អតីតនាយករដ្ឋមន្រ្តីអូស្រ្តាលី Tony Abbot បានអះអាងថា មន្រ្តីជាន់ខ្ពស់ម៉ាឡេស៊ីជឿជាក់ថា ការបាត់ខ្លួនរបស់ជើងយន្តហោះ MH370 គឺជាចេតនារបស់ប្រធានក្រុមអ្នកបើកក្នុងការសម្លាប់មនុស្ស។
នៅក្នុងអត្ថបទដកស្រង់ពី Sky News នៅថ្ងៃពុធនេះ លោក Abbot បានអះអាងថា គាត់ត្រូវបានគេប្រាប់ក្នុងសប្តាហ៍នេះថា ម៉ាឡេស៊ីជឿជាក់ថា ប្រធានក្រុមអ្នកបើកយន្តហោះមានចេតនាធ្វើឲ្យធ្លាក់យន្តហោះនោះ។
លោកថ្លែងថា “ការយល់ច្បាស់របស់ខ្ញុំពីមន្រ្តីជាន់ខ្ពស់ម៉ាឡេស៊ីគឺថា ពួកគេគិតថា វាគឺជាឃាតកម្មអត្តឃាតដោយជាចេតនារបស់អ្នកបើកយន្តហោះ”។
សូមបញ្ជាក់ថា ជើងយន្តហោះម៉ាឡេស៊ី MH370 បានបាត់ខ្លួនកាលពីថ្ងៃទី ៨ខែមីនា ឆ្នាំ ២០១៤មកម្លេះ។ មុនពេលបាត់ខ្លួន យន្តហោះនោះមានដឹកអ្នកដំណើរចំនួន ២៣៩នាក់ និងបានធ្វើដំណើរពីទីក្រុងកូឡាឡាំពួរ ឆ្ពោះទៅកាន់ទីក្រុងប៉េកាំង។
ប្រតិបត្តិការរុករកដឹកនាំដោយអូស្រ្តាលីបានស្វែងរកលើផ្ទៃក្រឡា ១២០.០០០គីឡូម៉ែត្រការ៉េ នៅក្នុងមហាសមុទ្រឥណ្ឌា ប៉ុន្តែមិនមានសញ្ញាអ្វីសោះ ហើយប្រតិបត្តិការត្រូវបានផ្អាកកាលពីខែមករា ឆ្នាំ ២០១៧។
ក្នុងឆ្នាំ ២០១៨ ក្រុមហ៊ុនរុករករបស់អាមេរិច ក៏បានធ្វើប្រតិបត្តិការស្វែងរកយន្តហោះដែលបាត់ខ្លួនផងដែរ ប៉ុន្តែវាបានបញ្ចប់ដោយគ្មានលទ្ធផលអ្វីទាំងអស់ ក្រោយពេលធ្វើការរុករកនៅបាត់សមុទ្រអស់រយៈពេលជាច្រើនខែ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
