ខេត្តស្វាយរៀងៈ បុរសម្នាក់ដែលជាបុគ្គលិកធនាគារABA បានស្លាប់ដោយសារគ្រោះថ្នាក់ចរាចរណ៍ រវាងរថយន្តនិងម៉ូតូ ដែលហេតុការណ៍នេះ បានកើតឡើងកាលពីវេលាម៉ោង ៩និង១០នាទីព្រឹកថ្ងៃទី ១៤ ខែកុម្ភៈ ឆ្នាំ ២០២០ នៅលើផ្លូវជាតិលេខ១ ចន្លោះបង្គោលគីឡូម៉ែត្រលេខ១៣៧ -១៣៨ស្ថិតក្នុងភូមិប្រសូតិ២ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឱ្យដឹងថាៈ មានរថយន្តមួយគ្រឿង ម៉ាកកាមរី ឆ្លាម ពណ៌ទឹកមាស ពាក់ផ្លាកលេខប.មានជ័យ អ្នកបើកបរឈ្មោះកឹម ស៊ីថុន ភេទប្រុស អាយុ៥១ឆ្នាំ មុខរបរនគរបាល រស់នៅភូមិអង្គស្វាយ ឃុំប្រសូតិ ស្រុកស្វាយទាប ខេត្តស្វាយរៀង (គ្មានរបួសស្នាម) រត់គេចពីកន្លែងកើតហេតុ បានធ្វើដំណើរពីទិសដៅពីត្បូងទៅលិច មកដល់ចំណុចកើតហេតុខាងលើ បានបុកចំពីមុខម៉ូតូមួយគ្រឿង ម៉ាកហុងដាឌ្រីមC១២៥ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខព្រៃវែង ១L-៨០៩០ បើកបរដោយឈ្មោះព្រំ សារ៉ុន ភេទប្រុស អាយុ៣០ឆ្នាំ មុខរបរបុគ្គលិកធនាគារABA រស់នៅភូមិព្រះពន្លា ឃុំព្រះពន្លា ស្រុកកំពង់រោទិ៍ ខេត្តស្វាយរៀង (មិនពាក់មួកសុវត្ថិភាព) រងរបួសបែកក្បាលធ្ងន់ធ្ងរ ធ្វើដំណើរទិសដៅពីលិចទៅកើត បណ្ដាលឲ្យគ្រោះថ្នាក់និងរងរបួសហើយបានស្លាប់នៅពេលបញ្ជូនទៅដល់មន្ទីរពេទ្យតែម្តង ។
ប្រភពដដែលបានបន្តថាៈ ករណីនេះបង្កការគ្រោះថ្នាក់និងខូចខាត៖ រួមមានស្លាប់មនុស្ស ១ នាក់ ម៉ូតូខូចខាត ១គ្រឿង (ធ្ងន់) រថយន្តខូចខាត ០១គ្រឿង (ស្រាល)។ ដោយឡែក មធ្យោបាយទាំងពីរយកមករក្សាទុកនៅអធិការដ្ឋាននគរបាលស្រុកស្វាយទាប។ មូលហេតុ គឺរថយន្តមិនគោរពសិទ្ធិអាទិភាព៕ដោយ៖ វ៉ៃកូ