ខេត្តព្រះសីហនុ៖ អភិបាលក្រុងព្រះសីហនុ លោក អ៊ី សុខឡេង បានឲ្យដឹងថា រយៈពេលពីរថ្ងៃ គឺថ្ងៃសៅរ៍-អាទិត្យ ទី២២-២៣ ខែកុម្ភៈ ឆ្នាំ២០២០ រដ្ឋបាលក្រុងព្រះសីហនុ និងក្រុមការងារកាយអូរប្រឡាយ បានសហការគ្នាកាយអូរ LV ផ្អែកខាងលើឆ្ពោះមកស្ពានអូរ១ ដោយទទួលបានលទ្ធផលដូចខាងក្រោម ៖
១- កាយផ្ទះ ដែលសង់រស់នៅលើអូរទាំងស្រុង បានចំនួន ២៥ខ្នងផ្ទះ ក្នុងចំណោមផ្ទះនៅលើអូរចំនួន ៥៥។ ដូច្នេះផ្ទះសង់រំលោភនៅលើអូរទាំងស្រុង នៅសេសសល់ចំនួន ៣០ផ្ទះទៀត
២- កាយផ្ទះរំលោភលើអូរមួយផ្អែក បានចំនួន ១៤ផ្ទះ ក្នុងចំណោមសំណង់លើអូរមួយផ្អែកសរុបចំនួន ៦៦។ ដូច្នេះផ្ទះសង់នៅលើអូរមួយផ្អែក គឺនៅសល់ចំនួន ៥២ផ្ទះទៀត
លោក អ៊ី សុខឡេង ឲ្យដឹងដូច្នេះ រួចបញ្ជាក់ថា ផ្ទះរំលោភលើអូរទាំងស្រុង និងរំលោភអូរមួយផ្អែក សរុបចំនួន ១២១ ប៉ុន្តែបច្ចុប្បន្ននេះ អាជ្ញាធរ កាយកម្ចាត់បានចំនួន ៣៩ផ្ទះហើយ ពោលគឺនៅសល់ផ្ទះចំនួន ៨២ទៀត។ ហើយនៅដើមសប្តាហ៍នេះក្រុមការងារ ក៏កំពុងអនុវត្តសកម្មភាពកាយផ្ទះទាំងឡាយណា ដែលសង់ប៉ះពាល់លើដីចំណីអូរប្រឡាយ ជាបន្តបន្ទាប់ រហូតកាយទាល់តែអស់ជាស្ថាពរ។
ឆ្លៀតឱកាសនេះដែរ លោក អ៊ី សុខឡេង អភិបាលក្រុងព្រះសីហនុ ក៏បានថ្លែងអំណរគុណ ដល់ក្រុមការងារទាំងអស់ ដែលបានខិតខំប្រឹងប្រែងលើការងសរស្តារអូរប្រឡាយ និងជាពិសេសក៏សូមអរគុណដល់បងប្អូនប្រជាពលរដ្ឋ ដែលសង់ផ្ទះរស់នៅលើអូរ ក្រោយពីក្រុមការងារបានប្រាប់ពីផែនការកាយអូរ និងពន្យល់ពីផលលំបាកផ្សេងៗ នៃការរស់នៅលើអូរ គឺបងប្អូនប្រជាពលរដ្ឋ បានភ្ញាក់រលឹក និងយល់ព្រមរុះរើផ្ទះ ឬនាំយកសម្ភារៈចេញពីផ្ទះ ដើម្បីឲ្យក្រុមការងារកាយផ្ទះ និងពង្រីកអូរតាមប្លង់ប្រព័ន្ធ ឲ្យមានដំណើរការបានរលូន និងឆាប់រហ័ស៕ ដោយ៖ ដែន សីមា
