កំពត៖ រដ្ឋបាលខេត្តកំពត បានឲ្យដឹងថា នៅព្រឹកថ្ងៃអង្គារ ទី១៨ ខែកុម្ភៈ ឆ្នាំ២០២០ លោក ជាវ តាយ អភិបាលនៃគណៈអភិបាលខេត្ត បានដឹកនាំកិច្ចប្រជុំត្រួតពិនិត្យ និងទប់ស្កាត់ការងារបូមខ្សាច់អនាធិបតេយ្យ នៅតាមដងព្រែកកំពង់បាយ។ ដោយមានការចូលរួមពី អភិបាលក្រុងកំពត ស្រុកទឹកឈូ មន្ទីរអង្គភាពពាក់ព័ន្ធជុំវិញខេត្ត និងម្ចាស់ការដ្ឋានបូមខ្សាច់ សរុប ១១នាក់។
ក្នុងឱកាសនេះដែរ លោកអភិបាលខេត្ត បានស្នើឲ្យអភិបាលក្រុងស្រុក និងមន្ទីរអង្គភាពចូលរួម ត្រួតពិនិត្យសកម្មភាពបូមខ្សាច់របស់ក្រុមហ៊ុន ដោយត្រូវតែមានអាជ្ញាប័ណ្ណច្បាប់ត្រឹមត្រូវ ជាពិសេសមិនអនុញ្ញាតឲ្យបូមខ្សាច់ហួសពីការកំណត់របស់អាជ្ញាប័ណ្ណឡើយ។
ពាក់ព័ន្ធនឹងទូកទេសចរណ៍ ត្រូវតែបង្កើតគណ:កម្មការគ្រប់គ្រងទូកទាំងនេះ ឲ្យច្បាស់លាស់ និងជូនលោកអភិបាលក្រុង និង ប្រធានមន្ទីរទេសចរណ៍ ហាមឃាត់មិនអនុញ្ញាតឲ្យទូកទេសចរណ៍ បម្រើសេវាកម្មភោជនីយដ្ឋានឡើយ ទោះមានអាជ្ញាប័ណ្ណបែបណាក៏ដោយ៕ដោយ៖បញ្ញាស័ក្តិ