ភ្នំពេញ ៖ សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន(ក៧) ដឹកនាំដោយលោក ឧត្តមសេនីយ៍ត្រី ស្រី សុវណ្ណា នាយករងមន្ទីរ និងមានការដឹកនាំសម្របសម្រួលពីលោក គុជ គឹមឡុង ព្រះរាជអជ្ញារងអមសាលាដំបូងរាជធានីភ្នំពេញ បានធ្វើការស្រាវជ្រាវ និងឈានទៅបើកកិច្ចប្រតិបត្តិការបង្ក្រាប ករណីជួញដូរគ្រឿងញៀនខុសច្បាប់ នៅចំណុចមុខសណ្ឋាគារ(ញ៉ូម៉ូណែតភ្នំពេញ ហូថែល) បណ្តោយផ្លូវព្រះមុន្នីវង្ស សង្កាត់បឹងកេងកង២ ខណ្ឌបឹងកេងកង រាជធានីភ្នំពេញ។
សមត្ថកិច្ចបានឲ្យដឹងថា ក្នុងប្រតិបត្តិការនៅថ្ងៃទី២១ ខែកុម្ភៈ ឆ្នាំ ២០២០ វេលាម៉ោង១៩និង៣០នាទី សមត្ថកិច្ចឃាត់ខ្លួនជនសង្ស័យឈ្មោះ ហ្វ័ង យៀកឆឹង (WANG YUECHENG) ភេទប្រុស អាយុ៥៣ឆ្នាំ ជនជាតិចិន មុខរបរមិនពិនប្រាកដ ។
ក្នុងនោះកម្លាំងដកវត្ថុតាង ៖ សារធាតុញៀនប្រភេទមេតំហ្វេតាមីន(ICE) ១កញ្ចប់ធំ ទម្ងន់ ៩៩៤,១០ក្រាម ទូរស័ព្ទដៃ ១គ្រឿង និងម៉ូតូ១គ្រឿង ។
បច្ចុប្បន្ន កម្លាំងជំនាញមន្ទីរប្រឆាំងបទល្មើសគ្រឿងញៀនបានកសាងសំណុំរឿង បញ្ជូនទៅសាលាដំបូងរាជធានីភ្នំពេញ តាមការបន្តតាមនីតិវិធី ៕ដោយ៖បញ្ញាស័ក្តិ
