ភ្នំពេញ៖ ប្រជាពលរដ្ឋជាច្រើននាក់ ដែលធ្វើដំណើរតាមផ្លូវបេតុងលេខ 44P អាចប្រឈមនឹងគ្រោះថ្នាក់ដោយយថាហេតុ ដោយសារតែមានមានខ្សែភ្លើង និងខ្សែកាប មួយបាច់ធំ ប្រមាណ១០០ខ្សែ បានធ្លាក់កាត់ទទឹងផ្លូវនេះជាច្រើនថ្ងៃមកហើយ ពុំទាន់ឃើញអាជ្ញាធរមូលដ្ឋាន ភូមិទឹកថ្លាចាត់វិធានការនោះឡើយ។ ប្រជាពលរដ្ឋនៅកន្លែងនោះ បាននិយាយថា ការដែលខ្សែភ្លើងទាំងដុំធ្លាក់បែបនេះ ដោយសារតែបាក់ទ្រេតបង្គោលដែកដែលទ្រខ្សែភ្លើងនិងខ្សែកាបនោះ ហើយគេសង្កេតឃើញថា មានរយៈពេលជាច្រើនថ្ងៃមកហើយ។
ជាមួយគ្នានោះដែរ ដោយសារតែខ្សែភ្លើងនិងខ្សែកាបនោះធ្លាក់មកចុះក្រោមកាន់តែខ្លាំង ប៊ិះតែហ្នឹងទាក់កអ្នកជិះម៉ូតូទៅហើយនោះ ប្រជាពលរដ្ឋនៅក្បែរនោះ បានថង់ប្លាស្ទីកចងទាក់ជាសញ្ញាសម្គាល់រយីងរយោងរញ៉េរញ៉ៃខ្លាំងណាស់ ដើម្បីឲ្យអ្នកដំណើរបានមើលឃើញ និងជាការប្រុងប្រយ័ត្ន កុំឲ្យមានគ្រោះថ្នាក់។
អ្នកជិះម៉ូតូម្នាក់ បានសម្តែងការស្ងប់ស្ងែងចំពោះអាជ្ញាធរភូមិទឹកថ្លា និងមន្ត្រីតាមក្រុមក្នុងមូលដ្ឋាន ពិតជាធ្វើការបានល្អមែន ព្រោះថាខ្សែភ្លើងខ្សែកាបធ្លាប់ចង់ទាក់កអ្នកដំណើរបែបនោះហើយ ពួកគាត់ប្រហែលជាជាប់រវល់ធ្វើការងារសង្គម ឬការងារផ្សេងៗ ខ្លាំងណាស់ហើយមើលទៅ បានជាមិនមានពេលវេលាគ្រប់គ្រាប់ដើរមើលសណ្តាប់ធ្នាប់ក្នុងមូលដ្ឋាន ដែលកំពុងមានករណីខ្សែភ្លើងខ្សែកាប ធ្លាក់ជិតទាក់កអ្នកដំណើរនោះជាច្រើនថ្ងៃមកហើយ។
សូមបញ្ជាក់ថា ផ្លូវបេតុងលេខ 44P ស្ថិតនៅក្នុងក្រុម៥ ភូមិទឹកថ្លា សង្កាត់ទឹកថ្លា ខណ្ឌសែនសុខ ម្តុំមុខបុរីៅភ្នំពេញ៕ដោយ៖កូឡាប
