ភ្នំពេញ ៖សិក្ខាសាលាស្តីពី “ការនាំចេញផលិតផលសក្តានុពលលើវិស័យវាយនភ័ណ្ឌ និងសម្លៀកបំពាក់ពីកម្ពុជា ឡាវ មីយ៉ាន់ម៉ា និងវៀតណាម ទៅកាន់ទីផ្សារជប៉ុន និងខ្សែសង្វាក់សាកលនៃឧស្សាហកម្មវាយនភ័ណ្ឌ (Export Potential from Cambodia, Lao PDR, Myanmar and Viet Nam (CLMV) to Japan and Global Value Chain in the Textile and Clothing Industry)” ក្នុងគោលបំណងឲ្យ បានយល់ដឹងអំពីបញ្ហាប្រឈម និងឱកាសវិនិយោគនៃឧស្សាហកម្មវាយនភ័ណ្ឌនៅ CLMV ទៅកាន់ប្រទេសជប៉ុនឱ្យកាន់តែល្អប្រសើរឡើង។
សិក្ខាសាលានេះសហការរៀបចំឡើងរវាងក្រសួងពាណិជ្ជកម្ម និងមជ្ឈមណ្ឌលអាស៊ាន-ជប៉ុន ក្នុងគោលបំណងផ្តល់នូវចំណេះដឹង និងស្វែងយល់ពីអត្ថប្រយោជន៍នៃខ្សែសង្វាក់ជាសាកលនៃឧស្សាហកម្មវាយនភ័ណ្ឌ និងការប្រកួតប្រជែងផលិតផលនាំចេញរបស់ប្រទេស CLMV ទៅកាន់ទីផ្សារជប៉ុន ក៏ដូចជាស្វែងយល់ពីនិន្នាការទីផ្សារនាពេលបច្ចុប្បន្ននៃវិស័យវាយនភ័ណ្ឌនៅជប៉ុន ដោយសិក្ខាសាលានេះមានការចូលរួមពីវាគ្មិនជាតិ និងអន្តរជាតិ ចែកជូននូវបទបង្ហាញដ៏មានសារសំខាន់ដល់សិក្ខាកាមសរុបជាង ៩០នាក់ អញ្ជើញចូលរួមក្នុងសិក្ខាសាលានានេះនាថ្ងៃទី១៣ ខែកុម្ភៈ ឆ្នាំ២០២០ នៅសណ្ឋាគារសុខាភ្នំពេញ ។
ឆ្លៀតក្នុងឱកាសនេះ លោក ប៊ុន ចន្ធី អនុរដ្ឋលេខាធិការក្រសួងពាណិជ្ជកម្ម បានឡើងថ្លែងសុន្ទរកថាបើកសិក្ខាសាលា ស្វាគមន៍ចំពោះវត្តមានចូលរួមរបស់ លោក BANDO Shunsuke លោកសាស្ត្រាចារ្យ វាគ្មិនពីប្រទេសCLMV សមាជិកនៃមជ្ឈមណ្ឌលអាស៊ាន-ជប៉ុន ព្រមទាំងសិក្ខាកាមទាំងអស់ ដែលមានវត្តមានក្នុងសិក្ខាសាលានេះ ដោយ លោក បានជម្រាបជូនពីមិត្តភាពរវាងប្រទេសកម្ពុជា ជាមួយនឹងប្រទេសឡាវ មីយ៉ាន់ម៉ា និងវៀតណាម ក៏ដូចជាប្រទេសជប៉ុន មានមិត្តភាពជាយូរឆ្នាំកន្លងមក ព្រមទាំងមាននូវចម្រៀង និងមានការផ្លាស់ប្តូរខ្សែសង្វាក់ផលិតកម្មរវាងប្រទេស CLMV ផងដែរ។
លោកអនុរដ្ឋលេខាធិការ បានលើកឡើងពីទំហំពាណិជ្ជកម្មទ្វេភាគីជាមួយជប៉ុន នៅឆ្នាំ២០១៨ មានទំហំទឹកប្រាក់ប្រមាណជាង ១,៥៨៨ លានដុល្លារ ក្នុងនោះ កម្ពុជាបាននាំចេញទៅជប៉ុននូវទំនិញសក្តានុពលមួយចំនួន ដូចជា សម្លៀកបំពាក់ ស្បែកជើង ខ្សែអ៊ីសូឡង់ និងបរិក្ខាអគ្គីសនី។ល។ ឯកឧត្តម ក៏បានជម្រាបជូនពីគម្រោងវិនិយោគរបស់ជប៉ុនចំនួន ១៣៧គម្រោង ក្នុងទុន វិនិយោគសរុបចំនួនប្រមាណ ២,៥ ពាន់លានដុល្លារ ផ្តោតសំខាន់លើផលិតផលគ្រឿងបង្គុំអគ្គីសនី និងអេឡិចត្រូនិក គ្រឿងបង្គុំរថយន្ត និងបរិក្ខារបច្ចេកទេសកសិ-ឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។ លោក ក៏បានបន្ថែមទៀតថាការអភិវឌ្ឍនៃប្រទេសកម្ពុជា ដែលរាជរដ្ឋាភិបាលកម្ពុជា បានដាក់ចេញជាបន្តនូវការអនុវត្តយុទ្ធសាស្ត្រចតុកោណដំណាក់កាលទី៤ ដើម្បីពង្រឹង និងជំរុញកំណើនសេដ្ឋកិច្ចរវាងប្រទេស ទាំងពីរឱ្យមានប្រៀបលើការប្រកួតប្រជែងក្នុងរបត់ទីផ្សារពិភពលោក ដែលកំពុងធ្វើបដិវត្តន៍ឌីជីថល ៤.០។
ជាកិច្ចបន្ទាប់ លោក BANDO Shunsuke ប្រធានផ្នែកស្រាវជ្រាវ និងវិភាគគោលនយោបាយ នៃមជ្ឈមណ្ឌលអាស៊ាន-ជប៉ុន ឡើងថ្លែងសុន្ទរកថា ដោយមានការយកចិត្តទុកដាក់ និងសហការរៀបចំសិក្ខាសាលាពីថ្នាក់ដឹកនាំក្រសួងពាណិជ្ជកម្ម ក្នុងការបង្កើតសិក្ខាសាលានាព្រឹកនេះឡើងដោយរលូន។ លោកបានបន្តលើកឡើងថា ប្រទេសកម្ពុជាមានទីតាំងភូមិសាស្ត្រស្ថិតនៅកណ្តាលនៃតំបន់អាស៊ាន ដោយមានអំណោយផលដល់ការវិនិយោគ ព្រមទាំងមានការរីកចម្រើនទាំងហេដ្ឋារចនាសម្ព័ន្ធទន់ និងរឹង ក្នុងការជំរុញឲ្យមានការអភិវឌ្ឍសេដ្ឋកិច្ច វិនិយោគ ពាណិជ្ជកម្ម និងទេសចរណ៍ ជាដើម។ លោកក៏បានគូសបញ្ជាក់ថា សិក្ខាសាលានេះនឹងផ្តល់ឱកាសដល់សិក្ខាកាម បានយល់ដឹងអំពីបញ្ហាប្រឈម និងឱកាសវិនិយោគនៃឧស្សាហកម្មវាយនភ័ណ្ឌនៅ CLMV ទៅកាន់ប្រទេសជប៉ុនឱ្យកាន់តែល្អប្រសើរឡើងពីមួយឆ្នាំទៅមួយឆ្នាំ ដើម្បីបង្កើននូវខ្សែសង្វាក់ផលិតកម្មនាំចេញទៅប្រទេសជប៉ុន ក្នុងបរិយាកាសចែករំលែកព័ត៌មាន និងជំនួបពិភាក្សា សម្រាប់ស្វែងរកនូវយុទ្ធសាស្ត្រល្អៗក្នុងចំណោមប្រទេស CLMV៕ដោយ៖កូឡាប