ក្រចេះ៖ ស្នងការដ្ឋាននគរបាលខេត្តក្រចេះ បានឲ្យដឹងថា យ៉ាងហោចមានយុវជន១នាក់ និងយុវតី២នាក់ បានស្លាប់ក្នុងហេតុការលង់ទឹកទន្លេ ខណៈមានយុវជន២នាក់ទៀតបានរួចខ្លួន បន្ទាប់ពីពួកគេបានទៅងូតទឹកទន្លេលេងនៅតំបន់ខ្សាច់ដុះ ស្ថិតក្នុងភូមិថ្មីទី២ ឃុំខ្សាច់អណ្តែត ស្រុកឆ្លូង កាលពីម៉ោង៥ល្ងាចថ្ងៃទី១៣ ខែកុម្ភៈ ឆ្នាំ២០២០ និងបានជួបហេតុការណ៍លង់ទឹក។
យុវជន យុវតីរងគ្រោះត្រូវបានគេស្គាល់ថា ១) ឈ្មោះ ធិន ភក្ត្រា ភេទប្រុស អាយុ១៩ឆ្នាំ មានស្រុកកំណើត ភូមិថ្មី២ ឃុំខ្សាច់អណ្តែត ស្រុកឆ្លូង ។ ២) ឈ្មោះ ឡេ ចាន់រក្សា ភេទស្រី អាយុ១៤ឆ្នាំ ជនជាតិខ្មែរ មានស្រុកកំណើតភូមិជ្រោយថ្មក្រោម ឃុំឆ្លូង ស្រុកឆ្លូង ។ ៣) ឈ្មោះ ខុន ធារ៉ា ភេទស្រី អាយុ១៤ឆ្នាំ មានស្រុកកំណើតនៅភូមិព្រែកសំរោងទី ១ ឃុំខ្សាច់អណ្ដែត ស្រុកឆ្លូង ។
សាកសពរបស់ពួកគេទាំងបីនាក់ ត្រូវបានក្រុមគ្រួសារ និងសមត្ថកិច្ចស្រុកឆ្លូង ចុះរាវរកឃើញនិងស្រងចេញពីទឹកទន្លេ ក្រោយរយៈពេលជាង២ម៉ោង បន្ទាប់ពីជួបហេតុការណ៍លង់ទឹក។
អធិការនគរបាលស្រុកឆ្លូង លោកវរសេនីយ៍ឯក ឆុង តូរ៉ាន់ បានឲ្យដឹងថា នគរបាលជំនាញបាន ចុះទៅពិនិត្យធ្វើកោសល្យវិច័យ លើសាកសព និងបានរកឃើញថា ការស្លាប់របស់ពួកគេទាំងបីនាក់ គឺផ្តើមដោយសារលង់ទឹក៕ដោយ៖កូឡាប