ខេត្តកណ្ដាល៖ បុរសចំណាស់ម្នាក់ បើកម៉ូតូមិនប្រកាន់ស្ដាំ ត្រូវរថយន្តមួយគ្រឿងបើកបុកពេញមួយទំហឹង បណ្ដាលឲ្យបុរសរងគ្រោះជាអ្នកបើកបរម៉ូតូរងរបួសធ្ងន់ លើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១៩-២០ ស្ថិតនៅក្នុងភូមិពោធិ៍មង្គល ឃុំព្រែកតាទែន ស្រុកពញាឮ ខេត្តកណ្តាល កាលពីវេលាម៉ោង១៥និង៣០នាទី ថ្ងៃទី១៧ ខែកុម្ភៈ ឆ្នាំ២០២០ ។
មន្ត្រីនគរបាលចរាចរណស្រុកពញាឮ បានឲ្យដឹងថា៖ ជនរងគ្រោះឈ្មោះ យា យន ភេទប្រុស អាយុ៦៣ឆ្នាំ មានទីលំនៅភូមិព្រែកក្តី ឃុំព្រែកតាទែន ស្រុកពញាឮ ខេត្តកណ្តាល បើកបរម៉ូតូម៉ាកHONDA DREAM ធុC125 ពណ៌ខ្មៅ ពាក់ផ្លាកលេខ កណ្តាល 1J-3513 ។ ចំណែកភាគខាងរថយន្តម៉ាក TOYOTA PRIUS ពណ៌ស ពាក់ផ្លាកលេខ ភ្នំពេញ 2BC-7956 បើកបរដោយឈ្មោះ ឃៀង លីហេង ភេទប្រុស អាយុ៣០ឆ្នាំ មានទីលំនៅភូមិស្រះកែវ ឃុំវាំងចាស់ ស្រុកឧដុង្គ ខេត្តកំពង់ស្ពឺ។
នៅមុនពេលកើតហេតុ សាក្សីបានឃើញជនរងគ្រោះជិះម៉ូតូតាមបណ្ដោយផ្លូវជាតិលេខ៥ ដោយបើកបរក្នុងគន្លងផ្លូវខាងលិច(គន្លងផ្លូវអាទិភាពរបស់រថយន្ត)មិនប្រកាន់ស្តាំ ហើយឆ្លងប្តូរគន្លងផ្លូវមានទិសដៅពីលិចទៅកើត ស្របពេលនោះក៏មានរថយន្តមួយគ្រឿងម៉ាក TOYOTA PRIUS បើកបរមានទិសដៅពីជើងទៅត្បូង(ឧដុង្គ-ភ្នំពេញ)បានបុកម៉ូតូពេញទំហឹង បណ្តាលឲ្យអ្នកបើកបរម៉ូតូរងរបួសធ្ងន់ ។
ក្រោយពេលកើតហេតុ អ្នករងរបួសធ្ងន់ ត្រូវបានរថយន្តសង្គ្រោះដឹកបញ្ជូទៅកាន់មន្ទីរពេទ្យរាជធានីភ្នំពេញ ។ ចំពោះវត្ថុតាងទាំង២គ្រឿង ត្រូវបានកំម្លាំងផ្នែកជំនាញ យកមករក្សាទុកបណ្តោះអាសន្ន នៅអធិការដ្ឋាននគរបាលស្រុក ដើម្បីចាត់ការតាមនីតិវិធីតាមច្បាប់ ។
តាមការបញ្ជាក់របស់សមត្ថកិច្ចជំនាញ បានឲ្យដឹងថា ករណីខាងលើនេះ បណ្តាលមកពីអ្នកបើកបរម៉ូតូ បើកបរមិនប្រកាន់ស្តាំ ប្តូរទិសដៅនិងគន្លងផ្លូវ ខ្វះការប្រុងប្រយ័ត្នមិនគោរពសិទ្ធិអាទិភាព ៕ដោយ៖កូឡាប