ឯកអគ្គរដ្ឋទូតអាមេរិចប្រចាំប្រទេសអាឡឺម៉ង បាននិយាយនៅថ្ងៃអាទិត្យម្សិលមិញថា ប្រធានាធិបតី ដូណាល់ ត្រាំ បានគំរាមកាត់ផ្តាច់ការចែករំលែកព័ត៌មានស៊ើបការណ៍សម្ងាត់ជាមួយប្រទេសណា ដែលជ្រើសរើសប្រើប្រព័ន្ធ 5G របស់ក្រុមហ៊ុនយក្សចិន Huawei។
ទីក្រុងវ៉ាស៊ីនបានកំពុងដាក់សម្ពាធលើប្រទេសសម្ព័ន្ធមិត្ត ដើម្បីឲ្យប្រទេសទាំងនោះបង់ចោលប្រព័ន្ធ 5G ដោយលើកហេតុផលថា វានឹងគំរាមកំហែងដល់សន្តិសុខជាតិ។
ឯកអគ្គរដ្ឋទូត Richard Grenell បាននិយាយថា លោក ដូណាល់ ត្រាំ “បានណែនាំខ្ញុំឲ្យធ្វើការបញ្ជាក់ឲ្យច្បាស់ថា ប្រទេសណាដែលជ្រើសរើសប្រព័ន្ធ 5G នឹងធ្វើឲ្យពួកយើងមិនអាចចែករំលែកការស៊ើបការណ៍ និងព័័ត៌មានកម្រិតខ្ពស់ដល់ពួកគេបានទេ”។
ប្រទេសសម្ព័ន្ធមិត្តដ៏សំខាន់របស់អាមេរិចនៅតំបន់អឺរ៉ុប មានដូចជាអង់គ្លេស និងបារាំង បាននិយាយថា ពួកគេនឹងមិនធ្វើការហាមឃាត់ការបង្កើតប្រព័ន្ធ 5G នោះឡើយ ប៉ុន្តែពួកគេនឹងធ្វើការរឹតត្បិត។ ការលើកឡើងនេះ ធ្វើឲ្យលោក ត្រាំ ក្តៅក្រហាយយ៉ាងខ្លាំងជាមួយនឹងទីក្រុងឡុង។
រដ្ឋមន្រ្តីការបរទេសអាមេរិច លោក Mike Pompeo បានថ្លែងប្រាប់សន្និសីទសន្តិសុខនៅទីក្រុង Munich នៃអាឡឺម៉ងថា Huawei គឺជាឧបករណ៍ស៊ើបការណ៍របស់ចិន។
ក្រុមហ៊ុន Huawei បានបដិសេធការចោទប្រកាន់របស់អាមេរិច ចំណែកទីក្រុងប៉េកាំងបានចាត់ទុកវាថា ជាការគំរាមកំហែងផ្នែកសេដ្ឋកិច្ច៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia