ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា មានប្រសាសន៍ថា គណៈបញ្ជាការឯកភាពគ្រប់ថ្នាក់ ត្រូវបន្ដជំរុញការអនុវត្តគោលនយោបាយ ភូមិ-ឃុំ មានសុវត្ថិភាព ឲ្យកាន់តែសកម្មផុលផុស ដើម្បីបំផុសចលនាប្រជាជនឲ្យចូលរួមជាមួយអាជ្ញាធរ ដើម្បីទប់ស្កាត់បទល្មើសផ្សេងៗ។
ក្នុងពិធីបិទ សន្និបាតត្រួតពិនិត្យការងារ ឆ្នាំ២០១៩ និងលើកទិសដៅការងារ ឆ្នាំ២០២០ របស់ក្រសួងមហាផ្ទៃ នៅទីស្ដីការក្រសួងមហាផ្ទៃ នារសៀលថ្ងៃទី២០ ខែកុម្ភៈ ឆ្នាំ២០២០ សម្ដេចតេជោ ហ៊ុន សែន បានអះអាងថា ធ្វើយ៉ាងណាឲ្យ ភូមិ-ឃុំ មានសុវត្ថិភាពជូនប្រជាពលរដ្ឋ គ្រប់ពេលវេលាផងដែរ។
សម្ដេចតេជោ មានប្រសាសន៍ថា “គណៈបញ្ជាការឯកភាពគ្រប់ថ្នាក់ ត្រូវបន្ដជំរុញការអនុវត្តគោលនយោបាយ ភូមិ-ឃុំ មានសុវត្ថិភាពឲ្យកាន់តែសកម្មផុលផុស ដើម្បីបំផុសចលនាប្រជាជនឲ្យចូលរួមជាមួយអាជ្ញាធរ កងកម្លាំងមានសមត្ថកិច្ច ក្នុងការបង្ការ ទប់ស្កាត់ បង្រ្កាបគ្រឿងញៀនខុសច្បាប់ ចោរកម្ម ឃាតកម្ម អំពើប្លន់ប្រដាប់អាវុធ ល្បែងស៊ីសង ការជួញដូរមនុស្ស អាជីវកម្មផ្លូវភេទ ការកាប់ឈើខុសច្បាប់ ការទន្ទ្រានកាន់កាប់ដីធ្លីខុសច្បាប់ បទល្មើសនេសាទខុសច្បាប់ អាជីវកម្មរ៉ែខុសច្បាប់ អាជីវកម្មខ្សាច់ខុសច្បាប់ និងប៉ុស្ដិ៍ត្រួតពិនិត្យខុសច្បាប់ ជាដើម”។
ជាងនេះទៅទៀត សម្ដេចតេជោ ហ៊ុន សែន លើកឡើងថា អំពីកំណែទម្រង់រដ្ឋបាលថ្នាក់ក្រោមជាតិក្រសួមហាផ្ទៃ ត្រូវបន្ដខិតខំសហការសម្របសម្រួល ជាមួយកម្មវិធីកំណែទម្រង់នានា និងក្រសួង ស្ថាប័នពាក់ព័ន្ធ ធ្វើការផ្ទេរធនធានហិរញ្ញវត្ថុទ្រព្យសម្បត្តិ ហើយនីតិវិធីនានាសម្រាប់ការងារនេះ ត្រូវស្របតាមប្រព័ន្ធវិមជ្ឈការ សំដៅធានាឲ្យរចនាសម្ព័ន្ធ និងប្រព័ន្ធគ្រប់គ្រង រដ្ឋបាលក្រុង-ស្រុក-ខណ្ឌ ដែលត្រូវបានរៀបចំឡើងវិញ ដំណើរការដោយរលូន មានប្រសិទ្ធភាព ដើម្បីធានាឲ្យថ្នាក់រដ្ឋបាលទាំងនេះ អនុវត្តមុខងារនានាជាច្រើន ដែលបានផ្ទេរទៅឲ្យរដ្ឋបាលថ្នាក់ក្រោមជាតិ ព្រមទាំងការពង្រឹងសមត្ថភាព និងការផ្ដល់ការគាំទ្រផ្នែកបច្ចេកទេស ដល់រដ្ឋបាល ឃុំ-សង្កាត់ ក្នុងការចាត់ចែងប្រើប្រាស់ថវិកាដែលបានបង្កើនសម្រាប់ការ អភិវឌ្ឍមូលដ្ឋាន ប្រកដោយតម្លាភាព គណនេយ្យភាព និងមានប្រសិទ្ធភាពខ្ពស់។
សម្ដេចតេជោ គូសបញ្ជាក់ថា រាជរដ្ឋាភិបាលបន្ដធ្វើការតាំងចិត្តខាងនយោបាយយ៉ាងមុតមាំ ក្នុងការបន្ដផ្ទេរមុខងារ និងធនធានដល់រដ្ឋបាលថ្នាក់ក្រោមជាតិ ដើម្បីរដ្ឋបាលថ្នាក់ក្រោមជាតិលើកកម្ពស់ភាពជាម្ចាស់ ប្រកបដោយភាពច្នៃប្រឌិតក្នុងការចាត់ចែងប្រើប្រាស់មុខងារ និងធនធានដែលបានផ្ទេរ ដើម្បីឆ្លើយតបតម្រូវការរបស់ប្រជាពលរដ្ឋនៅតាមមូលដ្ឋាន សំដៅជំរុញ លើកទឹកចិត្ត លើកកម្ពស់ការចូលរួមរបស់ប្រជាពលរដ្ឋ ក្នុងការអភិវឌ្ឍតាមមូលដ្ឋានរៀងៗខ្លួន។
សម្ដេចបន្ថែមថា បន្ដខិតខំយកចិត្តទុកដាក់ធ្វើការបណ្ដុះបណ្ដាល កសាងសមត្ថភាពដល់មន្ដ្រីរាជការស៊ីវិល កងកម្លាំងនគរបាលជាតិ និងមន្ដ្រីនៅរដ្ឋបាលថ្នាក់ក្រោមជាតិ ដើម្បីផ្ដល់នូវជំនាញវិជ្ជាជីវៈ ចំណេះដឹង និងចំណេះធ្វើជាក់ស្ដែងថ្មីៗ ស្របតាមការវិវត្តរីកចម្រើននៃសង្គមជាតិ ដើរទន្ទឹមនឹងការពង្រឹងវិន័យសីលធម៌វិជ្ជាជីវៈរបស់មន្ដ្រីគ្រប់ៗរូប សំដៅលើកកម្ពស់សមត្ថភាពប័ន ក្នុងការផ្ដល់សេវាសាធារណៈជូនប្រជាពលរដ្ឋ ទាំងសេវាសង្គម សេវារដ្ឋបាល សេវាសន្ដិសុខ និងសេវាសាធារណៈចាំបាច់ជាមូលដ្ឋាន ដែលពាក់ព័ន្ធជីវភាពប្រចាំថ្ងៃរបស់ប្រជាពលរដ្ឋ ប្រកបដោយតម្លាភាព គណនេយ្យភាព និងមានប្រសិទ្ធភាពខ្ពស់។
ឆ្លៀតឱកាសនោះដែរ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា លើកឡើងទៀតថា ដើម្បីពង្រឹងទំនាក់ទំនងផ្សារភ្ជាប់ រវាងរដ្ឋាភិបាលជាមួយប្រជាពលរដ្ឋគ្រប់មជ្ឈដ្ឋាន នៅតាមមូលដ្ឋាន ក្នុងនាមរាជរដ្ឋាភិបាល សម្ដេច ជំរុញលើកទឹកចិត្តដល់ក្រុមការងាររាជរដ្ឋាភិបាល ចុះមូលដ្ឋានគ្រប់ថ្នាក់ ត្រូវបង្កើនសកម្មភាពចុះមូលដ្ឋាន ដើម្បីផ្សារភ្ជាប់ ស្វែងយល់សុខទុកជុំវិញជីវភាពប្រចាំថ្ងៃ របស់ប្រជាពលរដ្ឋតាមមូលដ្ឋាននានា សំដៅចូលរួមដោះស្រាយបញ្ហាប្រឈម សំណើរសំណូមពរនានារបស់ប្រជាពលរដ្ឋ ឲ្យបានសមស្រប និងទាន់ពេលវេលាផងដែរ៕ដោយ៖បញ្ញាស័ក្តិ