ភ្នំពេញ៖ លោកឧបនាយករដ្ឋមន្ត្រី ជា សុផារ៉ា បានប្រាប់ទៅ រដ្ឋបាលខេត្តកោះកុង ត្រូវធ្វើការអប់រំផ្សព្វផ្សាយ ជូនដល់ប្រជាពលរដ្ឋមួយចំនួនតូច ដែលតែងតែនាំគ្នា ឡើងមកតវ៉ារឿងទំនាស់ដីធ្លី នៅទីស្តីការក្រសួងដែនដី ឱ្យបានជ្រួតជ្រាប និងស្រាវជ្រាវរកមុខសញ្ញាជនខិលខូច ដែលបំផុសបំផុលបោកប្រាស់ប្រជាពលរដ្ឋ ដើម្បីចិត្តវិធានការតាមផ្លូវច្បាប់។
ក្រសួងរៀបចំដែនដី នគរូបនីយកម្ម សំណង់ នៅថ្ងៃទី១៧ ខែកុម្ភៈ ឆ្នាំ២០២០នេះ បានចេញសេចក្តីប្រកាសព័ត៌មាន ដោយបានលើកឡើងថា ចំពោះប្រជាពលរដ្ឋប្រមាណ 115 គ្រួសារ មានទីលំនៅក្នុងស្រុកស្រែអំបិល ខេត្តកោះកុង ដឹកនាំដោយឈ្មោះផាវ ញើង ដែលឡើងមកតវ៉ានៅទីស្តីការក្រសួងនាថ្ងៃទី 14 ខែកុម្ភៈ ឆ្នាំ 2020 ស្នើក្រសួង ជួយជំរុញការដោះស្រាយបញ្ហាដីធ្លីរបស់ពួកគាត់នោះ ក្រសួងរៀបចំដែនដី នគរូបនីយកម្ម និងសំណង់ ពិនិត្យឃើញថា ប្រជាពលរដ្ឋខាងលើធ្លាប់បានដាក់សំណើទាមទារ មកក្រសួងកន្លងមក ហើយក្រសួងបានចាត់ក្រុមការងារចុះពិនិត្យ ដោះស្រាយ និងឆ្លើយតបនូវសំណាងរបស់ប្រជាពលរដ្ឋរួចរាល់ហើយ។
លោកឧបនាយករដ្ឋមន្ត្រី ជា សុផារ៉ា បានថ្លែងថា ពាក់ព័ន្ធឈ្មោះផាវ ញើង ដែលបានដោះស្រាយបញ្ចប់វិវាទ រួចហើយ បានស្នើសុំជាថ្មីឲ្យចេញប័ណ្ណតាមភូមិសាស្រ្ត ដែលគាត់ទាមទារ ។ ក្នុងករណីមួយទៀតក្រុមប្រជាពលរដ្ឋ 730 គ្រួសារទាមទារសុំដីសម្បទានសង្គមកិច្ច និងក្រុមប្រជាពលរដ្ឋ 197 គ្រួសារប្ដឹងទាមទារពីឈ្មោះហេង ហ៊ុយ គឺក្រសួងរៀបចំដែនដីនគរូបនីយកម្ម និងសំណង់ ពុំទទួលដោះស្រាយសំណើរបស់ប្រជាពលរដ្ឋទាំង 3 ក្រុមខាងលើឡើយ។ រដ្ឋបាលខេត្តកោះកុង ត្រូវធ្វើការអប់រំផ្សព្វផ្សាយ ជូនដល់ប្រជាពលរដ្ឋឱ្យបានជ្រួតជ្រាប និងស្រាវជ្រាវរកមុខសញ្ញាជនខិលខូច ដែលបំផុសបំផុលបោកប្រាស់ប្រជាពលរដ្ឋ ដើម្បីចិត្តវិធានការតាមផ្លូវច្បាប់៕ដោយ៖កូឡាប
