កំពង់ស្ពឺ ÷ នារសៀលថៃ្ងទី១៤ ខែកុម្ភៈ ឆ្នាំ២០២០ នៅសាលប្រជុំស្នងការដ្ឋាននគរបាលខេត្តកំពង់ស្ពឺ លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ អញ្ជើញប្រជុំពិភាក្សាការងារជាមួយ Mr James McCabe នាយកប្រតិបត្តិ CHILD PROTECTION UNIT និងសហការី អញ្ជើញវត្ដមានចូលរួមក្នុងកិច្ចពិភាក្សានោះមាន លោកឧត្តមសេនីយ៍ត្រី សោម បូរ៉ា ស្នងការរង ផែនការងារព្រហ្មទណ្ឌ លោកស្រី ងិន សុគន្ធា ស្នងការរង ទទួលផែនការងារប្រឆាំងការជួញដូរមនុស្ស និងការពារអនីតិជន ។
ជាកិច្ចចាប់ផ្ដើម លោកឧត្តមសេនីយ៍ទោ ស្នងការ បានសង្ខេបអំពីកម្មវត្ថុនៃបទល្មើសដែលកើតមាននៅក្នុងភូមិសាស្ត្រខេត្តកំពង់ស្ពឺ នាពេលកន្លងមក ពិសេសទម្រង់នៃបទល្មើសពាក់ព័ន្ធនិងសកម្មភាពប្រព្រឹត្ដជនល្មើស នីតិវិធីក្នុងការជួយដល់ជនរងគ្រោះនិងការធានា អំពីសុវត្ថិភាពបង្ការ ទប់ស្កាត់ លើបញ្ហាប្រឈមមួយចំនួន ដូចជាការស្រាវជ្រាវបំបែកករណីរហូតចាប់ជនល្មើសដែលប្រព្រឹត្ដកសាងសំណុំរឿងបញ្ជូនទៅតុលាការ ធ្វើការផ្ដន្ទាទោសតាមច្បាប់ ស្វែងរកនិងផ្ដល់យុត្ដិធម៌ជូនជនរងគ្រោះក្រុមគ្រួសារជនរងគ្រោះ កន្លងមកបានកិច្ចសហប្រតិបត្តិការរវាងអង្គភាព(CPU)នគរបាលបានបំបែកករណីជាបន្ដបន្ទាប់ និងកំពុងស្រាវជ្រាវបន្ដក្នុងករណីកំពុងតស៊ូ ។
ជាឆ្លេីយតប Mr James McCabe បានអរគុណដល់លោកឧត្ដមសេនីយ៍ទោ សម សាមួន និងលោកឧត្ដមសេនីយ៍ត្រី ស្នងការរង ទាំងពីររូបដែលបានផ្ដល់ឱកាស បដិសណ្ឋារកិច្ចជូនដល់ក្រុមការងាររបស់លោកបានសិក្សាស្វែងយល់និងស្ដាប់បាននូវបញ្ហាមួយចំនួនទៀតដែលទាមទារអោយមានការបន្ដកិច្ចសហប្រតិបត្តិការរួមគ្នាក្នុងការស្រាវជ្រាវបន្ថែម ដើម្បីពង្រឹងបានលើជំនាញចំពោះមុខ ក្នុងការអនុវត្ដន៍នូវវិធានការមួយចំនួនឈានទៅបង្ក្រាបស្រាវជ្រាវរកឃើញឧក្រឹដ្ឋជនយកមកធ្វើការផ្ដន្ទាទោស។ តាមការបញ្ជាក់ពីក្នុងឆ្នាំ២០២០ខាងមុខនេះ អង្គភាពការពារកុមារ CPU បានទទួលបេសកកម្មកិច្ចសហប្រតិបត្តិការ ជាមួយអគ្គស្នងការនគរបាលជាតិ ពង្រឹងលើកិច្ចការការពារកុមាររងគ្រោះដោយអំពើបំពារបំពាន ផ្សេងៗ ចុងក្រោយលោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ក្នុងនាម កងកម្លាំងនគរបាលទូទាំងខេត្តសូមសម្ដែងការអរគុណចំពោះកិច្ចខិតខំប្រឹងប្រែងរបស់ CPU ដែលបានជួយការងារដល់កិច្ចស្រាវជ្រាវរបស់នគរបាលក្នុងបញ្ចប់ករណីដែលកើតនាពេលកន្លងមក ទទួលជោគជ័យ ទន្ទឹមនឹងកត្ដាជោគជ័យក៏នូវមានបញ្ហាប្រឈមមួយចំនួនទៀតដែលនៅមានការខ្វះចន្លោះតិចតួចដែលត្រូវរួមគ្នាដើម្បីឈានទៅសម្រេចទាំងស្រុង ៕ ដោយ៖កូឡាប
