ខេត្តព្រះសីហនុ៖ មន្ត្រីកំពង់ផែក្រុងព្រះសីហនុ បានឲ្យដឹងថា នៅថ្ងៃទី២២ ខែកុម្ភៈ ឆ្នាំ២០២០ នាវា Westerdam នឹងរំកិលខ្លួន ចាកចេញពីចំណតកំពង់ផែក្រុងព្រះសីហនុ ជាបណ្តោះអាសន្ន ដោយបណ្តែតខ្លួន ទៅឈប់សំចតនៅលើលម្ហសមុទ្រ ខាងក្រៅផែថ្មជំនួសវិញ ដើម្បីរៀបចំចាក់ប្រេង សម្រាប់បន្តធ្វើដំណើរចាកចេញពីប្រទេសកម្ពុជា។
មន្ត្រីកំពង់ផែដដែលបន្តថា តាមការគ្រោងទុក នៅថ្ងៃទី២៣ ខែកុម្ភៈ ឆ្នាំ២០២០ នាវានេះនឹងចូលមកចតចំណតផែថ្មម្តងទៀត ដើម្បីរៀបចំបែបបទ មុននឹងចាកចេញពីប្រទេសកម្ពុជា។
បន្ថែមលើនេះ ថ្នាក់ដឹកនាំក្រុមហ៊ុននាវា Westerdam ដែលមានមូលដ្ឋាននៅសហរដ្ឋអាមេរិក បានគោរពថ្លែងអំណរគុណ ដល់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ក៏ដូចជាអរគុណប្រទេសកម្ពុជា ដែលអនុគ្រោះឲ្យនាវា របស់ខ្លួន បានចូលចត បន្ទាប់ពីស្ថិតនៅលើផ្ទៃសមុទ្រជាង១០ថ្ងៃ ដោយសារតែមានប្រទេស និងកោះមួយចំនួន បានបដិសេធមិនឲ្យចូលចត ក្រោមហេតុផលថា “បារម្ភពីមេរោគ Covid-19″។
ចំពោះបញ្ហានេះ មន្ត្រីកំពង់ផែក្រុងព្រះសីហនុ បានដកស្រង់សម្តី អ្នកគ្រប់គ្រងក្រុមហ៊ុននាវា Westerdam មកបញ្ជាក់ប្រាប់ប្រព័ន្ធផ្សព្វផ្សាយថា ក្រុមហ៊ុននាវា Westerdam សូមថ្លែងការអរគុណ និងអធ្យាស្រ័យ ដែលការឈប់សំចតយូរថ្ងៃនៅក្នុងប្រទេសកម្ពុជា ដោយមិនមានបង់ប្រាក់ដល់កំពង់ផែ ស្របពេលកំពង់ផែក្រុងព្រះសីហនុ មាននាវាដឹកទំនិញចេញ ចូល ដ៏មមារញឹក៕ ដោយ៖ ដែន សីមា