បាត់ដំបង៖ នគរបាលខេត្តបាត់ដំបង នឹងរៀបចំសំណុំរឿងជនស័ង្សយម្នាក់ និងវត្ថុតាង គ្រឿងញៀនប្រភេទមេតំហ្វេតាមីនម៉ាទឹកកកICEទម្ងន់សរុប២៧៧,៨៧ក្រាម និងថ្នាំគ្រាប់ចំនួន១៤២គ្រាប់ ទៅសាលាដំបូងខេត្តបាត់ដំបង ចាត់ការតាមផ្លូវច្បាប់។
កាលពីថ្ងៃ ២០ ខែ កុម្ភ: ឆ្នាំ ២០២០ អនុវត្តតាមមតិដឹកនាំរបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចមតិណែនាំការងារជំនាញពី លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿងញៀននៃស្នងការដ្ឋាន លោកវរសេនីយ៍ឯក ផង់ សុភាព អធិការនគរបាលស្រុកថ្មគោល ដឹកនាំបង្រ្កាបករណីគ្រឿងញៀនខុសច្បាប់ ក្នុងមូលដ្ឋានភូមិគោកឃ្មុំ ឃុំគោកឃ្មុំ ស្រុកថ្មគោល ខេត្តបាត់ដំបង បាន ចំនួន០២ករណី ដោយធ្វើការឃាត់ខ្លួនជនសង័្សយចំនួន១នាក់ ឈ្មោះ វង្ស បេឡា ភេទប្រុស អាយុ៣៧ឆ្នាំ ភូមិគោកឃ្មុំ ឃុំគោកឃ្មុំ ស្រុកថ្មគោល ខេត្តបាត់ដំបង។
វត្ថុតាងចាប់យកបានរួមមាន៖ ថ្នាំគ្រាប់មានរាងមូលសំប៉ែតពណ៌ផ្កាឈូមានអក្សរ (WY) នៅចំហៀង ចំនួន០៨គ្រាប់ សង័្សយជាគ្រឿងញៀនប្រភេទមេតំហ្វេតាមីនយ៉ាម៉ា ។ ម្សៅក្រាមពណ៌សថ្លាច្រកក្នុងថង់ប្លាស្ទិចសង័្សយជាគ្រឿងញៀន ប្រភេទមេតំហ្វេតាមីនម៉ាទឹកកកICE ចំនួន១ថង់តូច។
ស្នងការដ្ឋាននគរបាលបាត់ដំបង បានឲ្យដឹងថា ផ្តើមចេញពីករណីនេះ សមត្ថកិច្ចនគរបាលបានធ្វើការស្រាវជ្រាវជាបន្ទាន់ និងឈានទៅរកបក្ខពួកផ្សេងទៀតប៉ុន្តែ មុខ សញ្ញាបានគេចខ្លួនបាត់ដោយបន្សល់ទុកវត្ថុតាងរួមមាន៖ ម្សៅក្រាមពណ៌សថ្លាច្រកក្នុងថង់ប្លាស្ទិកចំនួន៧ថង់ធំ ចំនួន០៥ថង់តូច ចំនួន០២ថង់ មានទម្ងន់សរុប២៧៧,៨៧ក្រាម ដែលសង្ស័យជាសាធាតុញៀនប្រភេទមេតំហ្វេតាមីនម៉ាទឹកកកICE ។ ថ្នាំគ្រាប់មានរាងមូលសំប៉ែតពណ៌ផ្កាឈូកមានអក្សបរទេស (WY) នៅចំហៀងចំនួន១៤២គ្រាប់សង្ស័យ ជាគ្រឿងញៀន ប្រភេទមេតាំហ្វេតាមីនយ៉ាម៉ា ម៉ូតូម៉ាកហុងដាឌ្រីមពណ៌ខ្មៅ ស៊េរីឆ្នាំ២០១៣ ពាក់ផ្លាកលេខបាត់ដំបង ១F ១៨៣៥ ចំនួន០១គ្រឿង កាំបិតចំនួន០១ ជញ្ជីងថ្លឹងថ្នាំញៀនចំនួន០១។
ជនសង្ស័យរួមជាមួយវត្ថុតាង នគរបាលស្រុកបញ្ជូនមកការិយាល័យជំនាញ ដើម្បីធ្វើការស្រាវជ្រាវបន្ត ក្នុងករណីការធ្វើកោសល្យវិច័យ លើភស្តុតាងទាំងនោះ ថាពិតជាគ្រឿងញៀនខុសច្បាប់មែននោះ សមត្ថកិច្ចនគរបាលនឹងរៀបចំសំណុំរឿងជនស័ង្សយ និងវត្ថុតាង ទៅសាលាដំបូងខេត្តបាត់ដំបង ចាត់ការតាមផ្លូវច្បាប់៕ដោយ៖កូឡាប