វេជ្ជបណ្ឌិតម្នាក់នៅក្នុងប្រទេស ដែលបានពន្យារពេលរៀបអាពាហ៍ពិពាហ៍ ដើម្បីធ្វើកិច្ចការនៅជួរមុខប្រយុទ្ធប្រឆាំងនឹងវីរុសកូរ៉ូណា ឬ COVID-19 បានស្លាប់ ក្រោយពេលឆ្លងវីរុសដ៏កាចសាហាវនោះ។
លោកវេជ្ជបណ្ឌិត Peng Yinhua វ័យ ២៩ឆ្នាំ បានព្រមព្រៀងពន្យារពេលរៀបការជាមួយនឹងអនាគតប្រពន្ធគាត់ រហូតដល់ការប្រយុទ្ធប្រឆាំងនឹងវីរុសកូរ៉ូណា ទទួលបានជោគជ័យ ប៉ុន្តែគាត់បានស្លាប់មុនពេលទទួលបានជោគជ័យលើវា។
បើតាមការចុះផ្សាយរបស់កាសែតរដ្ឋចិន People’s Daily នៅថ្ងៃព្រហស្បតិ៍ម្សិលមិញនេះ បានឲ្យដឹងថា លោកគឺជាវេជ្ជបណ្ឌិតផ្នែកផ្លូវដង្ហើមនៅមន្ទីរពេទ្យ First People’s Hospital ដែលស្ថិតនៅក្នុងស្រុក Jiangxia នៃទីក្រុងវូហាន។
លោក Peng Yinhua ត្រូវបានគេបញ្ជូនទៅកាន់មន្ទីរពេទ្យខាងលើ នៅថ្ងៃទី ២៥ មករា ប៉ុន្តែស្ថានភាពរបស់គាត់បានធ្ងន់ធ្ងរខ្លាំងនៅថ្ងៃទី ៣០ ខែមករា ហើយបន្ទាប់មកគាត់ត្រូវបានគេបញ្ជូនបន្តទៅកាន់មន្ទីរពេទ្យ Jinyintan ក្នុងទីក្រុងវូហាន។
ជាអកុសល ស្ថានភាពរបស់គាត់មិនធូរស្រាលឡើយ ហើយគាត់បានស្លាប់នៅម៉ោង ជិត ១០យប់ ថ្ងៃព្រហស្បតិ៍ ទី ២០ កុម្ភៈ។
បើតាមសេចក្តីប្រកាស លោកវេជ្ជបណ្ឌិតខាងលើ គ្រោងរៀបការនៅថ្ងៃទី ១ ខែកុម្ភៈ ចំណែកធៀបការដែលគាត់គ្រោងចែកជូនភ្ញៀវ គឺនៅក្នុងថតតុរបស់គាត់ដដែល។
លោក និងអនាគតភរិយា បានព្រមព្រៀងគ្នា ពន្យារពេលរៀបការ រហូតដល់ការផ្ទុះវីរុសនោះ ត្រូវបានគ្រប់គ្រងបាន។
នៅតាមលើបណ្តាញទំនាក់ទំនងចិន មានការជួយរំលែកទុក្ខយ៉ាងក្រៀមក្រំដ៏ច្រើនចំពោះឪពុកម្តាយរបស់លោកវេជ្ជបណ្ឌិត និងអនាគតប្រពន្ធគាត់៕
អត្ថបទប្រែសម្រួលដោយ៖ សុភ័ក្រ
ប្រភព៖ Mothership