កណ្ដាល៖ នគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ដកណ្ដាល ក្រោមការបញ្ជាដោយផ្ទាល់ពីលោកឧត្ដមសេនីយ៍ត្រី ឈឿន សុចិត្ដ ស្នងការនគរបាលខេត្ដកណ្ដាល និងមានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្ដ បើកប្រតិបត្តិការស៊ើបអង្កេតស្រាវជ្រាវ រហូតចាប់ខ្លួនជនសង្ស័យម្នាក់ ក្នុងករណីគំរាមកំហែងហែកកេរ្ដិ៍ និងចែកចាយរូបអាក្រាតកាយជាសាធារណៈ ដែលការចាប់ខ្លួននេះ ធ្វើឡើងនៅត្រង់ចំណុចក្នុងរោងចក្រមួយកន្លែង ស្ថិតក្នុងភូមិព្រែកជ្រៃ សង្កាត់ដង្កោ ខណ្ឌដង្កោ រាជធានីភ្នំពេញ កាលពីរសៀលថ្ងៃទី២០ ខែកុម្ភៈ ឆ្នាំ២០២០។
មន្ដ្រីនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ដកណ្ដាល បានឲ្យដឹងថា ជនសង្ស័យឈ្មោះ អ៊ឹម អូន ភេទប្រុស អាយុ៤០ឆ្នាំ បច្ចុប្បន្នស្នាក់នៅផ្ទះជួល ទល់មុខរោងចក្រព្រែកជ្រៃ ស្ថិតនៅភូមិព្រែកជ្រៃ សង្កាត់ដង្កោ ខណ្ឌដង្កោ រាជធានីភ្នំពេញ។ ចំណែកនារីរងគ្រោះមានអាយុ២២ឆ្នាំ មានទីលំនៅភូមិកោះខ្នុរ ឃុំព្រែករកា ស្រុកកណ្តាលស្ទឹង ខេត្តកណ្តាល។
ប្រភពដដែលបន្ដថា កាលពីអំឡុងឆ្នាំ២០១៧ នារីរងគ្រោះ បានស្គាល់និងធ្វើការក្នុងរោងចក្រជាមួយជនសង្ស័យ នៅភូមិព្រែកជ្រៃ សង្កាត់ដង្កោ ខណ្ឌដង្កោ រាជធានីភ្នំពេញ។
ក្រោយមកនារីរងគ្រោះ និងជនសង្ស័យក៏មានទំនាក់ទំនងស្នេហាជាមួយគ្នា រហូតបានរួមរស់ជាមួយគ្នា ហើយជនសង្ស័យតែងតែថតរូបអាក្រាតកាយរបស់នារីរងគ្រោះទុកក្នុងទូរស័ព្ទដៃរបស់ខ្លួនជានិច្ច។ លុះមកដល់ឆ្នាំ២០១៩ នារីរងគ្រោះបានដឹងថា ជនសង្ស័យមានប្រពន្ធ និងមានកូនពីរនាក់ទៀត ទើបនាងសុំបែកគ្នា ប៉ុន្តែជនសង្ស័យមិនព្រមទេ ថែមទាំងនិយាយគំរាមកំហែងថា មិនរៀបការទេ បើហ៊ានរៀបការ ខ្លួននឹងធ្វើឲ្យខូចកេរ្តិ៍ឈ្មោះតែម្ដង។ រហូតមកដល់ថ្ងៃទី២៧ ខែធ្នូ ឆ្នាំ២០១៩ នារីរងគ្រោះបានភ្ជាប់ពាក្យជាមួយគូរដណ្ដឹងរបស់ខ្លួន ខណៈភ្ជាប់ពាក្យបាន២ថ្ងៃ ជនសង្ស័យក៏បានឆាតប្រាប់ទៀតថា មិនឲ្យរៀបការទេ បើមិនដូច្នោះ ខ្លួននឹងធ្វើឲ្យនាង ត្រូវសងបណ្ណាការគេ និងគំរាមសម្លាប់ជាច្រើនលើកច្រើនសារ បន្ទាប់មកជនសង្ស័យបានផ្ញើរូបអាក្រាតកាយរបស់នារីរងគ្រោះ ដែលធ្លាប់ដេកជាមួយខ្លួន ទៅគូរដណ្តឹង និងបងប្អូនជាច្រើននាក់ទៀត រហូតទាល់តែខាងគូរដណ្តឹងរបស់នារីរងគ្រោះ បានសុំផ្តាច់ពាក្យនៅថ្ងៃទី៥ ខែកុម្ភៈ ឆ្នាំ២០២០ ដោយមិនព្រមរៀបការជាមួយនារីរងគ្រោះឡើយ ទោះបីជាជិតដល់ថ្ងៃរៀបការនៅថ្ងៃទី២១ ខែកុម្ភ: ឆ្នាំ២០២០នេះក៏ដោយ។
ប្រភពដដែលបន្ដទៀតថា ដោយមានភាពអាម៉ាស់ និងត្រូវសងថ្លៃបណ្ដាការទៅខាងគូរដណ្ដឹង ក្រោយពីគូរដណ្ដឹងសុំផ្ដាច់ពាក្យ នារីរងគ្រោះក៏បានដាក់ពាក្យបណ្ដឹង ប្ដឹងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ដកណ្ដាល ដើម្បីជួយអន្ដរាគមន៍ចាប់ខ្លួនជនសង្ស័យខាងលើយកមកចាត់ការតាមច្បាប់។ បន្ទាប់ពីនគរបាលជំនាញការិយាល័យព្រហ្មទណ្ឌកម្រិតស្រាលទទួលបានពាក្យបណ្ដឹងពីនារីរងគ្រោះ ភ្លាមនោះក៏ស៊ើបអង្កេត និងស្រាវជ្រាវ ក្រោមការបញ្ជាដោយផ្ទាល់ពីលោកឧត្ដមសេនីយ៍ត្រី ឈឿន សុចិត្ដ ស្នងការនគរបាលខេត្ដ មានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្ដ បានចាប់ខ្លួនជនសង្ស័យនៅក្នុងរោចក្រនៅមួយកន្លែងនៅរាជធានីភ្នំពេញ រួចកសាងសំណុំរឿងចាត់ការតាមនីតិវិធីច្បាប់ ៕ ដោយ៖កូឡាប
