ភ្នំពេញ៖ មានផ្សព្វផ្សាយជាសាធារណៈតាមរយៈគេហទំព័រ Facebook ផ្លូវការ មានឈ្មោះ William Guang របស់ លោក សុខ សុវណ្ណវឌ្ឍនាសាប៊ុង ប្រធានគណបក្សខ្មែរក្រោក ថារដ្ឋបាលខណ្ឌឫស្សីកែវឈូសដីពលរដ្ឋ និងចាប់បង្ខាំងមនុស្សខុសច្បាប់វាយដំរហូតសន្លប់ក្នុងបន្ទប់ប្រជុំ ប៉ុន្តែរដ្ឋបាលខណ្ឌឫស្សីកែវ បានបញ្ជាក់ថា ការផ្សាយព័ត៌មានខាងលើនេះ ដោយមិនបានឆ្លុះបញ្ចាំងអំពីការពិត និងបានបង្កឲ្យមានការភាន់ច្រឡំដល់សាធារណៈមតិ ស្ដីពីការអនុវត្តវិធានការរដ្ឋបាល ដោះស្រាយបញ្ហាទំនាស់ដីធ្លី នៅតំបន់អភិវឌ្ឍន៍ឫស្សីកែវ។
ពាក់ព័័ន្ធករណីខាងលើនេះ នៅថ្ងៃទី២២ ខែកុម្ភៈនេះ សាលាខណ្ឌឫស្សីកែវ បានចេញសេចក្ដីប្រកាសព័ត៌មាន ឆ្លើយតបទៅនឹង ព័ត៌មានមិនពិត ដែលត្រូវបានផ្សព្វផ្សាយជាសាធារណៈតាមរយៈគេហទំព័រ Facebook ផ្លូវការ មានឈ្មោះ William Guang របស់ ឯកឧត្តម សុខ សុវណ្ណវឌ្ឍនាសាប៊ុង ប្រធានគណបក្សខ្មែរក្រោក ដោយមិនបានឆ្លុះបញ្ចាំងអំពីការពិត និងបានបង្កឲ្យមានការភាន់ច្រឡំដល់សាធារណៈមតិ ស្ដីពីការអនុវត្តវិធានការរដ្ឋបាល ដោះស្រាយបញ្ហាទំនាស់ដីធ្លី នៅតំបន់អភិវឌ្ឍន៍ឫស្សីកែវ។ ពិសេស ករណីដែល ឯកឧត្តម បានបង្ហោះផ្សព្វផ្សាយចោទប្រកាន់មកលើ រដ្ឋបាលខណ្ឌ ថាបានធ្វើទារុណកម្មទៅលើ បុគ្គលឈ្មោះ ព្រំ បូរ នៅក្នុងបន្ទប់សាលប្រជុំ របស់ រដ្ឋបាលខណ្ឌ នេះជាការមួលបង្កាច់យ៉ាងធ្ងន់ធរមកលើ អាជ្ញាធរ។
រដ្ឋបាលខណ្ឌ សូមបដិសេធ និងសូមច្រានចោលទាំងស្រុង ចំពោះការចោទប្រកាន់ មកលើ អាជ្ញាធរ ដោយគ្មានមូលដ្ឋានបែបនេះ។ រដ្ឋបាលខណ្ឌ មានភ័ស្តតាងគ្រប់គ្រាន់ ដែលអាចបញ្ជាក់បានថា បុគ្គលឈ្មោះ ព្រំ បូរ មិនត្រូវបាននរណាម្នាក់ធ្វើទារុណកម្មឡើយ ដោយយោងតាមរូបភាពវីដេអូពីកាមេរ៉ាសុវត្ថិភាព នៅក្នុងបរិវេណសាលាខណ្ឌ និងនៅក្នុងបន្ទប់សាលប្រជុំ។ ជាចុងក្រោយ រដ្ឋបាលខណ្ឌ សង្ឃឹម និងជឿជាក់ថា ឯកឧត្តម នឹងកែតម្រូវអត្ថបទលើបណ្ដាញសង្គម របស់ ឯកឧត្តម ឡើងវិញ ដែលបានចោទប្រកាន់មកលើអាជ្ញាធរសាធារណៈ ដោយគ្មានភ័ស្តតាងច្បាស់លាស់ដូចច្នេះ៕ដោយ៖បញ្ញាស័ក្តិ
