ប្រធានាធិបតីចិន ស៊ី ជីនពីងបានថ្លែងនៅថ្ងៃព្រហស្បតិ៍ម្សិលមិញថា ចិននឹងអាចមានសមត្ថភាពកាត់បន្ថយផលប៉ះពាល់ ពីការផ្ទុះវីរុស COVID-19 និងអាចរក្សាបាននូវសន្ទុះការអភិវឌ្ឍសេដ្ឋកិច្ចរបស់ខ្លួន។
ប្រទេសចិននឹងខិតខំប្រឹងប្រែងដើម្បីសម្រេចគោលដៅអភិវឌ្ឍន៍នៅឆ្នាំនេះ។ នេះជាការបញ្ជាក់របស់មេដឹកនាំចិនតាមទូរស័ព្ទជាមួយនឹងនាយករដ្ឋមន្រ្តីម៉ាឡេស៊ី លោក Mahathir Mohamad។
សេចក្តីរាយការណ៍លើកឡើងថា លោក ស៊ី ជីនពីងនិយាយថា រដ្ឋាភិបាលចិនបានចាត់វិធានការយ៉ាងម៉ឺងម៉ាត់ដើម្បីទប់ស្កាត់វីរុស ហើយវិធីសាស្រ្តព្យាបាលនៅតែបន្តរីកចម្រើនទៅមុខ។
សេចក្តីរាយការណ៍បានដកស្រង់សម្តីមេដឹកនាំចិនថា “យើងក៏នឹងអាចកាត់បន្ថយផលប៉ះពាល់នៃការរាតត្បាត រក្សាបាននូវសន្ទុះនៃការអភិវឌ្ឍន៍សេដ្ឋកិច្ចរបស់ប្រទេសចិន និងខិតខំដើម្បីសម្រេចគោលដៅ និងកិច្ចការអភិវឌ្ឍន៍នៅឆ្នាំនេះ”។
អ្នកបង្កើតគោលនយោបាយរបស់ចិន បានអនុវត្តនូវវិធានការជាច្រើន ដើម្បីគាំទ្រដល់សេដ្ឋកិច្ច ដែលត្រូវបានញាំញីដោយការផ្ទុះវីរុសកូរ៉ូណា ដែលត្រូវគេរំពឹងថា នឹងជះឥទ្ធិពលយ៉ាងធ្ងន់ធ្ងរលើកំណើនសេដ្ឋកិច្ចក្នុងត្រីមាសទី ១។
សូមបញ្ជាក់ថា វីរុសថ្មី COVID-19 កំពុងរាតត្បាតយ៉ាងខ្លាំង និងបានផ្តាច់ជីវិតមនុស្សជិត ១.៥០០នាក់ ចាប់តាំងពីវាផ្ទុះឡើងដំបូងនៅក្នុងខែធ្នូឆ្នាំមុន និងបានចម្លងទៅកាន់មនុស្សជាង ៦០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia