ខេត្តព្រះសីហនុ៖ មន្ត្រីនគរបាលអន្តោប្រវេសន៍ច្រកទ្វារអន្តរជាតិ ក្រុងព្រះសីហនុ បានឲ្យដឹងដា ព្រឹកនេះ មានកប៉ាលទេសចរណ៍បរទេសមួយគ្រឿងទៀត ឈ្មោះ MS World Dream មានសញ្ជាតិ Bahamas បានចូលមកឈប់សំចត នៅក្នុងសមុទ្រខាងមុខកំពង់ផែក្រុងព្រះសីហនុ នាព្រឹកថ្ងៃទី១៧ ខែកុម្ភៈ ឆ្នាំ២០២០នេះ។
មន្ត្រីសមត្ថកិច្ចនៅកំពង់ផែឲ្យដឹងថា នៅលើនាវានេះ មិនមានអ្នកទេសចរទេ គឺមានតែកងនាវិកចំនួន៣៦នាក់តែប៉ុណ្ណោះ។ ហើយថានាវានេះ អាជ្ញាធរមិនទាន់អនុញ្ញាតឲ្យចូលចតនៅចំណតកំពងផែនៅឡើយ ដោយរង់ចាំរហូតដល់ក្រុមគ្រូពេទ្យកម្ពុជា មកយកសំណាកពីកងនាវិកទាំង៣៦នាក់ ទៅពិនិត្យផ្ទៀងផ្ទាត់នៅវិទ្យាស្ថានប៉ាស្ទ័រ ដើម្បីរកមេរោគ Covid-19 ជាមុនសិន មុននឹងអនុញ្ញាតឲ្យឡើងលើដីគោក។
មន្ត្រីនគរបាលបញ្ជាក់ថា ប្រសិនបើការវិភាគតាមវេជ្ជសាស្ត្រជាក់លាក់ បញ្ជាក់ថា អវិជ្ជមាន គ្មានសញ្ញាសង្ស័យពីមេរោគ ទើបអាជ្ញាធរអនុញ្ញាតឲ្យចូលចតដល់ចំណតកំពង់ផែថ្ម៕ដោយ៖ដែនសីមា
