ខេត្តស្វាយរៀង៖ មានហេតុការណ៍ភ្ញាក់ផ្អើលមួយកើតឡើង កាលពីវេលាម៉ោង១០:២០ព្រឹកថ្ងៃទី១៩ ខែកុម្ភៈ ឆ្នាំ២០២០ ដោយប្រជាពលរដ្ឋបានប្រទះឃើញសពបុរម្នាក់ អណ្តែតទឹកមានចងដែកលួស នៅចង្កេះជាមួយនឹងកង់ ក្បែរគល់ស្ពានតាហោ ដែលស្ថិតភូមិក្បាលស្ពាន សង្កាត់ពោធិ៍តាហោ ក្រុងស្វាយរៀង ខេត្តស្វាយរៀង។
ជាជំហានដំបូងសមត្ថកិច្ចមិនទាន់កំណត់បានថា ជាករណីអ្វីពិតប្រាកដនោះទេ ដោយសមត្ថកិច្ចសន្និដ្ឋានបឋម គឺជនរងគ្រោះ អាចជិះកង់ធ្លាក់ចូលទឹកទន្លេស្លាប់តែម្តង។
យោងតាមសមត្ថកិច្ចបានឲ្យដឹងថា ក្រោយពីមានប្រជាពលរដ្ឋបានរាយការណ៍មកថា បានប្រទះឃើញសាកសពបុរសម្នាក់ ស្លាប់អណ្តែតទឹកនៅចំណុចខាងកើត ស្ពានពោធិ៍តាហោនោះ និងក្រោយពីទទួលបានព័ត៌មាន កម្លាំងជំនាញអធិការរដ្ឋាន ប៉ុស្តិ៍រដ្ឋបាល កម្លាំងជំនាញការិយាល័យខេត្ត និងវេជ្ជបណ្ឌិត យក់ ពុធវិសាល ចុះទៅដល់កន្លែងកើតហេតុធ្វើការត្រួតពិនិត្យលើសាកសព។
ប្រភពបានបន្តទៀតថា តាមការបញ្ជាក់ពីក្រុមគ្រួសារនៃសព សពមានឈ្មោះ ឌុន ចំរើន អាយុ២៨ឆ្នាំ មានទីលំនៅភូមិស្វាយចេក ឃុំស្វាយចេក ស្រុករំដួល ខេត្តស្វាយរៀង។ ឌុន ចំរើន នេះជាមនុស្សមានសតិមិនគ្រប់ បានចេញពីផ្ទះកាលពីថ្ងៃទី១៧ ខែកុម្ភៈ ឆ្នាំ២០២០ បាត់រហូតមកដល់ថ្ងៃទី១៩ ទើបបានក្រុមគ្រួសារទទួលព័ត៌មានថា មានមនុស្សស្លាប់អណ្តែតទឹក ទើបនាំមកមើលបានដឹងអត្តសញ្ញាណនៃសព។
យោងតាមការសន្និដ្ឋានរបស់កម្លាំងជំនាញ និងលោកវេជ្ជបណ្ឌិត គឺ សពស្លាប់ដោយសារលង់ទឹក។ បច្ចុប្បន្ន សពត្រូវបានសមត្ថកិច្ចធ្វើកំណត់ហេតុ និងប្រគល់ជូនគ្រួសារផងដែរ៕ ដោយ៖វ៉ៃកូ