ភ្នំពេញ៖ ថៃ ស្រីនាង ជាអ្នកលក់ផលិតផលថែរក្សាសម្ផស្ស និងខោអាវក្នុង និងតែងតែ live វីដេអូលក់ បង្ហោះរូបភាពលក់រ៉ូបរាត្រី បង្ហាញភាពស៊ិចស៊ីបញ្ចេញសាច់ ត្រូវបាន សមត្ថកិច្ចនគរបាលប៉ុស្តិ៍រដ្ឋបាលបឹងកក់ទី១ នាំខ្លួនមកអប់រំ ហើយអ្នកលក់រ៉ូបរាត្រីរូបនេះ ក៏យល់ព្រមទទួលស្គាល់កំហុស រឿងឡាយ វីដេអូ Sexy និងធ្វើកិច្ចសន្យាបញ្ឈប់ មិនត្រូវឌឺដងតាមបណ្តាញតទៅទៀត។
លោកវរសេនីយ៍ទោ សុខ ហេង អធិការនគរបាលខណ្ឌទួលគោក បានបញ្ជាក់ឲ្យដឹងថា ថៃ ស្រីនាង ដែលតែងតែផុសរូបភាព និងវីដេអូខ្លីប លក់សម្លៀកបំពាក់ សិចស៊ីជ្រុលហួសហេតុ ដែលធ្វើឲ្ប៉ះពាល់យ៉ាងខ្លាំងដល់ទំនៀមទម្លាប់ប្រពៃណី និងកិត្តិយសរបស់ស្រ្តីខ្មែរ ត្រូវបាននាំខ្លួនមកអធិការដ្ឋាននគរបាលខណ្ឌទួលគោក ដើម្បីធ្វើការអប់រំ ណែនាំ និងធ្វើកិច្ចសន្យា ហើយ ថៃ ស្រីនាង ក៏បានថតវីដេអូដើម្បីធ្វើការសុំទោសជាសាធារណ:ផងដែរ ។
សូមរំលឹកថា កាលពីពេលថ្មីៗនេះសម្តេចតេជោ ហ៊ុន សែន នាយករដ្ឋមន្ត្រីកម្ពុជា បញ្ជាឲ្យ ក្រសួងប្រៃសណីយ៍ និងទូរគមនាគមន៍ ត្រូវបិទការLiveលក់ផលិតផលតាមអនឡាញដែលបញ្ចេញអស់កេរ្តិ៍ខ្មាស ស្ត្រី ព្រោះវាអាចនាំទៅដល់ការចាប់រំលោភ បំពានផ្លូវភេទ លើស្ត្រី ក្នុងសង្គមបច្ចុប្បន្ន និង ប៉ះពាល់ដល់តម្លៃ សីលធម៌ និងកិត្តិយសស្ត្រីខ្មែរ៕ ដោយ៖កូឡាប
