ភ្នំពេញ៖ រដ្ឋមន្ត្រីក្រសួងទេសចរណ៍ បានស្នើសុំឲ្យគណៈមេធាវីកម្ពុជា ជួយដល់ក្រសួងលើការងារសំខាន់មួយចំនួន ដូចជា
ដូចជា ជួយប្រឹក្សាយោបល់ផ្នែកច្បាប់ដល់ក្រសួងទេសចរណ៍ក្នុងការដោះស្រាយ និងសម្របសម្រួលវិវាទទេសចរណ៍។
នាព្រឹកថ្ងៃទី១៩ ខែកុម្ភៈ ឆ្នាំ២០២០ នៅទីស្តីការក្រសួងទេសចរណ៍ លោកថោង ខុន រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយលោក សួន វិសាល ប្រធានគណៈមេធាវីកម្ពុជា ក្នុងគោលបំណងដើម្បីធានានូវសង្គតិភាព និងសុខដុមនីយកម្មនៃវិធានច្បាប់ ធានានូវនិត្យានុកូលភាព និងការដោះស្រាយសម្របសម្រួលវិវាទទេសចរណ៍ ការពង្រឹង និងបង្កើនល្បឿនអភិបាលកិច្ចល្អ ក្នុងទិសដៅចូលរួមចំណែកពង្រឹងនីតិរដ្ឋ និងលើកកម្ពស់វប្បធម៌នៃការគោរពច្បាប់ និងជំរុញការអនុវត្តន៍ច្បាប់។
លោករដ្ឋមន្ត្រីក្រសួងទេសចរណ៍ បានលើកឡើងអំពីស្ថានភាពភាពទេសចរណ៍សកលលោក តំបន់ និងទេសចរណ៍កម្ពុជា ពិសេសក្នុងដំណាក់កាលនៃវិបត្តិជំងឺ Covid-19 ដែលទាំងអស់គ្នាត្រូវរួមសាមគ្គីគ្នា ដោយគ្មានការរើសអើងចំពោះជនជាតិចិន ដើម្បីទប់ទល់នឹងវិបត្តិ និងចាត់វិធានការបន្ទាន់នានា ដើម្បីជំរុញសកម្មភាពទេសចរណ៍ និងស្រោចស្រង់ឧស្សាហកម្មទេសចរណ៍។
លោកថោង ខុន បានលើកឡើងពីការខិតខំរបស់ក្រសួង ក្នុងការពង្រឹងការគ្រប់គ្រង និងអនុវត្តច្បាប់ស្តីពីទេសចរណ៍ ដែលក្នុងនោះក៏សង្កេតឃើញមានបុគ្គលមួយចំនួន បានប្រព្រឹត្តសកម្មភាពល្មើសនឹងច្បាប់ និងលិខិតបទដ្ឋានគតិយុត្តទេសចរណ៍ ដូចជា ការលក់វត្ថុអនុស្សាវរីយ៍ក្លែងក្លាយដល់ទេសចរ និងការផ្សព្វផ្សាយព័ត៌មាន រូបភាព និងខ្លឹមសារអវិជ្ជមានពីទេសចរណ៍កម្ពុជា តាមបណ្តាញផ្សព្វផ្សាយសង្គម នានា ដែលខុសការពិត និងជាហេតុធ្វើឲ្យប៉ះពាល់ដល់កិត្យានុភាពជាតិ និងគោលនយោបាយទេសចរណ៍ជាតិ ក្នុងការទាក់ទាញទេសចរមកទស្សនាកម្ពុជា ឲ្យកាន់តែច្រើនថែមទៀត។
លោករដ្ឋមន្ត្រីក្រសួងទេសចរណ៍៍ បានស្នើសុំឲ្យគណៈមេធាវីកម្ពុជា ជួយដល់ក្រសួងលើការងារសំខាន់មួយចំនួន ដូចជា
ជួយប្រឹក្សាយោបល់ផ្នែកច្បាប់ដល់ក្រសួងទេសចរណ៍ ក្នុងការដោះស្រាយ និងសម្របសម្រួលវិវាទទេសចរណ៍ និងជួយរៀបចំបង្កើតច្បាប់ស្តីពីមគ្គុទ្ទេសក៍ទេសចរណ៍ ជួយសិក្សាភាពចន្លោះប្រហោងនៃច្បាប់ស្តីពីទេសចរណ៍ និងលិខិតបទដ្ឋានគតិយុត្តទេសចរណ៍។
លោកប្រធានគណៈមេធាវី បានឯកភាពទទួលយកនូវសំណើ របស់លោករដ្ឋមន្ត្រីក្រសួងទេសចរណ៍ ហើយថានឹងបន្តកិច្ចសហការល្អជាមួយក្រសួង ដើម្បីពង្រឹងការគ្រប់គ្រងវិស័យទេសចរណ៍ និងការអនុវត្តន៍ច្បាប់ស្តីពីទេសចរណ៍ឲ្យកាន់តែមានប្រសិទ្ធភាព៕ដោយ៖បញ្ញាស័ក្តិ