ភ្នំពេញ៖ ផ្សារឃ្លាំងរំសេវ នឹងត្រូវបិទនៅថ្ងៃទី៣០ មេសា ឆ្នាំ២០២០ដោយម្ចាស់ផ្សារ គឺឧកញ៉ា ស៊ី គង់ទ្រីវ ត្រូវការយកទីតាំងផ្សារនេះ អភិវឌ្ឍនិងសាងសង់អគារថ្មីសម្រាប់វិនិយោគ។ ចំណែកអាជីវករមួយចំនួនធំមិនសប្បាយចិត្តដោយសារតែការ បិទតូបមិនមានសងសំណង ឬទីតាំងសម្រាប់ប្រកបអាជីវកម្មរបស់ពួកគាត់។ អាជីវករខ្លះ កំពុងតវ៉ាដើម្បីស្វែករកដំណោះស្រាយសមស្របណាមួយសម្រាប់ពួកគេ។
លោក ស៊ិន វ៉ាន់នី មេធាវីម្នាក់របស់ឧកញ៉ាស៊ី គង់ទ្រីវ ប្រាប់សារព័ត៌មានក្នុងស្រុកនៅថ្ងៃទី១៤ ខែកុម្ភៈនេះថា ការបិទផ្សារនេះ គឺសម្រាប់អភិវឌ្ឍនិងសាងសង់អគារថ្មី ដោយម្ចាស់ផ្សារ សហការជាមួយមជ្ឈមណ្ឌល ម៉ុង់ ឌីយ៉ាល់ និងអ្នកវិនិយោគផ្សេងទៀត។
អាជីវករក្នុងផ្សារនេះ គឺបានផុតអាណត្តិនៃកិច្ចសន្យាជួល តាំងពីចុងឆ្នាំ២០១៨។ ពីខែកុម្ភៈ ដល់មេសា ឆ្នាំ២០២០ ម្ចាស់ផ្សារ មិនយកថ្លៃជួលតូបប្រចាំខែនោះទេ ហើយក៏មិនយកថ្លៃលើការប្រើអគ្គិសនីដែរ។
មេធាវីរបស់ឧកញ៉ា ស៊ី គង់ទ្រីវ បានប្រាប់អាជីវករនៅផ្សារឃ្លាំងរំសេវទាំងអស់ ឲ្យរកទីតាំងថ្មីរៀងខ្លួន។ ទីតាំងផ្សារនេះ នឹងត្រូវចាប់ផ្ដើមសាងសង់អគារថ្មីនៅថ្ងៃទី១ ខែឧសភា ឆ្នាំ២០២០។ អាជីវករនៅផ្សារឃ្លាំងរំសេវទាំងអស់ មានប្រមាណ៥០០នាក់ ហើយមានតូបចំនួន៨០០តូប ដោយក្នុងនោះ ម្ចាស់តូបខ្លះ គ្រប់គ្រងតូបលើសពីមួយ។
បើតាមសេចក្តីជូនដំណឹង ដល់អាជីវករទាំងអស់ស្តីពីការបិទផ្សារជាស្ថាពរនៅថ្ងៃទី៣០មេសាខាងមុខនេះ ចេញនៅថ្ងៃទី២៣ ខែមករា ដោយមេធាវីពីររូបរបស់ឧកញ៉ា ស៊ី គង់ទ្រីវ បានបញ្ជាក់ថា ផ្សារឃ្លាំងរំសេវ នឹងបិទនេះ គឺដើម្បីអភិវឌ្ឍន៍ឲ្យមានភាពស្រស់បំព្រងក៏ដូចជា រួមចំណែកជាមួយរាជរដ្ឋាភិបាល ធ្វើឱ្យរាជធានីភ្នំពេញ ក្លាយជាទីក្រុងដ៏ស្រស់ស្អាតស័ក្តិសមជាបេះដូងនៃកម្ពុជា។
សេចក្តីជូនដំណឹងបានឲ្យដឹងថា “សូមជូនដំណឹងដល់បងប្អូនជាម្ចាស់អាជីវករទាំងអស់ ដែលបានជួលតូបលក់ដូរនៅក្នុងផ្សារឃ្លាំងរំសេវ អំពីការអស់សុពលភាព នៃកិច្ចសន្យាជួល ដោយបងប្អូនត្រូវរកទីតាំងថ្មី ដើម្បីប្រកបអាជីវកម្មលក់ដូររៀងៗខ្លួន ហើយផ្សារត្រូវបិទជាស្ថាពរនៅថ្ងៃទី៣០ ខែមេសា ឆ្នាំ២០២០”។ មូលហេតុដែលសម្រេចបិទផ្សារ គឺដើម្បីអភិវឌ្ឍន៍ឱ្យមជ្ឈមណ្ឌល ម៉ុង ឌីយ៉ាល់ មានសោភ័ណភាពស្រស់បំព្រង នឹងរួមចំណែកជាមួយរដ្ឋាភិបាល ធ្វើឱ្យរាជធានីភ្នំពេញក្លាយជាទីក្រុងដ៏ស្រស់ស្អាតស័ក្តិសមជាបេះដូងនៃកម្ពុជា និងសាងសង់ជាផ្សារទំនើបទាន់សម័យថ្មី។
គណៈកម្មការផ្សារឃ្លាំងរំសេវ បានណែនាំឱ្យអាជីវករទាំងអស់ជ្រាបជាព័ត៌មាន និងស្វែងរកទីតាំងថ្មី ដើម្បីប្រកបអាជីវកម្មលក់ដូរបន្តរបស់បងប្អូនរៀងៗខ្លួន។ ម្ចាស់ទីតាំងផ្សារសូមមិនទទួលខុសត្រូវ ចំពោះការបាត់បង់ផលប្រយោជន៍ ណាមួយរបស់លោក លោកស្រី ដែលមិនបានគោរពតាមសេចក្តីជូនដំណឹងនេះឡើយ៕ដោយ៖បញ្ញាស័ក្តិ