សៀមរាប៖ លោកឃឹម ហ្វីណង់ អភិបាលស្រុកបន្ទាយស្រី បានថ្លែងតាមរយៈផេកហ្វេសប៊ុក នៅថ្ងៃទី១៩កុម្ភៈនេះថា បេសកកម្មជួយសហគមន៍កសិករបន្ទាយស្រីលក់ត្រសក់ផ្អែម ត្រូវបានបញ្ចប់ដោយជោគជ័យមុនផែនការគ្រោងទុក ត្រសក់ផ្អែមទាំងអស់នៅក្នុងចំការទាំងមូលត្រូវបានទិញនិងកក់ទុករួចអស់ហើយគិតត្រឹមថ្ងៃនេះ។
លោកបានមានប្រសាសន៍ថា ខ្ញុំបាទសូមជូនដំណឹងដ៏គួរឲ្យរីករាយជំនួសសហគមន៍កសិករត្រសក់ផ្អែមស្រុកបន្ទាយស្រីថា ចំណោទបញ្ហាលក់របស់ពួកគាត់ត្រូវបានដោះស្រាយរួចរាល់ទាំងស្រុងគិតត្រឹមក្នុងថ្ងៃនេះ ហើយគម្រោងកម្មវិធីផ្សព្វផ្សាយលក់ដោយផ្ទាល់នៅផ្សារហេរីថេក (ដែលដំបូងឡើយគ្រោងលក់រហូតដល់ថ្ងៃទី២៦កុម្ភៈ) ក៏នឹងបញ្ចប់ត្រឹមថ្ងៃទីមួយនេះដែរ ដោយសារតែតម្រូវការដ៏ច្រើនលើសលុបនិងគួរឲ្យស្មានមិនដល់នេះ។
ក្នុងនាមសហគមន៍កសិករស្រុកបន្ទាយស្រី ខ្ញុំសូមថ្លែងការដឹងគុណដ៏ស្មោះអស់ពីចិត្ត ចំពោះសាធារណៈជនទាំងអស់ ដែលបានចូលរួមជួយទិញត្រសក់ផ្អែមក្នុងពេលលំបាកមួយនេះ។ ដោយសារតែមានការខ្នះខ្នែងចូលរួមជួយ ពីសំណាក់បងប្អូនប្រជាពលរដ្ឋមកពីគ្រប់ទិសទីយ៉ាងផុសផុលបែបនេះហើយ ទើបបញ្ហាទាំងមូលអាចដោះស្រាយបានត្រឹមតែក្នុងរយៈពេលមិនដល់២ថ្ងៃស្រួលបួលផង។ ក្នុងនោះ មានបុគ្គលនិងក្រុមហ៊ុនមួយចំនួនដែលខ្ញុំបាទសូមថ្លែងអំណរគុណ ជាពិសេសនិងសូមរំលេច រួមមាន៖ ផ្សារទំនើបឡាក់គី ដែលបានយល់ព្រមទទួលយកទៅលក់នៅក្នុងគ្រប់ហាងរបស់ខ្លួនទាំងអស់ និងលក់ក្នុងថ្លៃដើម។ ផ្សារហេរីថេក ដែលបានផ្តល់ទីតាំងសម្រាប់ផ្សព្វផ្សាយ និងលក់ដោយផ្ទាល់ដោយមិនគិតថ្លៃ ។ ក្រុមហ៊ុន Temple Group ដែលបានបញ្ជូនក្រុមការងារមកជួយធ្វើបង្អែមនិងទឹកក្រឡុក ពីត្រសក់ផ្អែមនិងចែកជូនដោយឥតគិតថ្លៃ។ ក្រុមហ៊ុន Retro Investment ដែលបានបញ្ជូនក្រុមការងារសម្របសម្រួលការលក់ ការតុបតែង និងការគ្រប់គ្រងកម្មវិធីទាំងមូលឲ្យបានបញ្ចប់ទៅដោយរលូន។ លោកបណ្ឌិត អ៊ឹង ឃាង ដែលបានទិញត្រសក់ផ្អែមចំនួន១៥០០គីឡូក្រាម ហើយចែកជូនអ្នករត់ម៉ូតូឌុបនិងម៉ូតូកង់បីដោយឥតគិតថ្លៃ។ លោកជំទាវ អ៊ូ ធីតាពៅ (ជាមិត្តភក្តិនិងជាភរិយាឯកឧត្តម គួច ចំរើន) ដែលបានស្ម័គ្រចិត្តជួយទិញ១០០០គីឡូក្រាម តែបរិច្ចាគត្រសក់ផ្អែមត្រឡប់ទៅវិញទាំងអស់ ដើម្បីទុកជូនប្រជាកសិករសម្រាប់លក់បន្ត។
លោកបន្តថា ទំព័រប្រវត្តិសាស្ត្រថ្មីមួយនៃវប្បធម៌ចេះ ជួយគ្នានៅក្នុងស្រុកបន្ទាយស្រីត្រូវបានបង្កើតឡើង ត្រឹមតែក្នុងរយៈពេលប៉ុន្មានថ្ងៃនេះ។ បើទោះជាវាគ្រាន់តែជាបញ្ហាមួយតូចតាចក៏ដោយ តែវាបានឆ្លុះបញ្ចាំងពីសណ្តានចិត្តដ៏ធំទូលាយ ដែលប្រជាកសិករស្រុកបន្ទាយស្រី នឹងចងចាំការចូលរួមជួយស្រោចស្រង់ក្នុងគ្រាអាសន្នមួយនេះ ហើយសង្ឃឹមថាស្មារតីរួមសាមគ្គីគ្នានឹងបន្តមាននៅក្នុងបេះខ្មែរគ្រប់ៗរូប។
មែន! បញ្ហាកសិកម្ម ជាទូទៅគឺជារឿងធំហើយស្មុគស្មាញ រួមទាំងមានបញ្ហាប្រឈមនិងមានភាពខុសប្លែកគ្នា ពីតំបន់មួយទៅតំបន់មួយ ហើយក៏មិនអាចនឹងងាយដោះស្រាយភ្លាមៗដូចករណីនេះដែរ។ ដំណោះស្រាយលើកនេះគឺគ្រាន់តែជាដំណោះស្រាយបណ្តោះអាសន្ន ដែលសមស្របនឹងប្រភេទបញ្ហា ដែលមានចរឹតបណ្តោះអាសន្នបែបនេះ។ យើងនៅសេសសល់បញ្ហារ៉ាំរ៉ៃនិងស៊ីជម្រៅជាច្រើនទៀតនៅក្នុងវិស័យកសិកម្ម ដែលទាមទារឲ្យមានដំណោះស្រាយយូរអង្វែង និងដំណោះស្រាយបែបយុទ្ធសាស្ត្រទូលំទូលាយទ្រង់ទ្រាយធំ។ តែខ្ញុំជឿជាក់ថា បើយើងទាំងអស់គ្នានាំគ្នាចូលរួមជួយដោះស្រាយ នៅតំបន់ណាជួយគ្នាដោះនៅតំបន់នោះ បូករួមផ្សំនឹងការខិតខំរបស់រាជរដ្ឋាភិបាល ក្នុងកម្រិតគោលនយោបាយបន្ថែមទៀត នោះយើងនឹងអាចមើលឃើញពន្លឺថ្មីពីវិស័យកសិកម្មនេះបាន។
សូមបញ្ជាក់: បងប្អូនដែលបានកក់ទុកត្រសក់ផ្អែមរួចហើយ ក្រុមការងារនឹងរៀបចំផ្ញើជូននៅក្នុងពេលប៉ុន្មានថ្ងៃខាងមុខនេះ។ ប៉ុន្តែខ្ញុំបាទសូមអធ្យាស្រ័យចំពោះបងប្អូនដែលចង់បន្តចូលរួមជួយផ្សេងៗទៀត ដោយហេតុតែក្រុមការងារមិនមានត្រសក់ផ្អែម ដើម្បីបន្តលក់ជូនទៀតឡើយ។ បងប្អូនដែលនៅចាប់អារម្មណ៍ចង់សាករសជាតិត្រសក់ផ្អែមបន្ទាយស្រី ប្រហែលជាអាចនៅរកទិញបាននៅតាមផ្សារទំនើបឡាក់គី៕ ដោយ៖កូឡាប