ភ្នំពេញ៖ នៅព្រឹកថ្ងៃទី២១ ខែកុម្ភៈ ឆ្នាំ២០២០ នេះកម្លាំងគណៈបញ្ជាការឯកភាពខណ្ឌច្បារអំពៅ នៃរាជធានីភ្នំពេញ ដាក់គោលដៅត្រួតពិនិត្យចររាចរណ៍ដើម្បីត្រួតពិនិត្យរកសារធាតុញៀន លើអ្នកបើកបររថយន្តធុនធំ ពិសេសរថយន្តកុងតឺន័រនៅមុខខ្លោងទ្វារវត្តចំប៉ា លើកំណាត់ផ្លូវជាតិលេខ១ ស្ថិតក្នុងសង្កាត់ក្បាលកោះ ដោយបានរកឃើញអ្នកបើករថយន្ត មានសារធាតុញៀន ៥នាក់។
លោកឡូ ភារម្យ អធិការរងប៉ូលិសខណ្ឌច្បារអំពៅទទួលបន្ទុកការងារបង្រ្កាបគ្រឿងញៀន បានឲ្យដឹងថា ជាលទ្ធផល បានត្រួតពិនិត្យរថយន្តធុនធំ រកសារធាតុញៀនបានចំនួនសរុប៦៣ គ្រឿង ក្នុងនោះដោយរកឃើញអ្នកបើកបរ មានសារធាតុញៀន បានចំនួន៥នាក់ ហើយបានបញ្ជូនទៅអធិការនគរបាលខណ្ឌ ចាត់ការតាមនីតិវិធីច្បាប់។
ជាមួយគ្នានេះដែរ ក្នុងនាមមហាជនទូទៅដែលជាអ្នកប្រើប្រាស់ផ្លូវជាតិលេខ១ ចេញចូលមកកាន់រាជធានីភ្នំពេញ និងពីភ្នំពេញទៅតាមបណ្ដាខេត្តនានា ពិសេសខេត្តស្វាយរៀង ដោយសូមថ្លែងអំណរអរគុណយ៉ាងជ្រាលជ្រៅ ចំពោះកម្លាំងចម្រុះខណ្ឌច្បារអំពៅ ដោយបានយកចិត្តទុកដាក់ពីសុវត្ថិភាព ដល់អ្នកដំណើរដោយបានដាក់គោលដៅ ចុះត្រួតពិនិត្យច្បាប់ចរាចរណ៍ផ្លូវគោក និងពិនិត្យចំពោះឡានធុនធំ ដោយសំដៅរកអ្នកបើកបរឡាន ដែលមានសារធាតុនៅក្នុងខ្លួនយក មកចាត់ការតាមផ្លូវច្បាប់ផងដែរ ហើយពួកគាត់ស្នើឲ្យសមត្ថកិច្ចអាជ្ញាធរខណ្ឌច្បារអំពៅ បន្តធ្វើការងារនេះជាប្រចាំឲ្យដូចភ្លៀងរលឹម ៕ដោយ៖បញ្ញាស័ក្តិ
