ក្រុងតាខ្មៅ ៖ ស្នងការដ្ឋាននគរបាលខេត្តកណ្តាល នៅថ្ងៃទី 22 ខែកុម្ភៈនេះ បានចេញរបាយការណ៍ករណីជួញដូរដោយខុសច្បាប់នូវសារធាតុញៀន ឱ្យចាប់ខ្លួនជនសង្ស័យ 3នាក់ ដោយក្នុងនោះមានជនសង្ស័យម្នាក់ជាកូនរបស់មន្រ្តីជាន់ខ្ពស់ម្នាក់នៅពន្ធនាគារខេត្តកណ្ដាល។
ករណីនេះកើតហេតុតាំងពីថ្ងៃទី២០ កុម្ភៈ ២០២០ វេលាម៉ោង១យប់ នៅចំណុច ផ្ទះសំណាក់ឈ្មោះបែសថាន្នីស្ថិតនៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។
ជនសង្ស័យ ០៣នាក់៖ ១-ឈ្មោះនីម ម៉ានិត ភេទប្រុស អាយុ១៩ឆ្នាំ មុខរបរជានិស្សិត (ឃាត់ខ្លួន) នៅភូមិក្រពើហា សង្កាត់ព្រែកឫស្សី ក្រុងតាខ្មៅ ខេត្តកណ្តាល ជាកូនអនុប្រធានពន្ធនាគារខេត្តកណ្តាល ២-ឈ្មោះទួត សុវណ្ណពិសិដ្ឋ ភេទប្រុស អាយុ២៨ឆ្នាំ មុខរបរមិនពិតប្រាកដ (ឃាត់ខ្លួន) នៅស្ទឹងជ្រៅ សង្កាត់ព្រែកឫស្សី ក្រុងតាខ្មៅ ខេត្តកណ្តាល។ ៣-ឈ្មោះ ហង់ ស្រីកា ភេទស្រី អាយុ២៥ឆ្នាំ មុខរបរប្រើការងារក្នុងខារ៉ាអូខេ ស្នាក់នៅផ្ទះជួលភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។ វត្ថុតាងចាប់យក៖ ម្សៅក្រាមពណ៌សថ្លាសង្ស័យជាសារធាតុញៀន (ម៉ាទឹកកក) ចំនួន៣កញ្ចប់ ។ ឧបករណ៍សម្រាប់ប្រើប្រាស់គ្រឿងញៀនចំនួនមួយ និងថង់សម្រាប់វេចខ្ចប់មួយចំនួន។ ទូរស័ព្ទ០១គ្រឿងម៉ាកNOKIAអិនចុចពិល។ ដែកកេះចំនួន០៣។ ជញ្ជីងសម្រាប់ថ្លឹងចំនួន០១។ ម៉ូតូ០១គ្រឿង ម៉កSuzuki nexពណ៌ទឹកក្រូច ពាក់ផ្លាកលេខ1HQ-4031។ លុយចំនួន៤៩.០០០រៀល និងកាបូបដៃសម្រាប់ដាក់ថ្នាំញៀនចំនួន០១។
បច្ចុប្បន្នជនសង្ស័យ ព្រមទាំងវត្ថុតាងត្រូវបាន យកមកអធិការរដ្ឋាននគរបាលក្រុងតាខ្មៅ ដើម្បីកសាងសំណុំរឿង ចាត់ការតាមនីតិវិធីច្បាប់៕ ដោយ៖កូឡាប
