ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍លេីកឡេីងថា អភិបាលខេត្តទាំងអស់មិនត្រូវចាត់ទុកខ្លួនជាខ្សែបណ្ដោយ ឫជាអង្គភាពចំណុះឱ្យក្រសួងមហាផ្ទៃនោះឡើយ ដែលចំណុចនេះមិនត្រូវទៅនឹងច្បាប់ដែលចែងនាពេលកន្លងមកនោះទេ។
ក្នុងពិធីបូកសរុបលទ្ធផលនៃអង្គសន្និបាតរបស់ក្រសួងមហាផ្ទៃឆ្នាំ២០១៩ នាទីស្ដីការក្រសួងមហាផ្ទៃ នៅថ្ងៃទី២០ ខែកុម្ភៈ ឆ្នាំ២០២០ សម្ដេចក្រឡាហោម ស ខេង បានបញ្ជាក់ថា អភិបាលខេត្តនីមួយៗត្រូវធ្វើជាតំណាងឱ្យរាជរដ្ឋាភិបាល និងក្រសួងពាក់ព័ន្ធក្នុងការងារសន្តិសុខ សណ្ដាប់ធ្នាប់សាធារណៈ ក្នុងដែនសមត្ថកិច្ចរបស់ខ្លួន។ ជាពិសេសអភិបាលខេត្ត ត្រូវទទួលខុសត្រូវចំពោះរាជរដ្ឋាភិបាលក្រសួងមហាផ្ទៃ និងស្ថាប័នពាក់ព័ន្ធនានា។
សម្ដេចក្រឡាហោមបន្តថា អភិបាលខេត្តត្រូវទទួលជួបរដ្ឋមន្ត្រី ពីព្រោះរដ្ឋមន្ត្រីជាតំណាងរាជរដ្ឋាភិបាលទៅលើវិស័យទាំងអស់។ សម្ដេចបន្ថែមថា នៅក្នុងតួនាទីជាតំណាងរាជរដ្ឋាភិបាល ក្រសួង ស្ថាប័ននានា អភិបាលខេត្តត្រូវមានគណនេយ្យភាពចំពោះរាជរដ្ឋាភិបាល ដេីម្បីឱ្យការងារទាំងនោះប្រកបដោយភាពរលូន។
ជាងនេះទៅទៀត សម្ដេចក្រឡាហោម ស ខេង ក៏បានរំលឹកដែរថា អភិបាលខេត្តនីមួយៗមានសិទ្ធិគ្រប់គ្រងកិច្ចការទាំងអស់នៅក្នុងដែនសមត្ថកិច្ចរបស់ខ្លួន។ លេីសពីនេះទៅទៀត អភិបាលខេត្តត្រូវមានគណនេយ្យភាពរបស់ប្រជាពលរដ្ឋ និងមានគណនេយ្យភាពចំពោះរាជរដ្ឋាភិបាល។
ក្នុងឱកាសអញ្ជើញបិទសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងមហាផ្ទៃ សម្ដេចតេជោ ហ៊ុន សែន បានសង្កត់ធ្ងន់ថា មានការផ្លាស់ប្ដូរណាមួយនៅថ្នាក់ក្រោមជាតិ ត្រូវជ្រើសរើសមន្ដ្រីក្នុងមូលដ្ឋានតែម្ដង ដើម្បីជាការលើកទឹកចិត្ត និងបំបាត់ភាពច្រណែន ឬភាពរញ៉ែរញ៉ៃ។
សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ខ្ញុំនៅតែទទូចមិនឲ្យបោះមន្ដ្រីថ្នាក់ជាតិ ចុះទៅដណ្ដើមកន្លែងមន្ដ្រីថ្នាក់មូលដ្ឋាន កុំឲ្យបោះពីលើ ទុកឱកាសឲ្យខាងមូលដ្ឋានគេរៀបចំមន្ដ្រីគេ លើកនេះខ្ញុំនិយាយឲ្យបានច្បាស់ជាចំហរ អំពីការមិនយកថ្នាក់ជាតិ ទៅដណ្ដើមកន្លែងរបស់មន្ដ្រីនៅមូលដ្ឋាន»។
បើតាមប្រសាសន៍របស់សម្ដេចតេជោ ហ៊ុន សែន កន្លងទៅសម្ដេចសង្កេតឃើញថា មន្ដ្រីមួយចំនួនបានមកសំងំធ្វើការនៅថ្នាក់ជាតិ ដើម្បីបានបុណ្យស័ក្ដិធំ រួចទៅដណ្ដើមតំណែង មន្ដ្រីនៅថ្នាក់មូលដ្ឋាន។ សម្ដេចក៏បានលើកឧទាហរណ៍ជាក់ស្ដែង នៅខេត្ដស្វាយរៀង មានការស្នើដាក់មន្ដ្រីយោធាម្នាក់ ទៅធ្វើជាអភិបាលរងខេត្ត ប៉ុន្ដែត្រូវសម្ដេចបដិសេធមិនចុះហត្ថលេខានោះទេ។
សម្ដេចតេជោ ហ៊ុន សែន បានបង្ហាញនូវជំនឿជឿជាក់ថា ការសម្រេចចិត្តបែបនេះ នឹងធ្វើឲ្យមន្ដ្រីនៅថ្នាក់ក្រោមជាតិសប្បាយចិត្ត និងមានកម្លាំងចិត្តដើម្បីធ្វើការងារ។
សម្ដេចតេជោនាយករដ្ឋមន្ដ្រី បានគូសបញ្ជាក់ថា ការតែងតាំងមន្ដ្រីណាម្នាក់នៅថ្នាក់ក្រោមជាតិ ត្រូវតែមានការឯកភាពគ្នារវាងក្រុមប្រឹក្សា និងគណៈអភិបាល ដើម្បីដាក់មករដ្ឋមន្ដ្រីក្រសួងមហាផ្ទៃ ប៉ុន្ដែការស្នើតែងតាំងនេះ ក៏ត្រូវតែយោងទៅលើសំណូមពរចាំបាច់នៅមូលដ្ឋាន។ សម្ដេចតេជោអះអាងថា ការដែលធ្វើបែបនេះ គឺដើម្បីរដ្ឋបាលដំណើរការល្អ គ្មានការបែកបាក់។ សម្ដេចតេជោ ហ៊ុន សែន បានគូសរំលេចថា ការដែលត្រូវតែឯកភាពគ្នារវាងប្រធានក្រុមប្រឹក្សា និងអភិបាលខេត្ត ដើម្បីធ្វើការតែងតាំង មន្ដ្រីណាមួយ គឺជាការលុបបំបាត់មន្ដ្រីឡេមឡឺមតែងតែរត់ទៅអែបអ្នកនេះអ្នកនោះ ដែលមានសិទ្ធិស្នើតែងតាំងដើម្បីបានតំណែង។ សម្តេចតេជោ បន្ថែមថា ពេលនេះមិនមែនជាពេល អន្តរាគមន៍ដើម្បីតួនាទីនោះទេ គឺជាពេលមើលប្រសិទ្ធភាពការងារ។
សម្តេចតេជោ ហ៊ុន សែន បានព្រមានយ៉ាងដូច្នេះថា៖ «សូមឱ្យយកចិត្តទុកដាក់រវាងគណៈអភិបាល និងក្រុមប្រឹក្សា។ ខ្ញុំបានទទួលព័ត៌មាន ខ្ញុំសូមប្រាប់អភិបាលខេត្តទាំងអស់ សម័យប្រជុំក្រុមប្រឹក្សា និងគណៈអភិបាល គឺអភិបាលខេត្ត/រាជធានី មិនត្រឹមអវត្តមាន បើអវត្តមានតែ៣ដង ខ្ញុំដកចេញពីតំណែង ដាច់ខាតត្រូវតែដកហើយ»។
សម្តេចតេជោ ហ៊ុន សែន បានបង្គាប់ឱ្យសម្តេចក្រឡាហោម តាមដានរឿងនេះ។ សម្តេចតេជោ ហ៊ុន សែន ក៏បានកំណត់ឱ្យយកថ្ងៃព្រហស្បតិ៍ នៃសប្តាហ៍ទី៤ ក្នុងខែនីមួយ ដើម្បីប្រជុំរវាងក្រុមប្រឹក្សា និងគណៈអភិបាល គឺមុនកិច្ចប្រជុំគណៈរដ្ឋមន្ត្រីដែលធ្វើឡើងថ្ងៃសុក្រ មួយថ្ងៃផងដែរ ហើយសម្តេចបានជំរុញឱ្យ អភិបាលរាជធានី-ខេត្ត និងក្រុមប្រឹក្សារាជធានី-ខេត្ត ធ្វើការជាមួយគ្នាប្រកបដោយគណនីភាពផងដែរ។ សម្តេចបញ្ជាក់៖ «ខ្ញុំហាមដាច់ខាតអភិបាលខេត្តរាជធានី ត្រូវធ្វើគណនីភាពជាមួយក្រុមប្រឹក្សា»។
សម្តេចបានបន្តថា បើមិនដោះស្រាយបញ្ហានេះ នឹងមានបញ្ហាបែកបាក់។ បទបញ្ជារបស់សម្តេចនេះ មិនខុសពីច្បាប់ទេ
សម្តេចតេជោ ហ៊ុន សែន បានប្រកាសប្រាប់ដល់អភិបាលខេត្ត ក្រុងទាំងអស់ មិនត្រូវមើលស្រាលក្រុមប្រឹក្សារបស់ខ្លួននោះទេ។ សម្តេចថ្លែងថា ប្រធានក្រុមប្រឹក្សាសម្តេចពិបាកដក ប៉ុន្តែបើអភិបាលខេត្តសម្តេចងាយស្រួលដកជាង។ បើចៅហាយស្រុក អភិបាលខ
ណ្ឌ ដកត្រឹមតែ១៥នាទីប៉ុណ្ណោះ។
សម្តេចបានលើកឡើងថា៖ មន្ត្រីលេមលើម តែងតែរត់ទៅកៀកអ្នកដែលមានសិទ្ធិតែងតាំង។ ដូច្នេះប្រធានក្រុមប្រឹក្សា និងអភិបាលត្រូវធ្វើការជាមួយគ្នាលើការតែងតាំងមន្ត្រី។ សម្តេចបានលើកឡើងថា កន្លងទៅមានការទៅអេបអបអភិបាលខេត្ត ដើម្បីទទួលបានតែងតាំង បានបង្កឱ្យមានការបែកបាក់។
សម្តេចតេជោ ហ៊ុន សែន ក៏ព្រមានផងដែរដោយមិនឱ្យមានការតែងតាំងមន្ត្រីថ្នាក់ជាតិ ទៅដឹកនាំមន្ត្រីមូលដ្ឋាន ដោយទុកឱកាសឱ្យខាងមូលដ្ឋានរៀបចំមន្ត្រីរបស់គេ។ សម្តេចមិនឱ្យមន្ត្រីថ្នាក់ជាតិទៅដណ្តើមតំណែងនៅថ្នាក់មូលដ្ឋានតទៅទៀតទេ។ សម្តេចបានលើកជាឧទាហរណ៍ថា បើចៅហ្វាយខេត្តចាកចេញពីតំណែង ត្រូវរើសអភិបាលរងម្នាក់ ហើយពេលខ្វះអភិបាលរងត្រូវតែយកអភិបាលស្រុកមកកាន់តំណែងជំនួស៕ ដោយ៖កូឡាប
