កណ្តាល៖ នគរបាលស្រុកខ្សាច់កណ្តាលបានចាប់ខ្លួនជនល្មើសម្នាក់ ពាក់ព័ន្ធករណីរំលោភសេពសន្ថវៈលើអនីតិជន ដែលកើតហេតុថ្ងៃទី១៧ ខែកុម្ភៈ ឆ្នាំ២០២០ វេលាម៉ោង ១២ នៅចំណុចភូមិព្រែកក្របៅទី១ ឃុំព្រែកអំពិល ស្រុកខ្សាច់កណ្តាល ខេត្តកណ្ដាល ។
នគរបាលមូលដ្ឋាន បានឲ្យដឹងថា ជនរងគ្រោះឈ្មោះ ស.ស.ល ភេទស្រី អាយុ ៧ ឆ្នាំជនជាតិខ្មែរ មុខរបរ សិស្ស មានទីលំនៅភូមិ-ឃុំកើតហេតុ ។ ចំណែកជនសង្ស័យ ឈ្មោះ ម៉ាច សុខជាតិ ភេទ ប្រុស អាយុ ១៦ឆ្នាំ ជនជាតិ ខ្មែរ មុខរបរសិស្ស មានទីលំនៅភូមិ-ឃុំកើតហេតុ(ឃាត់ខ្លួន) ។
នគរបាលស្រុកខ្សាច់កណ្តាល បានបញ្ជាក់ពីសភាពនៃរឿងហេតុនេះថា កាលពីអំឡុងខែ វិច្ឆិកា ២០១៩ វេលាម៉ោង ១៦:០០នាទី ឈ្មោះម៉ាច សុខជាតិ បានរំលោភសេពសន្ថវ:លើជនរងគ្រោះមួយលើករួចមកហើយ នៅចំណុចដីចំការរបស់ឈ្មោះ វ៉េង សាវុន នៅភូមិឃុំកើតហេតុ ។ បន្ទាប់មកនៅថ្ងៃទី១៧ កុម្ភៈ ២០២០ វេលាម៉ោង ១១:៥០ នាទី ជនរងគ្រោះ និងបងប្រុសរបស់ខ្លួន អាយុ១២ឆ្នាំ បានធ្វើដំណើរចេញពីសាលារៀនបឋមសិក្សា ព្រែកក្របៅ មកដល់មុខផ្ទះរបស់ឈ្មោះសុខ ភឺន ក៏ជួបនិងឈ្មោះម៉ាច សុខជាតិ ជិះម៉ូតូមកដល់ ហើយឈ្មោះម៉ាច សុខជាតិ ជិះឌុបជនរងគ្រោះ និងបងប្រុស ឆ្ពោះទៅផ្ទះ ។ ពេលទៅដល់ ជនរងគ្រោះបានផ្លាស់សម្លៀកបំពាក់រួច ឈ្មោះម៉ាច សុខជាតិ បាននិយាយបបួលជនរងគ្រោះ ទៅរកបេះផ្លែអំពិលទឹក។ ឮដូចនេះជនរងគ្រោះក៏ឡើងជិះម៉ូតូជាមួយឈ្មោះម៉ាច សុខជាតិ ពេលនោះឈ្មោះ វឿន វ៉េត ជាម្តាយរបស់ជនរងគ្រោះបានសួរឈ្មោះម៉ាច សុខជាតិ ថា អ្ហែងឌុបវាទៅណាអាវ៉ា ? ឈ្មោះម៉ាច សុខជាតិ បានឆ្លើយថា ខ្ញុំឌុបវាទៅបេះផ្លែអំពិលទឹក បន្ទាប់មកជនសង្ស័យ ក៏ជិះម៉ូតូឌុបជនរងគ្រោះចេញពីផ្ទះបាត់ទៅ ។ ដល់វេលាម៉ោង១២:០០នាទី ពេលជិះម៉ូតូឌុបជនរងគ្រោះទៅដល់ដីចំការចេករបស់ឈ្មោះវ៉េង សាវុន ហើយជនសង្ស័យបាននាំជនរងគ្រោះ ចូលទៅក្នុងដីចំការចេកនោះ បន្ទាប់មកជនសង្ស័យបានឲ្យជនរងគ្រោះដេកនៅលើស្មៅ ភ្លាមនោះជនសង្ស័យបានចាប់ជនរងគ្រោះនិងធ្វើសកម្មភាពរំលោភសេពសន្ថវៈលើជនរងគ្រោះតែម្តង ។ បន្ទាប់មកជនសង្ស័យបានបេះផ្លែអំពិលទឹកឲ្យជនរងគ្រោះ ក្រោយមកជនរងគ្រោះបានដើរមកផ្ទះតែម្នាក់ឯង លុះមកដល់ផ្ទះម្តាយជនរងគ្រោះមានការសង្ស័យក៏សួរនាំទើបជនរងគ្រោះឆ្លើយប្រាប់ការពិត ។ ឮដូច្នេះ ម្តាយរបស់ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រែកអំពិល។ សមត្ថកិច្ចបានឃាត់ខ្លួនជនសង្ស័យបញ្ជូនទៅអធិការដ្ឋាននគរបាលស្រុកខ្សាច់កណ្តាល ដើម្បីបន្តអនុវត្តតាមនីតិវិធី ៕ដោយ៖បញ្ញាស័ក្តិ
