បន្ទាយមានជ័យ ៖ មានមនុស្សម្នាក់បានរងបួសធ្ងន់ ខណៈដែលរថភ្លើងបុកជាមួយគ្រឿងចក្រឈូសឆាយដី ។
ហេតុការណ៍នៃការបុកនេះបានកើតឡើងនៅវេលាម៉ោង៧និង៥៥ នាទីព្រឹកថ្ងៃទី១៦ខែកុម្ភៈ ឆ្នាំ២០២០ចំនុចប្រសព្វផ្លូវជាតិវាងក្រុងនិងកំណាត់ផ្លូវដែក មុខរោងម៉ាស៊ីនកិនស្រូវឥណ្ឌា ស្ថិតក្នុងភូមិបាណយ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
មុនពេលកើតហេតុ រថភ្លើងបានធ្វើដំណើរ ក្នុងទិសដៅពីលិចទៅកើត ពេលមកដល់ចំណុចកើតហេតុ មានគ្រឿងចក្រកំពុងឈូសដី(សាសើ) បានបើកឆ្លងកាត់ផ្លូវរថភ្លើង បណ្តាលឲ្យរថភ្លើងបុកពេញទំហឹងក្រឡាប់ គ្រឿងចក្រសង្កត់លើអ្នកបើកបរបណ្តាលឲ្យរងរបួសធ្ងន់។
សមត្ថកិច្ចបានបញ្ជាក់ឲ្យដឹងថា អ្នករងគ្រោះក្នុងហេតុការណ៍បុកនោះមានឈ្មោះ រឿង វាសនា ភេប្រុសអាយុ៣២ឆ្នាំ រស់នៅភូមិកំពង់ថ្ម ឃុំកំពង់ថ្ម ស្រុកកំពង់ធំ ខេត្តកំពង់ធំ ហើយបានបញ្ជូនទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា ជប៉ុន នាស្រុកមង្គលបូរី ។ចំណែកគ្រឿងចក្រឈូសដីនិងរថភ្លើងរងនូវការខូចខាតធ្ងន់ទាំង២គ្រឿង ។
បង្កឡើងដោយគ្រឿងចក្រឈូសដី(សាសើ) បើកបំពានរំលោភសិទ្ធិអាទិភាពរបស់ផ្លូវរថភ្លើង។
ករណីនេះ ភាគីតំណាងក្រុមហ៊ុនទាំងសងខាងបានសម្របសម្រួលដោះស្រាយគ្នានៅកន្លែងកើតហេតុ ដើម្បីបញ្ចប់រឿង៕ ដោយ៖បញ្ញាស័ក្តិ