ព្រៃឡង់៖ បណ្តាញសហមន៍ព្រៃឡង់ នៅថ្ងៃទី១៤ ខែកុម្ភៈ ឆ្នាំ២០២០ បានចេញផ្សាយព័ត៌មានថា បណ្តាញសហមន៍ព្រៃឡង់ ខេត្តកំពង់ធំ ត្រូវបានមន្ត្រីឧទ្យានុរក្ស ធ្វើការឃាត់មិនឱ្យចូលព្រៃ ដើម្បីចុះល្បាត នៅចំណុចអូរងាវ នៅថ្ងៃទី១១ ខែកុម្ភៈ ឆ្នាំ២០២០។
បណ្តាញសហមន៍ព្រៃឡង់ បានឲ្យដឹងថា មន្ត្រីឧទ្យានុរក្សមិនបានប្រាប់ពីមូលហេតុ នៃការហាមឃាត់នេះ ដល់សហគមន៍ទេ គ្រាន់តែប្រាប់ថាចាំទទួលបញ្ជារពីថ្នាក់លើ។ នាយកដែនជម្រកសត្វព្រៃព្រៃឡង់ ប្រចាំខេត្តកំពង់ធំ កាលពីថ្ងៃទី៥ ខែកុម្ភៈ ឆ្នាំ២០២០ បានគំរាមសមហគមន៍តាមទូរស័ព្ទថា “ប្រសិនបើចូលខ្ញុំចាប់ហើយ” ខណៈដែលសហគមន៍ទូរស័ព្ទ ស្នើកម្លាំងមន្ត្រីឧទ្យានុរក្ស ដើម្បីចុះល្បាត។
ទោះបីជាយ៉ាងណាក៏ដោយ សហគមន៍នៅតែសម្រេចចិត្តចូលព្រៃ នៅថ្ងៃទី១២ ខែកុម្ភៈ ឆ្នាំ២០២០ ដើម្បីទៅរៀបចំទីតាំង ដើម្បីប្រារព្ធពិធីបុណ្យព្រៃឡង់ នៅថ្ងៃទី២២-២៣ ខែកុម្ភៈ ឆ្នាំ២០២០ខាងមុខនេះ។ លើសពីនេះទៀត ក្រុមល្បាតបានប្រទះឃើញជំរំរបស់ជនល្មើស ១កន្លែង ព្រមទាំងដកហូតបានកាំភ្លើងកែច្នៃ ១ដើម អន្ទាក់សត្វ ១ ឧបរកណ៍ឆក់ និងស្លាក់ស្នាមឈើទើបរំលំជាច្រើនកន្លែង និងបានដុតកម្ទេចចោលនៅហ្នឹងកន្លែង។
ជុំវិញករណីនេះដែរ បណ្តាញសហគមន៍ព្រៃឡង់ខេត្តកំពង់ធំ ស្នើទៅកាន់ក្រសួងបរិស្ថាន ជាពិសេសមន្ទីបរិស្ថានខេត្តកំពង់ធំ បកស្រាយជុំវិញការហាមឃាត់ សហគមន៍មិនឱ្យចុះល្បាតនេះ៕ដោយ៖កូឡាប