កំពង់ស្ពឺ៖ លោកឧត្តមសេនីយ៍ឯក ហ៊ុន ម៉ាណែត បានលើកឡើងថា កងទ័ពដែលច្បាស់លាស់ និងការពាររាជរដ្ឋាភិបាលស្របច្បាប់នេះហើយ ទើបកម្ពុជាមានសុខសន្តិភាពពេញលេញដល់សព្វថ្ងៃ ដូច្នេះសំខាន់បំផុតត្រូវថែរក្សាសុខសន្តិភាព ស្ថិរភាព ត្រូវទប់សង្គ្រាមផ្ទៃក្នុង មានតែខ្មែរគ្នាឯងទេដែលគិតពីខ្មែរ តែប្រទេសមហាអំណាចមិនដែលគិតពីខ្មែរនោះទេ ជាក់ស្តែងគឺមានតែបន្សល់ទុកនូវគ្រាប់បែកទម្លាក់មកកាលពីសម័យ លន់ នល់។
សិក្ខាកាមកងពលតូចលេខ៧០ យោធភូមិភាគទី២ យោធភូមិភាគទី៣ យោធភូមិភាគពិសេស និងកងពលធំលេខ៣ បានបិទវគ្គហ្វឹកហ្វឺនតាមបណ្តាជំនាញ(ថ្មើរជើងអាវុធគាំទ្រ) និងលំហាត់បាញ់គ្រាប់ពិត ចល័តវាយសង្គ្រប់ថ្នាក់កងអនុសេនាធំថ្មើរជើងយានយន្ត កាលពីថ្ងៃទី១៥ មករា ២០១៨ នៅទីលាន សាលាហ្វឹកហ្វឺនរបស់កងពលនៅតំបន់ភ្នំធំម្រះព្រៅ ស្រុកសំរោងទង ខេត្តកំពង់ស្ពឺ។។
លោកឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះ នៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក បានថ្លែងថា កងទ័ពត្រូវត្រៀមហ្វឹកហ្វឺន ត្រៀមការពាររាជរដ្ឋាភិបាលស្របច្បាប់ និងការពារបូរណភាពទឹកដីជានិច្ច។ កងទ័ពគឺជាកម្លាំងស្នូល ត្រូវស្មោះត្រង់ដាច់ខាត ចំពោះជាតិមាតុភូមិទាំងមូល ការពារដាច់ខាតសន្តិភាព និងស្ថិរភាព ឲ្យប្រទេសជាតិរីកចម្រើនទុកឲ្យកូនចៅជំនាន់ក្រោយ ហើយដោយសារកងកម្លាំងប្រដាប់អាវុធទាំងអស់បំពេញភារកិច្ច ធ្វើឲ្យប្រជាជនមានភាពកក់ក្តៅ
វត្តមាននៃកងកម្លាំងប្រដាប់អាវុធ មិនមែនជាការបន្លាច តែជាការធ្វើឲ្យមានភាពកក់ក្តៅ។
លោក ហ៊ុន ម៉ាណែត បានថ្លែងបញ្ជាក់ថា សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបន្តការបំពាក់ និងតម្លើងប្រាក់បៀវត្សរ៍គ្រប់បែបយ៉ាងដល់កងទ័ព និងមានជាប់ជាប្រចាំ ហើយគោលនយោបាយគ្រប់បែបយ៉ាងរដ្ឋប្រឹងផ្តល់ឲ្យ ប៉ុន្តែរឿងថ្នាំងថ្នាក់តូចមួយធ្វើឲ្យខូចខាតទាំងអស់ ប៉ុន្តែរឿងតូចនេះ គឺក្លាយជារឿងសតិអារម្មណ៍ ដែលត្រូវតែដោះស្រាយមិនអាចមើលស្រាលបានទេ៕ ដោយ៖បញ្ញាស័ក្តិ
