ភ្នំពេញ៖ កាកបាទក្រហមកម្ពុជា-Cambodian Red Cross បានឲ្យដឹងថា នៅព្រឹកថ្ងៃសុក្រ ទី ១៤ ខែ កុម្ភៈ ឆ្នាំ ២០២០នេះ ក្រុមការងារសាខាកាកបាទក្រហមកម្ពុជា រាជធានីភ្នំពេញ ដឹកនាំដោយ លោក ជិន ប៊ុនធឿន នាយកប្រតិបត្តិសាខា បានចុះពិនិត្យពីស្ថានភាព និងសហការជាមួយអាជ្ញាធរក្នុងការស្រង់នូវស្ថិតិករណីគ្រោះអគ្គិភ័យដែលបានឆាបឆេះ មូលហេតុបណ្តាលមកពីឆ្លងចរន្តអគ្គិសនី កាលពីវេលាម៉ោង៩ព្រឹកថ្ងៃសុក្រនេះ ស្ថិតនៅចំណុចតាមបណ្តោយផ្លូវ៦២R ក្រុមទី៥ ភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ ។
អគ្គិភ័យនេះបានបណ្តាលឲ្យឆេះខូចខាតទាំងស្រុងផ្ទះ ដែលមានម្ចាស់ឈ្មោះ ប៊ូន សារី ភេទស្រី អាយុ៦៨ឆ្នាំ ធ្វើឈើប្រក់សង្ក័សីទំហំ ៦ម៉ែត្រគុណ៧ម៉ែត្រ និងម៉ូតូ២គ្រឿង ទ្រព្យសម្បត្តិមួយចំនួន ហើយបានរាលដាលដល់ផ្ទះអ្នកនៅក្បែរខាងចំនួន៦គ្រួសារបន្តិចបន្តួច ។
នាខណៈនោះ ក្នុងនាមលោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ លោក ជិន ប៊ុនធឿន បានសម្តែងនូវការចូលរួមសោកស្តាយ និងចូលរួមរំលែកនូវទុក្ខលំបាកជាមួយគ្រួសាររងគ្រោះទាំងអស់ ។ ទន្ទឹមនឹងនេះលោកនាយកប្រតិបត្តិសាខា ក៏សូមអំពាវនាវដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នជានិច្ចនូវ ភ្លើងទៀន ធូប ចង្ក្រាន ហ្គាស និងវត្ថុផ្សេងៗដែលងាយឆាបឆេះ និងការតបណ្តាញអគ្គិសនី ប្រើប្រាស់ត្រូវរកអ្នកជំនាញបច្ចេកទេសមកតឲ្យបានត្រឹមត្រូវ ដើម្បីចៀសវាងនូវគ្រោះអគ្គិភ័យដែលអាចកើតមានឡើងជាយថាហេតុ ។
សូមបញ្ជាក់៖ បន្ទាប់ពីការជួយអន្តរាគមន៍របស់សមត្ថកិច្ចយ៉ាងសស្រោកសស្រាំ គ្រោះអគ្គិភ័យបានរលត់ទៅវិញ នៅម៉ោង០៩:៤០នាទីនាថ្ងៃខែឆ្នាំដដែល ។ ករណីអគ្គិភ័យនេះ បានបណ្តាលឲ្យឆេះផ្ទះប្រជាពលរដ្ឋអស់ទាំងស្រុងចំនួន២ខ្នងផ្ទះនិង
ប៉ះពាល់៦ខ្នងផ្ទះ។ ខូចខាតទាំងស្រុងចំនួន២៧បន្ទប់ស្មើនិង២៩គ្រួសារ។
ប្រតិបត្តិការនេះប្រើប្រាស់រថយន្តការិយាល័យអគ្គិភ័យ ចំនួន ១៥ គ្រឿង ប្រើប្រាស់ទឹកអស់ចំនួន ១៥ ឡាន ស្មើនឹង ៦០ ម៉ែត្រគូប ។ រថយន្តជំនួយកងរាជអាវុធហត្ថរាជធានីភ្នំពេញចំនួន ០៣ គ្រឿង ប្រើប្រាស់ទឹកអស់ចំនួន ០៣ ឡាន ស្មើនឹង ១២ ម៉ែត្រគូប ។ រថយន្តជំនួយក្រុមហ៊ុនOCICទីក្រុងជ្រោយចង្វាចំនួន ០៣ គ្រឿងប្រើប្រាស់ទឹកអស់ចំនួន ០៣ ឡាន ស្មើនឹង ១២ ម៉ែត្រគូប។
រថយន្តជំនួយក្រុមហ៊ុនស្រាបៀរកម្ពុជាចំនួន ០១ ឡាន ប្រើប្រាស់ទឹកអស់ចំនួន ០១ ឡាន ស្មើនឹង ០៦ ម៉ែត្រគូប។ រថយន្តជំនួយសាលាខណ្ឌឫស្សីកែវចំនួន ០១ គ្រឿង ប្រើប្រាស់ទឹកអស់ចំនួន ០១ ឡាន ស្មើនឹង ០៤ ម៉ែត្រគូប ៕ដោយ៖កូឡាប