ភ្នំពេញ ជនល្មើស២នាក់ដែលជំនាញដាក់ថ្នាំសណ្តំយកម៉ូតូ ត្រូវបានសមត្ថកិច្ចប៉ុស្តិ៍និរោធ សហការជាមួយសមត្ថកិច្ចប៉ុស្តិ៍នគរបាលដង្កោ ធ្វើការឃាត់ខ្លួនក្រោយពីទទួលបានពាក្យបណ្ដឹងជនរងគ្រោះម្ចាស់ម៉ូតូ ហេតុការណ៍នេះបង្កឱ្យមានការភ្ញាក់ផ្អើល កាលពីវេលាម៉ោង១០និង៤០នាទីព្រឹកថ្ងៃទី១៤ ខែកុម្ភៈ ឆ្នាំ២០២០ ស្ថិតនៅភោជនីយដ្ឋានភូមិគ្រឹះទន្លេ នៅភូមិកោះនរា សង្កាត់និរោធ ខណ្ឌច្បារអំពៅ។
ជនសង្ស័យដែលសមត្ថកិច្ចឃាត់ខ្លួន មានឈ្មោះពេជ្រ លាប អាយុ ២៨ឆ្នាំ មុខរបរកម្មករសំណង់ ស្នាក់នៅភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ ចំណែកស្រ្តីម្នាក់ទៀតជាជនសង្ស័យ មិនទាន់ស្គាល់អត្តសញ្ញាណនៅឡើយទេ។ រីឯជនរងគ្រោះមានឈ្មោះវង្ស សុដានីន ភេទស្រី អាយុ២៩ ឆ្នាំមុខរបរលក់ផលិតផលតាមអនឡាញ និងស្នាក់នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
បើតាមសម្ដីពីស្ត្រីរងគ្រោះបានប្រាប់ឲ្យដឹងថា រូបនាងនិងជនសង្ស័យទាំងពីរនាក់ ទើបតែស្គាល់គ្នាបានរយៈពេល៤ទៅ៥ថ្ងៃទេ ហើយនៅល្ងាចថ្ងៃទី១១ ខែកុម្ភៈ ឆ្នាំ២០២០ ។ រូបនាងនិងជនសង្ស័យ២នាក់ បានណាត់គ្នាមកផឹកស៊ីនៅហាងមួយកន្លែង នៅតាមបណ្ដោយផ្លូវលេខ ៣៧១ ក្នុងក្នុងភូមិម័ល សង្កាត់ខណ្ឌដង្កោ ខណ្ឌដង្កោ។ ពេលបានជួបគ្នានៅហាងផឹកស៊ីជនសង្ស័យ បានហៅស្រាបៀរមកផឹកនឹងហូបក្លែម ពេលនោះស្ត្រីរងគ្រោះបានផឹកអស់ពីរកែវ ស្រាប់តែជនសង្ស័យ២នាក់នេះ បានលាយគ្រាប់ជីឱ្យផឹក ពេលនោះធ្វើឲ្យអាការរបស់នាងមានសភាពទន់ ខុសប្លែកពីធម្មតា បន្ទាប់មកជនសង្ស័យប្រុសស្រី២នាក់ បាននាំគេទៅចូលក្លឹបមួយកន្លែង ដែលស្ថិតនៅតាមផ្លូវវេងស្រេង នៅសង្កាត់ចោមចៅទី២ ខណ្ឌពោធិ៍សែនជ័យ ពេលវេលាទៅដល់ក្នុងក្លឹប រូបនាងក៏បានសន្លប់បាត់បង់ស្មារតី។ ពេលដែលដឹងខ្លួនមកវិញ គឺនៅក្នុងបន្ទប់ផ្ទះសំណាក់ ហើយក៏បានបាត់កាបូបលុយ ទូរស័ព្ទដៃ និងម៉ូតូម៉ាកហុងដាឌ្រីមសង់ ស៊េរីឆ្នាំ ២០២០ ដែលពាក់ផ្លាកលេខតាកែវ 1V-3586 ។
ពេលដឹងថា បានបាត់ម៉ូតូរូបនាងក៏បានមកដាក់ពាក្យបណ្ដឹង នៅប៉ុស្តិ៍នគរបាលដង្កោ ដើម្បីឱ្យសមត្ថកិច្ចស្រាវជ្រាវចាប់ជនសង្ស័យប្រុសស្រីទាំងពីរនាក់ មកផ្តន្ទាទោស។
ស្រ្តីរងគ្រោះ បានបន្តទៀតថា នៅល្ងាចថ្ងៃទី ១៣ ខែកុម្ភៈ ឆ្នាំ២០២០ ក្រុមជនសង្ស័យទាំង ២នាក់ បានឆាតតាមទូរស័ព្ទមកបងប្អូនជីដូនមួយ របស់នាង ដើម្បីណាត់គ្នាទៅផឹកស៊ីនៅហាងភូមិគ្រឹះទន្លេ ដោយជនសង្ស័យ បានឃើញបងប្រុសជីដូនមួយ ជិះម៉ូតូហុងដាឌ្រីមសង់ ស៊េរីឆ្នាំ២០២០ដូចជាជនរងគ្រោះដែរ គោលបំណងយកទៅដាក់ថ្នាំសណ្តំ ដើម្បីយកម៉ូតូនិងកាបូបលុយ និងទូរស័ព្ទបន្តទៀត។
ពេលនោះ បងប្រុសជីដូនមួយរបស់ជននារីរងគ្រោះ បានដឹកនារីរងគ្រោះ ទៅក៏ឃើញជនសង្ស័យពីរនាក់ ក៏បានស្គាល់ និងក៏បានសុំម្ចាស់ហាងបិទរបងទ្វារ និងរាយការណ៍មកសមត្ថកិច្ចប៉ុស្តិ៍នគរបាលនិរោធ ដើម្បីឃាត់ខ្លួនជនសង្ស័យយកមកសាកសួរ។
ក្រោយពីសាកសួរទៅ សមត្ថកិច្ចទើបដឹងថា ករណីនេះកើតនៅសង្កាត់ដង្កោ ខណ្ឌដង្កោ ទើបសមត្ថកិច្ចប៉ុស្តិ៍នគរបាលនិរោធ ប្រគល់ឲ្យជនសង្ស័យ មកសមត្ថកិច្ចប៉ុស្តិ៍នគរបាលសាមីដើមហេតុ ដើម្បីចាត់ការបន្ត ៕ ដោយ៖កូឡាប
