ភ្នំពេញ៖ ប្រធានាធិបតីអាមេរិក លោក ដូណាល់ ត្រាំ បានបង្ហោះសារមួយតាមបណ្តាញសង្គម Twitter ដោយថ្លែងអំណរគុណកម្ពុជា ចំពោះការអនុញ្ញាតឱ្យ នាវាទេសចរណ៍ Westerdam ដែលប្រទេសចំនួន៤ និងកោះ២ បដិសេធនោះ ឱ្យចូលចតនៅកំពង់ផែ ខេត្តព្រះសីហនុ។
លោកប្រធានាធិបតីសហរដ្ឋអាមេរិក បានថ្លែងអំណរគុណប្រទេសកម្ពុជាដែលបានទទួលយកនាវា Westerdam ឲ្យចូលចតនៅកំពង់ផែ ហើយលោកថា សហរដ្ឋអាមេរិកនឹងចងចាំអំពើល្អរបស់អ្នក។
លោក ដូណាល់ ត្រាំ បានបង្ហោះសារយ៉ាងដូច្នេះថា “សូមអរគុណប្រទេសកម្ពុជាដ៏ស្រស់បំព្រង សម្រាប់ការទទួលយក នាវាទេសចរណ៍ Westerdam ឱ្យចូលចតនៅប្រទេសរបស់ខ្លួន។ សហរដ្ឋអាមេរិក នឹងចងចាំអំពើល្អរបស់អ្នក”។
គួរបញ្ជាក់ថា នាវាទេសចររបស់អាមេរិកដែលមានផ្ទុកអ្នកដំណើរចម្រុះជាតិសាសន៍ត្រូវបានប្រទេសចំនួន៥ បដិសេធមិនឲ្យចូលចតព្រោះតែខ្លាចមានមេរោគកូរ៉ូណាវីរុស ។
នៅយប់ថ្ងៃទី ១២ ខែ កុម្ភៈ ឆ្នាំ ២០២០ សម្ដេចតេជោ ហ៊ុន សែន នាយករដ្ឋមន្ត្រី នៃ រាជរដ្ឋាភិបាល បានសម្រេចអនុញ្ញាតឲ្យនាវា Westerdam ចូលចតក្នុងបុព្វហេតុមនុស្សធម៌ដោយគ្មានការរើសអើងពូជសាសន៍ ។ ការសម្រេចចិត្តរបស់សម្ដេចតេជោ ហ៊ុន សែន ទទួលបានការគាំទ្រ និង កោតសរសើរជាសកលតែម្ដង ៕ដោយ៖កូឡាប
