ខេត្តស្វាយរៀង ៖ ភ្ញៀវទេសចរដែលបានធ្វើដំណើរឆ្លងកាត់ មាត់ច្រកទ្វារព្រំដែន អន្តរជាតិបាវិត ហាក់មានទំនុកចិត្តមកលើមន្ត្រីចត្តាឡីស័ក ដែលបានប្រចាំការនៅច្រកទ្វារព្រំដែនអន្តរជាតិបាវិត ដែលក្រសួងសុខាភិបាល បានដាក់មន្ត្រីប្រចាំការ និងម៉ាស៊ីនស្គែនត្រួតពិនិត្យរកវីរ៉ុស Covid-19 ដែលជាជំងឺផ្លូវដង្ហើមថ្មី។
លោកវេជ្ជបណ្ឌិត អ៊ឹម បុត្រ ប្រធានក្រុមចត្តាឡីស័កប្រចាំការ នៅច្រកទ្វាអន្តរជាតិបាវិត បានឱ្យក្រុមអ្នកសារព័ត៌មាន ដឹងថា មន្ត្រីចត្តាឡីស័ក បានធ្វើការត្រួតពិនិត្យវីរុសកូរ៉ូណានេះ ដោយបំពាក់ម៉ាស៊ីនស្គែនគ្រប់ភ្ញៀវទាំងអស់ ប្រសិនបើមានរោគសញ្ញាសង្ស័យ ដែលមានកំដៅចាប់ពី ៣៨អង្សាទ្បើងទៅ មន្ត្រីជំនាញនឹងនាំភ្ញៀវនោះចូលក្នុងបន្ទប់សុវត្ថិភាពពិនិត្យ និងវាស់កំដៅ សាជាថ្មីបើរកឃើញថា វិជ្ជមាននៅលើភ្ញៀវ ។មន្ត្រីចត្តាឡីស័កត្រូវពាក់សម្លៀកបំពាក់ការពារសុវត្ថិភាព ហើយបញ្ជូន ជនរងគ្រោះទៅកាន់អគារសុវត្ថិភាព ឲ្យដេកនៅលើគ្រែពេទ្យដែលមាន បំពាក់បំពង់ខ្យល់អុកស៊ីហ្ស៊ែន និងមានគ្រូពេទ្យប្រចាំការពិនិត្យតាមដាន និងសង្គ្រោះ។
លោកបន្តថា ក្នុងករណីបើត្រូវបញ្ជូនជនរងគ្រោះ យើងក៏មានរថយន្តសាមុយ១គ្រឿង យកមកពីមន្ទីរពេទ្យបង្អែកស្រុកប្រតិបត្តិជីភូ មកប្រចាំការ២៤ម៉ោង ដោយមានបំពាក់បរិក្ខារពេទ្យ និងគ្រូពេទ្យត្រៀមប្រចាំការផងដែរ។
លោកបាន បានបញ្ជាក់ថា ការពិនិត្យរោគសញ្ញានៃមេរោគផ្លូវដង្ហើមថ្មីឈ្មោះកូរ៉ូណា នៅច្រកទ្វាអន្តរជាតិបាវិតនេះ គឺបានធ្វើឡើងគ្រប់ភ្ញៀវទាំងអស់ ដែលចូលមកកម្ពុជា ពុំទាន់រកឃើញមានភ្ញៀវណាម្នាក់ មានផ្ទុកជំងឺផ្លូវដង្ហើមថ្មីនេះនៅឡើយទេ។
ផ្អែកតាមការសង្កេតនោះ ភ្ញៀវចូលមកតាមច្រកទ្វាព្រំដែនអន្តរជាតិបាវិតនេះ មានគ្រប់ជាតិសាសន៍ គឺពួកគេមានការយល់ដឹងច្រើន ដោយអ្នកខ្លះមានពាក់ម៉ាសការពារសុវត្ថិភាព និងអ្នកខ្លះទៀត គឺពុំបានពាក់ម៉ាសនោះទេ ដោយពួកគេហាក់មានទំនុកចិត្តយ៉ាងខ្លាំង ទៅលើមន្ត្រីជំនាញប្រចាំការនៅទីនោះ ជាពិសេសមកលើរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ ដែលរហូតមកដល់ពេលនេះ ប្រជាជនកម្ពុជា មិនទាន់មានអ្នកឆ្លងជំងឺវីរ៉ុស covid19នេះនៅឡើយទេ។ ដូច្នេះទើបភ្ញៀវទេសចរ មិនខ្លាចជំងឺផ្លូវដង្ហើម ហើយភ្ញៀវខ្លះពុំមានពាក់ម៉ាស តែមន្ត្រីចត្តាឡីស័កប្រចាំការ នៅបញ្ជរច្រកទ្វាព្រំដែនអន្តរជាតិបាវិត បានចែកម៉ាសឲ្យភ្ញៀវដោយឥតគិតថ្លៃផងដែរ៕ ដោយ៖វ៉ៃកូ