្បីជាទំពាំងស្នងឫស្សី និងជាអ្នកបន្តវេនរបស់ជាតិ។
លោក ទេសរដ្ឋមន្ត្រី ក៏បានអំពាវនាវបន្ថែម សុំឱ្យមានស្នេហាស្មោះត្រង់ប្តីមួយប្រពន្ធមួយ សុំប្រើប្រាស់ស្រោមអនាម័យឱ្យបានមួយរយភាគរយ នៅពេលមានដៃគូក្រៅ និងប្រញាប់ទៅធ្វើតេស្តឈាមរកមេរោគអេដស៍ ប្រសិនបើសង្ស័យថាមានផ្ទុកមេរោគអេដស៍ ដើម្បីឆាប់បានទៅទទួលសេវាផ្តល់ប្រឹក្សា និងទទួលឱសថពន្យារជីវិត៕ ដោយ៖កូឡាប