តាកែវៈ ជួបសំណេះសំណាលជាមួយនិងសិក្ខាកាម ដែលទើបតែប្រឡងជាប់បានចូលបម្រើ ជានគរបាលជាតិថ្មីស្នងការនគរបាលខេត្តតាកែវ លោកឧត្តមសេនីយ៍ទោ សុខ សំណាង បានក្រើនរំលឹកឲ្យយកចិត្តទុកដាក់ខ្ពស់ គោរពទៅលើវិន័យរបស់អង្គភាពជាធំ ព្រោះកងកម្លាំងនគរបាលដែលមានវិន័យ និងគោរពទៅតាមបទបញ្ជា គឺជានគរបាលយុត្តិធម៌ដែលមានតម្លៃលើការងារបម្រើដល់ប្រជាពលរដ្ឋ ការពារព្រះមហាក្សត្រ ការពារថ្នាក់ដឹកនាំដែលប្រសូត្រ ចេញពីការបោះឆ្នោតដោយប្រជាពលរដ្ឋផ្ទាល់ ។
មានប្រសាសន៍លើកឡើងយ៉ាងដូច្នេះ គឺក្នុងពេលដែលលោកស្នងការ បានជូបសំណេះសំណាលជាមួយនិងប្អូនៗសិក្ខាកាម ដែលទើបតែប្រឡងជាប់បានចូលបម្រើ ការងារជានគរបាលជាតិ នៃស្នងការដ្ឋាននគរបាលខេត្តតាកែវ ចំនួន ៧០រូប នៅសាលប្រជុំរបស់ស្នងការដ្ឋានផ្ទាល់ នាព្រឹកថ្ងៃទី ២១ ខែកុម្ភៈ ២០២០ ។
លោកឧត្តមសេនីយ៍ទោ សុខ សំណាង បានលើកឡើងបន្តថា នគរបាលជាតិ គឺមានតួនាទីយ៉ាងសំខាន់ទៅលើការចូលរួម ថែរក្សាសន្តិសុខសណ្តាប់ធ្នាប់ នៅក្នុងសង្គមឲ្យមានសណ្តាប់ធ្នាប់ល្អ ជាពិសេស រក្សាឲ្យបាននៅសុខសុវត្ថិភាពភូមិឃុំ ដែលប្រជាពលរដ្ឋរស់នៅ ដាច់ខាតមិនឲ្យមានចោលួច ឆក់ ប្លន់ ក្មេងទំនើង និងគ្រឿងញៀន ។ ហើយចំពោះតួនាទីរបស់នគរបាលជាតិ ដែលត្រូវធ្វើយ៉ាងណានោះ គឺសិក្ខាកាមនិងត្រូវបានបញ្ជូន ទៅហ្វឹកហ្វឺននៅសាលានគរបាលជាតិភូមិភាគ៣ នៅត្រែងត្រយឹង ដើម្បីសិក្សាចំណេះជំនាញរយៈពេល ៤ខែ ដើម្បីក្លាយខ្លួនជានគរបាលជាតិយ៉ាងពេញលេញ នឹងត្រូវបានតាំងស៊ុបពេញសិទ្ធិជាមន្ត្រីនគរបាលតែម្តង ។
លោកស្នងការបានសង្កត់ធ្ងន់ថា ក្នុងពេលដែលសិក្ខាកាមកំពុងសិក្សា ត្រូវក្រេបជញ្ជក់យកវិជ្ជាជីវៈពីគ្រូឧទ្ទេស ដើម្បីទទួលបាននិទ្ទេសល្អៗ ត្រឡប់ចូលមកបម្រើរការងារដល់ស្នងការដ្ឋានវិញ ទាំងមានស្នាដៃ និងកិត្តិយស ក្នុងនោះលោកនិងធ្វើការស្នើសុំទៅថ្នាក់លើ ដើម្បីធ្វើជាលិខិតសរសើរ ដើម្បីលើកទឹកចិត្តដល់កងកម្លាំងនគរបាលរបស់យើង ដែលខិតខំបំពេញភារៈកិច្ចបានល្អ ៕ដោយ៖ តាកែវ