ភ្នំពេញ៖ ថ្ងៃទី១៦កុម្ភៈនេះជា ទិវាសត្វពង្រូលអន្តរជាតិ តោះយើងមកស្គាល់ពីសត្វពង្រូលទាំងអស់គ្នា។ ទាំងនេះគឺ ៥ចំណុចអំពីសត្វពង្រូល ។
ពង្រូលគឺជាថនិកសត្វដែលត្រូវបានគេជួញដូរច្រើនបំផុតក្នុងពិភពលោក។ មានសត្វពង្រូលចំនួន៨ប្រភេទក្នុងពិភពលោក ហើយទាំង៨ប្រភេទនេះត្រូវបានចាត់ចូលក្នុងបញ្ជីក្រហមរបស់អង្គការ IUCN ថាជាប្រភេទដែលរងការគំរាមកំហែង។
ក្នុងប្រទេសចិន និងវៀតណាម ពង្រូលត្រូវបានគំរាមកំហែងដោយការបរបាញ់ និងការជួញដូរសាច់ និងស្រការបស់វា ដោយគេជឿថាវាគឺជាថ្នាំពិសេស។
អង្គការ WWF បាននឹងកំពុងធ្វើកិច្ចការងារជំរុញឲ្យច្បាប់ និងការអនុវត្តច្បាប់ធានាថាបទឧក្រិដ្ឋសត្វព្រៃនឹងត្រូវបានផ្តន្ទាទោស ហើយអ្នកដែលត្រូវចាប់គឺអ្នកដែលប្រព្រឹត្តិបទល្មើស មិនមែនសត្វពង្រូលដ៏គួរឲ្យស្រឡាញ់នេះទេ។
១ ពង្រូល
ពង្រូលជាថនិកសត្វដ៏ស្លូត ហើយពូកែអៀន។ វាមានត្រចៀកតូច មានស្បែកនិងស្រកាក្រាស់ ដោយស្រកានេះគ្របដណ្តប់ពេញដងខ្លួនទាំងមូល។ ពង្រូលមានចលនាយឺតៗ និងពត់ពេនក្នុងការវារចុះឡើង ហើយពូកែឡើងដើមឈើ ដោយប្រើជើងទាំងបួន និងជំនួយពីកន្ទុយរបស់វា។ ពង្រូលញីបង្កើតកូនម្តងបាន ១ក្បាល ជួនកាល២ក្បាល ដោយពពោះរយៈពេល២ ទៅ៣ខែ។ កូនរស់នៅជាមួយមេដោយតោងជាប់នឹងកន្ទុយពេលមេរបស់វាបម្លាស់ទី។
២ ពង្រូលញ៊ាំចំណីអី?
ពង្រូលមិនមានធ្មេញទេ ប៉ុន្តែមានអណ្តាលស្អិត ងាយក្នុងការចាប់ចំណី ដោយអាចលៀនចេញមកក្រៅបានរហូតសល់ ២៥សង់ទីម៉ែត្រ ហើយចំណីសំខាន់របស់វាគឺសត្វល្អិត ដូចជា ស្រមោច សង្អារ អងក្រង ដុកឌឿ និងកណ្តៀរជាដើម។ ពង្រូលជាសត្វរកស៊ីលើដី ឬក្នុងរន្ធឈើ ពេលថ្ងៃវាដេកក្នុងរន្ធដី។
៣ ពង្រូល ជាថនិកសត្វដែលត្រូវគេជួញដូរច្រើនបំផុតក្នុងពិភពលោក
សាច់ និងស្រការបស់សត្វពង្រូលគឺពេញនិយមក្នុងទីផ្សារសាច់សត្វព្រៃ ដោយគេយល់ថាវាជាថ្នាំបុរាណអាចព្យាបាលជំំងឺជាច្រើនដូចជាជំងឺហឺត រហូតដល់ឈឺសន្លាក់ឆ្អឹង និងរលាកសន្លាក់។
៤ ពង្រូល កំពុងរងគ្រោះថ្នាក់
នៅពេលដែលវាជួបឧបសគ្គ វាតែងតែរមូលខ្លួន ដោយយកកន្ទុយរុំព័ន្ធជុំវិញខ្លួនដូចបាល់ដើម្បីការពារខ្លួនពីការយាយីពីសត្វនានា តែទោះជាយ៉ាងនេះក៏ដោយ ក៏វានៅតែមិនអាចការពារខ្លួនពីអ្នកបរបាញ់បានឡើយ។ សត្វពង្រូលក្នុងពិភពលោកមានចំនួន៨ ហើយទាំង៨ប្រភេទនេះ ត្រូវបានចាត់ចូលក្នុងបញ្ជីក្រហមរបស់អង្គការ IUCN ដោយ៣ប្រភេទ ត្រូវបានស្ថិតក្នុងប្រភេទសត្វជិតផុតពូជ។
៥. យើងអាចជួយសត្វពង្រូលបាន!
ពង្រូលជា គឺជាសត្វគួរឱ្យស្រឡាញ់ហើយវាមិនបង្កគ្រោះថ្នាក់នោះទេ។ អង្គការ WWF បាននិងកំពុងធ្វើការទាក់ទងនឹងការអភិរក្សសត្វព្រៃរបស់យើងគ្រប់ប្រភេទ បូករួមនឹងសត្វពង្រូលផងដែរ។ ក្នុងនោះក្រោមការសហការជាមួយដៃគូពាក់ព័ន្ធមានមន្ទីរបរិស្ថានខេត្ត ឧទ្យានុរក្សមកពីក្រសួងបរិស្ថាន ក្រុមការងារអនុវត្តច្បាប់ និងសត្តរក្សរបស់យើងតែងតែធ្វើការល្បាតជាប្រចាំ ដើម្បីដោះអន្ទាក់ ផាកពិន័យ និងអប់រំណែនាំ ធ្វើយ៉ាងណាអាចរក្សាការពារធនធានសត្វព្រៃរបស់យើង ឲ្យនៅគង់វង្ស។ យើងទាំងអស់គ្នា អាចចូលរួមអភិរក្សសត្វដ៏គួរឲ្យស្រឡាញ់របស់យើងជាមួយអង្គការWWF ដោយចាប់ផ្តើមពីការមិនបរិភោគ មិនទិញ មិនប្រើប្រាស់សាច់សត្វព្រៃក្នុងទម្រង់ណាក៏ដោយ ហើយប្រសិនបើលោកអ្នកឃើញបទល្មើសសត្វព្រៃ សូមទូរស័ព្ទមកយើង“ លេខទូរស័ព្ទ ០៦៨ ៧៥១ ២១២ / ០៦៩ ៧២៨ ៧២៨ ៧២៧” (សម្រាប់ខេត្តមណ្ឌលគិរី)៕ ដោយ៖កូឡាប