ចំនួនអ្នកស្លាប់ដោយសារវីរុស COVID-19 បានកើនលើស ១.៥០០នាក់ហើយ នៅថ្ងៃសៅរ៍នេះ ក្រោយពេលមានអ្នកស្លាប់ថ្មីចំនួន ១៣៩នាក់ នៅក្នុងខេត្តហូបេ ដែលជាកន្លែងផ្ទុះនៃវីរុសមរណៈខាងលើ។
គណៈកម្មាការសុខភាពខេត្តនេះ ក៏បានធ្វើការរាយការណ៍ពីការឆ្លងថ្មីចំនួន ២.៤២០ករណីផងដែរ។
រហូតមកដល់ពេលនេះ មានអ្នកស្លាប់យ៉ាងតិចចំនួន ១.៥១៩នាក់ ខណៈដែលអ្នកឆ្លងឥឡូវនេះកើនដល់ជាង ៦៦.០០០នាក់។
បច្ចុប្បន្ន ចិនកំពុងមានបញ្ហាខ្វះពេទ្យសម្រាប់ប្រយុទ្ធប្រឆាំងនឹងវីរុសដ៏កាចសាហាវខាងលើ។
អាជ្ញាធរចិននិយាយថា បុគ្គលិកពេទ្យចំនួន ១.៧១៦នាក់បានឆ្លងវីរុស COVID-19 ក្នុងអំឡុងពេលមានការផ្ទុះ ហើយ ៦នាក់បានស្លាប់ដោយសារវា។
សូមបញ្ជាក់ថា វីរុស COVID-19 ដែលជាឈ្មោះផ្លូវការ បានផ្ទុះឡើងកាលពីខែធ្នូ ឆ្នាំមុន នៅផ្សារមួយកន្លែងដែលលក់សត្វព្រៃ ក្នុងទីក្រុងវូហាន។
អ្នកវិទ្យាសាស្រ្តជឿជាក់ថា វីរុសដ៏កាចសាហាវនេះ កើតចេញមកដោយសារសត្វជ្រឹង និងពង្រូល៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
