ភ្នំពេញ៖ ស្ពានអាកាសថ្មើជើង គឺជាស្ពានមួយដែលផ្តល់ភាពងាយស្រួល សុវត្ថិភាពដល់ប្រជាពលរដ្ឋនិងជាពិសេសនោះគឺសិស្សសាលាតែម្តង ដែលចំណាយពេលសាងសង់ ដើម្បីភាពងាយស្រួលក្នុងការធ្វើដំណើរ។
ស្ពានថ្មើរជើងផ្សារដើមគរ ដែលមានបណ្ដោយប្រវែង២៧ម៉ែត និងទទឹងប្រវែង៣ម៉ែត លទ្ឋផលសម្រេចបាន ៨៥% និងអាចរួចរាល់នៅថ្ងៃទី៥ ខែមិនា ខាងមុខ ការដ្ឋាន នឹងត្រូវស្ទូចតម្លើងគ្រោងដែកតួស្ពាន នៅថ្ងៃទី១៩ខែកុម្ភៈឆ្នាំ២០២០ ចាប់ពីវេលាម៉ោង ២០និង០០នាទី យប់ ដល់ម៉ោង ៦និង០០ព្រឹក។
ដើម្បីសុវត្ថិភាពនិងបង្ការក្រែងមានគ្រោះថ្នាក់ដល់អ្នកដំណើរជាយថាហេតុការដ្ឋាននឹងបិទចរាចរឆ្លងកាត់ក្នុងរយៈពេលខាងលើ។ សូមបងប្អូនប្រជាពលរដ្ឋ មេត្តាពង្វាងចរាចរនៅទីតាំងការដ្ឋានតាមពេលវេលាខាងលើនៅស្តុបផ្សារដើមគរ ប្រសព្វរវាងមហាវិថី ម៉ៅសេទុង និងផ្លូវលេខ ៣៣៦ ក្នុងខណ្ឌទួលគោក ដោយសេចក្តីអនុគ្រោះ។
ក្នុងឱកាសនោះ មានលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោកឯក ឃុនឌឿន អភិបាលខណ្ឌទួលគោក និងលោកប្រធានក្រុមហ៊ុន បានចូលរួមផងដែរ។
ក្នុងឱកាសនោះដែរ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ការសង់សង់ស្ពានអាកាសថ្មើរជើងផ្សារដើមគរ ដែលមានបណ្ដោយប្រវែង២៧ម៉ែត្រ និងទទឹងប្រវែង៣ម៉ែត្រ គិតមកដល់ពេលនេះលទ្ធផលសម្រេចបាន ៨៥% ។
លោក សាំ ពិសិដ្ឋ បន្ថែមថា ដើម្បីសុវត្ថិភាព និងបង្ការក្រែងមានគ្រោះថ្នាក់ ដល់អ្នកដំណើរជាយថាហេតុ ការដ្ឋានបានបិទចរាចរណ៍ ឆ្លងកាត់មួយរយៈកាលពីយប់មិញ នៅស្តុបផ្សារដើមគ ប្រសព្វរវាងមហាវិថីម៉ៅសេទុង និងផ្លូវលេខ ៣៣៦ ក្នុងខណ្ឌទួលគោក។
លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បានថ្លែងថា មន្ទីរសាធារណការនិងដឹកជញ្ជូនរាជធានីភ្នំពេញ ដែលជាសេនាធិការរបស់រដ្ឋបាលរាជធានីភ្នំពេញ បាននិងកំពុងលើកដែកផ្លូវថ្មើរជើង ឆ្លងកាត់ផ្លូវក្បែរផ្សារដើមគ ដើម្បីរៀបចំជាសមិទ្ធផលការងាររបស់យើង ដែលយើងខិតខំធ្វើនាពេលកន្លងមក និងធ្វើយ៉ាងម៉េចឲ្យបានលឿន និងបញ្ចប់ការស្ថាបនាផ្លូវអាកាសថ្មើរជើងនេះ ឲ្យមុនថ្ងៃទី៨ខែមីនា ។
គួរំលឹកផងដែរកាលពីរសៀលថ្ងៃទី១៨ ខែ កញ្ញា ឆ្នាំ២០១៩ មន្ទីរសាធារណការ រាជធានី ភ្នំពេញ បានសរសេរលើ ទំព័រ ហ្វេស ប៊ុក ផ្លូវការ ថា ៖ «រដ្ឋបាលរាជធានីភ្នំពេញ បាននិងកំពុងរៀបចំសាងសង់ស្ពានថ្មើរជើងចំនួន ២ទីតាំង គឺនៅភ្លើងស្តុបសន្ធរម៉ុក និងភ្លើងស្តុបផ្សារដើមគរ សម្រាប់សិស្សានុសិស្ស អាជីវករ និងប្រជាពលរដ្ឋធ្វើដំណើរឆ្លងកាត់ផ្លូវ»។
សូមបញ្ជាក់ថា បច្ចុប្បន្ននៅរាជធានីភ្នំពេញមានស្ពាន ថ្មើរជើងនេះ នៅជម្ពូវ័ន្ត ផ្លូវជាតិលេខ៤ និង នៅចំណុចភ្លើងស្តុបរង្វង់មូលនាង គង្ហីងដោយជោគជ័យ។
គួរបញ្ជាក់ផងដែរ រដ្ឋបាលរាជធានីភ្នំពេញបានសហការជាជាមួយក្រុមហ៊ុនវិនិយោគទុនអាណិកជនកម្ពុជា OCIC ដើម្បីចាប់ផ្តើមសាងសង់ស្ពានអាកាសថ្មើរជើងនៅជុំវិញស្តុបផ្សារដើមគរ ក្នុងមូលដ្ឋានខណ្ឌទួលគោក ដើម្បីសម្រួលដល់ការធ្វើដំណើរថ្មើរជើងឆ្លងកាត់ទីតាំងភ្លើងស្តុបមិនប៉ះពាល់ចរាចរនិងធានាបានសុវត្ថិភាព៕ ដោយ៖កូឡាប
