ព័ត៌មានក្លែងក្លាយនៅលើបណ្តាញទំនាក់ទំនងសង្គម អាចធ្វើឲ្យការផ្ទុះជំងឺកាន់តែអាក្រក់ និងធ្ងន់ធ្ងរឡើង ដូចជាការផ្ទុះវីរុស COVID-19 ដែលកំពុងរីករាលដាលយ៉ាងខ្លាំងនៅក្នុងប្រទេសចិន។ នេះបើតាមការសិក្សាស្រាវជ្រាវដែលចេញផ្សាយនៅថ្ងៃសុក្រនេះ។
អ្នកវិទ្យាសាស្រ្តមកពីសកវិទ្យាល័យ East Anglia របស់អង់គ្លេស បានធ្វើការវិភាគទៅលើវិធីដែលព័ត៌មានក្លែងក្លាយប៉ះពាល់ ដល់ការរាលត្បាតនៃជំងឺ និងបានលើកឡើងថា កិច្ចប្រឹងប្រែងដើម្បីបញ្ឈប់មនុស្សកុំឲ្យធ្វើការចែករំលែកតគ្នានូវព័ត៌មានក្លែងក្លែង អាចនឹងជួយសង្រ្គោះជីវិតមនុស្សបានយ៉ាងច្រើន។
“នៅពេលគេនិយាយពីវីរុស COVID-19 មានព័ត៌មានមិនត្រឹមត្រូវ និងព័ត៌មានក្លែងក្លាយត្រូវបានផ្សព្វផ្សាយនៅលើអ៊ីនធឺណេត អំពីថាតើវីរុសនោះមានដើមកំណើតមកពីអ្វី និងអ្វីដែលធ្វើឲ្យវារីករាលដាល”។ នេះជាការបញ្ជាក់របស់លោក Paul Hunter សាស្រ្តាចារ្យផ្នែកឱសថមកពីសកលវិទ្យាល័យខាងលើ។
លោកបន្តទៀតថា “ព័ត៌មានមិនត្រឹមត្រូវ (ព័ត៌មានដែលធ្វើឲ្យមានការយល់ច្រឡំ) អាចធ្វើចរាចរណ៍យ៉ាងលឿន ហើយវាអាចផ្លាស់ប្តូរអាកប្បកិរិយារបស់មនុស្ស ទៅកាន់គ្រោះថ្នាក់ខ្លាំង”។
សូមបញ្ជាក់ថា វីរុសប្រភេទថ្មីដែលមានឈ្មោះផ្លូវការថា COVID-19 កំពុងរាតត្បាតយ៉ាងខ្លាំងនៅក្នុងខេត្តហូបេ ប្រទេសចិន។ មនុស្សជិត ១.៥០០នាក់បានស្លាប់ដោយសារវីរុសដ៏កាចសាហាវនោះ ចាប់តាំងពីវាផ្ទុះកាលពីខែធ្នូ ឆ្នាំមុនមក។
វាក៏បានចម្លងដល់មនុស្សជិត ៦៥.០០០នាក់ផងដែរទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia