មនុស្សសរុបចំនួន ២០.៦៥៩នៅក្នុងប្រទេសចិន បានជាសះស្បើយពីវីរុសកូរ៉ូណា ឬ COVID-19 និងត្រូវបានអនុញ្ញាតឲ្យចេញពីមន្ទីរពេទ្យកាលពីថ្ងៃសុក្រម្សិលមិញនេះ។ នេះបើតាមការបញ្ជាក់របស់អាជ្ញាធរសុខាភិបាលចិននៅថ្ងៃសៅរ៍នេះ។
បើតាមរបាយការណ៍ប្រចាំថ្ងៃបានឲ្យដឹងថា ត្រឹមរយៈពេលមួយថ្ងៃ គឺនៅថ្ងៃសុក្រ មានអ្នកជាសះស្បើយ និងចេញពីមន្ទីរពេទ្យចំនួន ២.៣៩៣នាក់។
អ្នកជាសះស្បើយពីវីរុសមរណៈនេះពីមួយថ្ងៃទៅមួយថ្ងៃ មានច្រើនគួរឲ្យកត់សម្គាល់ ខណៈដែលតួលេខនៃអ្នកឆ្លងប្រចាំថ្ងៃ មានការធ្លាក់ចុះខ្លាំង។ បើតាមទិន្នន័យ កាលពីថ្ងៃសុក្រម្សិលមិញ មានអ្នកឆ្លងថ្មីចំនួនត្រឹមតែ ៣៩៧ករណីប៉ុណ្ណោះទូទាំងប្រទេស។
មន្រ្តីចិនបាននិយាយថា ការធ្លាក់ចុះនៃចំនួនអ្នកឆ្លង បានបង្ហាញថាពួកគេកំពុងទទួលបានជោគជ័យ ក្នុងការគ្រប់គ្រងវីរុសនៅក្នុងខេត្តហូបេ ដែលត្រូវអាជ្ញាធរបានរឹតបន្តឹងការធ្វើដំណើរ។
សូមបញ្ជាក់ថា អ្នកស្លាប់សរុបនៅក្នុងប្រទេសចិន បានកើនដល់ចំនួន ២.៣៤៥នាក់ហើយ ចាប់តាំងពីវីរុសដ៏កាចសាហាវនេះ ចាប់ផ្តើមផ្ទុះឡើងនៅក្នុងទីក្រុងវូហាន កាលពីខែធ្នូ ចុងឆ្នាំមុន៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua