ភ្នំពេញ៖ ក្រសួងសុខាភិបាល នៅយប់ថ្ងៃទី១៧ ខែកុម្ភៈ ឆ្នាំ២០២០នេះ បានចេញសេចក្តីប្រកាសមួយ ដោយបន្តពង្រឹងការតាមដាន និងវិធានការឆ្លើយតបនឹងករណីជំងឺផ្លូវដង្ហើមកូរ៉ូណាថ្មីនៅកម្ពុជា បន្ទាប់ពីរដ្ឋាភិបាលម៉ាឡេស៊ី បានរកឃើញករណីកូរ៉ូណាថ្មី នៅលើខ្លួនអ្នកទេសចរម្នាក់ដែលធ្វើដំណើរតាមនាវាទេសចរណ៍ Westerdam ហើយបានចាកចេញពីកម្ពុជា។
ក្រសួងសុខាភិបាលបានទទួលព័ត៌មានពីក្រសួងសុខាភិបាលប្រទេសម៉ាឡេស៊ីថា មានករណីវីរុសកូរ៉ូណាថ្មីត្រូវបានរកឃើញលើអ្នកទេសចរម្នាក់ដែលបានធ្វើដំណើរតាមនាវាWESTERDAM លើជនជាតិអាមេរិកកាំងអាយុ 83ឆ្នាំនិងបច្ចុប្បន្នកំពុងស្ថិតនៅទីក្រុងគូឡាឡាំពួរប្រទេសម៉ាឡេស៊ី។
គាត់បានធ្វើដំណើរឆ្ពោះទៅកាន់សហរដ្ឋអាមេរិកពីទីក្រុងព្រះសីហនុប្រទេសកម្ពុជា កាត់តាមទីក្រុងគូឡាឡាំពួរប្រទេសម៉ាឡេស៊ី។ គាត់ជាអ្នកដំណើរម្នាក់ក្នុងចំណោមអ្នកដំណើរ 2257 នាក់នៅលើនាវាដែលបានចូលចតនៅកំពង់ផែខេត្តព្រះសីហនុប្រទេសកម្ពុជា។
លោកសាស្ត្រាចារ្យម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានការងារឆ្លើយតបការរាតត្បាតនៃវីរុសកូរ៉ូណាថ្មី បានកោះប្រជុំជាបន្ទាន់មួយនៅទីស្តីការក្រសួង ហើយក្រុមការងារបានឯកភាពលើវិធានការសុខភាពសាធារណៈដូចជា ធ្វើការពិនិត្យអ្នកដំណើរលើនាវាខ្នាតធំនេះទាំងអស់នៅភ្នំពេញនៅក្រុងព្រះសីហនុដើម្បីពិនិត្យរកមើលរោគសញ្ញាណាមួយដែលកើតឡើង ។ រាល់បុគ្គលិកដែលធ្វើដំណើរលើនាវានេះ ត្រូវបន្តតាមដានសុខភាពរបស់ខ្លួនឲ្យបានហ្មត់ចត់ ។ បុគ្គលិកដែលមានរោគសញ្ញាកក្តៅខ្លួន ក្អក ពិបាកដកដង្ហើមត្រូវផ្ដល់ព័ត៌មានដល់អាជ្ញាធរសុខាភិបាល។
ពាក់ព័ន្ធនឹងករណីនេះ ក្រសួងសុខាភិបាល បានបញ្ជាក់ឡើងវិញថា បន្ទាប់ពីកម្ពុជាបានអនុញ្ញាតឱ្យ នាវាទេសចរណ៍ Westerdam ចូលចតនៅកំពង់ផែខេត្តព្រះសីហនុ កាលពីថ្ងៃទី១៤ ខែកុម្ភៈ ឆ្នាំ២០២០នោះ ក្រសួងសុខាភិបាល បានត្រួតពិនិត្យសីតុណ្ហភាពលើបុគ្គលទាំងអស់ មុននឹងអនុញ្ញាតឱ្យចាកចេញពីនាវា ហើយក៏មិនបានរកឃើញថានរណាម្នាក់មានជំងឺគ្រុនក្តៅនោះដែរ៕ដោយ៖កូឡាប